Yawuupullulla 15 - Mawu a Mulluku

Dda angelo ni millilli ddoomalliha

¹ Kahoona oddullu echizindikiro yuullupalli ni yoottikhiniha ya angelo atthanu ni eelli owaaka millilli mitthanu ni miilli. Millilli ddenndda ddaari ddawooniha omalla wa osha murima wa Mulluku.

² Nave kahoona yawooneya wonanko enyanja yamagalasi oowala yoottakanyihera ni munllo. Kaawoonattho ayo yapambanne enama yuullupalli yawoopiha vamodda ni nifano niwa owaakattho ni echiwerengero ya nnddina niwa. Yahiimella vakhuviru ni enyanjeeyo, ephareelle magitala yavahiwiiwa ni Mulluku

³ nave yaaniipa nchipo na Mose, oorumeyella a Mulluku ni nchipo na mwaanaankhosa wi, “Apwiya Mulluku Amasiva Mattheene, mitteko ddanyu tti dduullupalli navettho ddoottikhiniha! Mwene a mitundu ddittheddene, ettilla ddanyu tti ddawoona navettho ddoolungama.

⁴ Athu attheene eneerowoovani nyu Apwiya, khaavo anaakhoote otitimiha nnddina nanyu, vawi nyuwaano tti aweella. Athu a mitundu ddittheddene eneeroowa ni wuullapellani nyuwaano, kaambiiwa mitteko ddanyu ddoolungama ddohooniwa wa athu attheene.”

⁵ Ddimallille ddenndda kahoonattho masomphenya a enyumba ya Mulluku yooddullu nave musasa woomboni ohulliwe.

⁶ Nave angelo atthanu ni eelli ayo yaari ni millilli mitthanu ni miilli yaakhuma mu enyumba ya Mullukummo, ewanre ekuwo ddaweellesesa, emakenlle mikhwamba dda golide va ekhakadda ddiwa.

⁷ Nave emodda ya ddoophatusiwa ddookumi ddisese yahaavaha angelo atthanu ni eellaayo embale dda golide dditthanu ni piilli ddooddalla ni osha murima wa Mulluku, oyo anakhalla enthawi yoohimalla.

⁸ Enyumba ya Mulluku yaaddalla ni mwiisi woovenyera o ntitimiho ni masiva a Mulluku nave khaarivo aworille ovollowa mu enyumba ya Mullukweeyo ophiyera millilli mitthanu ni miilli ddawiihiwe ni angelo atthanu ni eellaalle ddimallille.