Yawuupullulla 16 - Mawu a Mulluku

Embale dda osha murima wa Mulluku

¹ Nave kahiiwa mawu oollotiwa mookhuwa evenyeraka mu enyumba ya Mulluku oya wa angelo atthanu ni eellaalle wi, “Khaweni mwahelle embale dditthanu ni piilli dda osha murima wa Mulluku va ellapo yavatthi!”

² Mungelo awaamba aaya ahella embalaaye va ellapo yavatthi. Makhwata oohoosa ni oovoreya yaakhuma vamiillini va athu attheene ayo yaakhenlle echidindo ya enama yuullupalli yawoopiha ni va ayo yallapenlle nifano niwa.

³ Nave mungelo aneepiilli aahella embalaaye va enyanja. Maaddi yaatthattuwa wonanko nikhame na muthu ookhwa nave erive ello yoophatusiwa yakhalla mu enyanjammo yaakhwa.

⁴ Mungelo aneeraru aahella embalaaye vamihinjeni ni va aneetuutu nave yaatthattuwattho nikhame.

⁵ Nave kaamwiiwa mungelo oolamulella maaddi allotaka wi, “Echiweruzo mweenreenyu tti yawoona, Aweella nyu, nyuwaano murivo ollello nave mwaarivo khalle!

⁶ Yaawiipha athu a Mulluku ni anamallotella nave sika mohaavaha nikhame wi ewirye. Enaakhella nnddo ddinaaphwanella!”

⁷ Vano kahiiwa mawu oovenyera va nikuwa na mukutho ellotaka wi, “Apwiya Mulluku Amasiva Mattheene! Ddaweeruza ddanyu tti ddawoona ni ddoolungama!”

⁸ Mungelo aneesese aahella embalaaye vanndduwani nave nahaakhullelliwa wi niwaavulle athu ni oviha wiwa wawoopiha.

⁹ Athu yahaavulliwa ni oviha wawoopihanngu nave yahaamba ollotella epewe nnddina na Mulluku oyo arina olamulello va millillinndda. Koma kheyaarukunuwalle murima wi emutitimiheke Mulluku.

¹⁰ Nave mungelo aneetthanu aahella embalaaye o mpando woomwene wa enama yuullupalli yawoopiha. Vano epiphi yaawa virive veko vaphiyalle omwenaaye. Nave athu yaaniilluma mallumiiwa ekaamba ya ovoreya yiiweewanko.

¹¹ Nave yaamullotella epewe Mulluku Muullupalli ekaamba ya ovoreya wa makhwataayo. Koma kheyaahiyalle weera machimwiiwa.

¹² Mungelo aneetthanu ni mmodda aahella embalaaye m'muhinjeni muullupalli wa Yufurate. Vano muhinjooyo wahumma waavaha ettilla mamwene oovenyera wookhuma nndduwa.

¹³ Kahoona minepa ddoonanara ddiraru ddawooneya wonanko anaphullu; mmodda akhumaka muwano mwa enowa yuullupalli, mmodda muwano mwa enama yuullupalli yawoopiha ni mmodda muwano mwa namallotella awoottha.

¹⁴ Ddenndda sika minepa ddoonanara ddineera ddoottikhiniha. Minepa ddirarunndda ddinnakhuma ddiya wa mamwene attheene a va ellapo yavatthi, yaatthukumaniha vamodda wi ewane ekhoto ni Mulluku Amasiva Mattheene va nllapo naye nuullupalli.

¹⁵ “Ngiiwani! Kineeroowa wonanko mullupaawiiya! Oodalisiwa tti muthu oyo ahinakona nave ahinarulla ddoowara ddaye wi khawa eeta oohiwara athu ehoone epwillimwinddaaye.”

¹⁶ Vano minepa ddoonanaranndde ddahaatthukumaniha vamodda mamwenaalle vanipuroni nooromolliwa wi, “Armagedoni” mu ellotello ya Eheberi.

¹⁷ Mungelo aneetthanu ni piilli aahella embalaaye muddullu nave kahiiwa mawu oowella oovenyera o mpando woomwene wa mu enyumba ya Mulluku ellotaka wi, “Woomalla!”

¹⁸ Waakhalla ettari, onyakulla ni ogugudeya wa murimu navettho echivomerezi yawoopiha. Waambeella ephatusello ya athu a va ellapo yavatthi khavineereyeke echivomerezi yawi ddiiddo, ella yaari echivomerezi yawoopihesesa ohiyana ni erive echivomerezi!

¹⁹ Muzinda woovuwa waakawaneya vararu navettho mizinda dda ellapo ddittheddene ddaakumuwa. Mulluku ahuupuwella muzinda woovuwa, Babiloni nave aamuwiriha kapu a vinyo a osha murima waye wawoopiha.

²⁰ Ezilumba ddittheddene ni miyaango ddene ddaarimeella.

²¹ Marallalla muullupalli, nimodda noollemella makilogaramu 50, yahaamorella athu ovenyera oddullu. Nave athu yaamullotella epewe Mulluku kaambiiwa mullillooyo waari wawoopiha.