Yawuupullulla 17 - Mawu a Mulluku

Dda hule oovuwa

¹ Mmodda a angelo atthanu ni eellaalle yaari ni embale ddiwa dditthanu ni piilli aawa wa miyaano nave allota wi, “Ngawa, kineerowooniha mmo onaakhallelle ollakiwa waye wa hule oovuwa, muzinda woovuwa omakiwe mowaatamella mihinje.

² Mamwene a va ellapo yavatthi yaararuwana mutthiyanoolla nave athu a va ellapo yavatthi yaalezelana vinyo a oraruwa wayenko.”

³ Munepa Waweella aakihoollella nave mungelo aakikusa akiyaana ochipululuni. Wenko kaamoonawo mutthiyana akeraatthille vatulli va enama yuullupalli yawoopiha yoofiira. Yaalembiwa manddina vamwiillini viwa vatthevene oomullotella epewe Mulluku. Enama yuullupalli yawoopiheella yaari ni miru mitthanu ni miilli owaaka manyaka khumi.

⁴ Mutthiyana oyo awanre ddoowara ddabululu ni ddooreera ddoofiira, ahiikhuneella ni ddooreeriha dda golide ni dda malluku oowallamella mutengo ddoohiyanahiyana. M'mattani mwaye amupharelle kapu a golide ooddalla ni ddoonanara ni ddawunkha dda mitteko ddaye ddooraruwannddo.

⁵ Vayuuchini vaye vaalembiwa nnddina noohidduwanyeya ottaphullella wiwa nawi, “Babiloni oovuwa, ameewa a mahule mattheene ni a ddoonanara dda va ellapo yavatthi.”

⁶ Nave kahoona wi mutthiyanooyo aalezela ni nikhame na athu a Mulluku yiiphiwe ekaamba yoovelleella omboni dda Yesu. Kamoonilleemi mutthiyanooyo, kaattikhina wunchichi.

⁷ Mungelo aakikoha wi, “Onattikhinella tini? Kineerewuulleella ottaphullella wa mutthiyana yoolla ni enama yuullupalli yawoopiha emutukhunlleeyo, enama yuullupalli yawoopiha ya miru mitthanu ni miilli owaaka manyaka khumi.

⁸ Enama yuullupalli yawoopiha woonilleeweelle eyo yaari ni okumi koma vano khenna okumi. Eri vakhuviru wi ekhume ovenyera ollitini woowallamellesesa wi yiiphiwe. Athu ookhalla va ellapo yavatthi ayo manddiniiwa kheyaalembiwe mu nibukhu na akumi ehinaphatusiwe ellapo yavatthi, eneerottikhina voowehani enama yuullupalli yawoopiheeyo. Yaakhalla ni okumi, vano khennattho okumi koma eneerokhallattho ni okumi.

⁹ “Vano vinapaalleya ezeru ni wiiwesesa. Miru mitthanu ni miillinnddo sika miyaango mitthanu ni miilli, vikeraatthille mutthiyanooyo navettho tti mamwene matthanu ni meelli.

¹⁰ Mamwene matthanu yaakhwa khalle, mmodda annalamulellave nave mmoddooyo khanawe. Awa yooyo anaphwanella wi alamulelle wa enthawi yooyeva.

¹¹ Nave enama yuullupalli yawoopiheeyo yaari ni okumi koma vano khennattho okumi, tti mwene aneetthanu ni aneeraru oyo arittho mmodda a mamwene matthanu ni meelli nave anaya wawiiphiwa.

¹² “Manyaka khumi woonilleewaayo sika mamwene khumi ayo ehinaambe olamulella nave eneerewaakhella olamulello wi elamulelle wa enthawi yooyeva vamodda ni enama yuullupalli yawoopiheeyo.

¹³ Mamwene mattheenaalla eneerewiiwanana wi evelleelle masiviiwa vamodda ni olamulellwiiwa wa enama yuullupaalli yawoopiha.

¹⁴ Eneerowana ekhoto ni mwaanaankhosa nave Mwaanaankhosooyo eneeropambana kaambiiwa olliye tti Apwiya a apwiya ni Mwene a mamwene. Nave oomuthwarellellaaye tti ayo yiithaniwe, etthoolliwe nave tti ookhulupilila.”

¹⁵ Mungelooyo aallotattho wa miyaano wi, “Maaddi woonilleewe mvo vakeraatthille hulooyo, sika ellapo, malloko, mitundu dda athu ni ellotello dda athu.

¹⁶ Manyaka khumi woonilleewe ni enama yuullupalli yawoopiha, ddineerewiitana ni hulooyo. Eneeromwaakha erive ello ariiyena eneeromuhiya ari epwillimwinddive, eneerottakhuna mwiillaaye nave eneeromwiipha voomoosani munllo.

¹⁷ Vawi Mulluku ohaavaha mamwenaalla murima woopaalla weera yoolingaaye vawiiwananani ovelleella masiviiwa ni olamulellwiiwa wa enama yuullupalli yawoopiha ophiyera mawaaye ekwakhwanihiwe.

¹⁸ “Mutthiyana wamoonilleewooyo sika muzinda woovuwa woolamulella mamwene a va ellapo yavatthi.”