Yawuupullulla 18 - Mawu a Mulluku

Dda okumulliwa wa Babiloni

¹ Ddimallille ddenndda kahoonattho masomphenya a mungelo mmodda akitthaka ovenyera oddullu. Aakhalla ni olamulello wuullupalli nave ntitimiho naye naari nuullupalli vawi naanamolleella ellapo yavatthi ettheene.

² Aakhuwa ni mawu oowella nave allota wi, “Ookumuwa! Babiloni oovuwa ookumuwa! Vano ootthattuwa nipuro nookhallamo minepa ddoonanara, enama ddawoopiha ddoonanara ddittheddene ni epallame ddoonanara.

³ Vawi athu a mitundu ddittheddene aamuwirya vinywaaye oolezeliha aweeriha ddooraruwa ddayennddo. Mamwene a va ellapo yavatthi yaararuwana, allupa malonda attheene yaakhalla ni eyuuma ekaamba ya eyuumaaye ni oraruwa waye.”

⁴ Nave kahiiwattho mawu amodda oovenyera oddullu ellotaka wi, “Khumaniwo athwaaka, wa olliyooyo! Khamunaphwanella wi mweerekena machimwaayaayo, khamunaphwanella wi mukawanena ollakiwa wayenko!

⁵ Vawi machimwaaye yohuukellana ophiyera oddullu, nave Mulluku ohuupuwella mitteko ddaye ddoonanara.

⁶ Mumuhokolloselle aweerenlleeyeni, mumullivellihe opiilli va ddittheddene enreeye. Mumuwiryihe opiilli kapwaaye a yoowirya yoowalli wonanko yoowirya uuvahilleni olliyooyo.

⁷ M'muhoose ni omumoriha ethakaraka ddawinlliha moollikana ni eyuuma owaaka ddoohakallalliha iivahilleeye yeekha. Vawi annallota yeekha wi, ‘Vano ngakiweheni, miyaano tti mwene aamutthiyana, ngihiyo naamukhwelle ngiwa kikumana ni ddawinlliha.’

⁸ Ekaamba ya yeella millilli ddineerommorella va nllapo nimodda, ereta winlla ni ettalla. Nave aneerewoosiwa ni munllo, kaambiiwa Apwiya Mulluku, ayo enamweeruza olliyooyo, tti amasiva.”

⁹ Mamwene a va ellapo yavatthi ayo yeerillena ddooraruwa ni wiihakallallihana eneerewinlla ni omoriwa ethakaraka vawoonani mwiisi okhumaka ovenyera vamunlloni onaashellihe muzindooyo.

¹⁰ Eneerewiimella voorekama ekaamba yawoova wi enaakawanena ddoohoosiwa ddaye. Eneerollota wi, “Otulli! Otulli Babiloni! Muzinda woovuwa ni wamasiva! Va enthawi yooyeva woollakiwa ddiidda!”

¹¹ Allupa malonda a va ellapo yavatthi eneerewinlla ni ommorella ethakaraka kaambiiwa khaavottho anawa akulle ddeko ddiwa.

¹² Khaavo anawa akulle golide, siliva, malluku oohiyanahiyana oowallamella mutengo, ekuwo ddaweellesesa, ddabululu, ddabafuta ni ddooreera ddoofiira, miteekho ddoohiyanahiyana dda nthuko naphaama ni ddeko ddoohiyanahiyana ddoovenyera o manyaka a ethepo, mikoko dda mukuwa ni aironi, marabulo,

¹³ ddooddiviha ddoocha ddoohiyanahiyana, mure,* lubani,* vinyo ni makhura, othu wa tirigu, eng'ombe, enkhosa, akavalo, magareta, akaporo naari allupa mutteko amodda.

¹⁴ Allupa malonda yaamullotella mutthiyanooyo wi, “Ddeko ddittheddene ddaphaama waariiwenanndde ddohuuthawa navettho eyuumaawo ni ddeko wakotelleewenndde ddoomalla nave khoddiphwanyattho!”

¹⁵ Allupa malonda yaari ni eyuuma vaweerani malondiiwa m'muzindanimmo eneerewiimella voorekama ekaamba yawoova wi enaakawanena ddoohoosiwa ddaye. Eneerewinlla ni ommorella ethakaraka

¹⁶ wi, “Otulli! Otulli! Muzinda woovuwooyo! Aaddollweella owara ekuwo ddaweellesesa, ddabululu ni ddooreera ddoofiira ni wiireeriha ni golide, malluku oohiyanahiyana oowallamella mutengo!

¹⁷ Koma va enthawi yooyeva eyuuma ettheeneelle yoomalla!” Ooweetiha ekallawa attheene, oowella ekallawa ni allupa mutteko a mu ekallawa, yaari voorekamella.

¹⁸ Nave yaakhuwa vawoonani mwiisi okhumaka ovenyera vamunlloni washelliha muzindooyo wi, “Khuwaavo muzinda oyo waphwanaphwanne ni muzinda woovuwoolla!”

¹⁹ Yahiihella nthupi m'muruni mwiwa nave yinlla ni ommorella ethakaraka ellota wi, “Otulli! Otulli! Muzinda woovuwooyo! Olla tti muzinda oyo athu attheene yaari ni ekallawa ddiwa ddaweeta va enyanja yaatukhuwa ni eyuumiiwa! Nave va enthawi yooyeva, eyuuma ettheeneelle yoomalla!”

²⁰ Hakallallani ooddullu nyu! Hakallallani athu a Mulluku ni amurummwa owaaka anamallotella nyu! Vawi Mulluku oomullaka va nnddo eerilleeye wa nyuwaano!

²¹ Vano mungelo amasiva aatukhulla nlluku wunnuwa wiwa wonanko nsillo anivokhella mu enyanja allota wi, “Mmu sika mmo muzinda woovuwa Babiloni aneereeye avokhelliwe vatthi nave khawa ooneyattho.

²² Mawu a gitala wiipa wa athu, ezitoliro ni mapallapata khewa yiiweyattho mwa weyaano! Arive muthu eeruso khawa aphwanyeyattho mwa weyaano, khamuwa mwiiweyattho mawu oosilla!

²³ Khamuwattho mooneya okhara wa enyali mwa weyaano, khamuwa mwiiweya mawu a ootthella ni ootthelliwa mwa weyaano. Allupa malondaawo yaari amasiva va ellapo yavatthi ettheene koma wahaalleka athu attheene a va ellapo yavatthi ni masengaawo!”

²⁴ Babiloni aallakiwa kaambiiwa nikhame na anamallotella ni athu a Mulluku naaphwanyiwa m'muzindanimmo. Ddawoona, nikhame na attheene ayo yiiphiwe va ellapo yavatthi naaphwanyeya mwa olliye.