Yawuupullulla 14 - Mawu a Mulluku

Dda mwaanaankhosa ni athwaaye

¹ Kaaweha nave kaamoona mwaanaankhosa iimenlle va mwaango wa Ziyoni. Aari vamodda ni athu 144,000 ayo eri ni nnddina naye ni nnddina na Attiitthinnya, ddilembiwe va eyuuchi ddiwa.

² Nave kahiiwa mawu oovenyera oddullu awiiweya wonanko onyakulla wa maaddi manchichi navettho wonanko ogugudeya wawoopiha wa murimu. Ddahiiweya wonanko athu sika eniipa machipwiiwa ni magitala.

³ Athu 144,000 yahiimella vamiitthoni va mpando woomwene, ddoophatusiwa ddisese ddookumi ni attekweene nngu yiipaka nchipo niwa nanaanweene nno khaarivo awora wiipana. Yaalla tti yaayove yoopolliwe va ellapo yavatthi.

⁴ Yaalla yahiisunga sika asombwe oohiiripiha ni atthiyana. Yaanamuthwara mwaanaankhosa orive weko ayiilleeyewo. Yahoopolliwa variyari va athu attheene nave tti awaamba ovelleelliwa wa Mulluku ni wa Mwaanaankhosoolle.

⁵ Khenootthekevo waambeella khalle, khenna machimo.

Dda angelo araru

⁶ Nave kaamoona mungelo mmodda avavaka muddullu, aakhalla ni othenga waphaama wa enthawi yoohimalla wi allalleye wa athu a va ellapo yavatthi, wa mitundu ddittheddene, malloko mattheene, ellotello ddittheddene ni ellapo ettheene.

⁷ Aallota ni mawu oowella wi, “Mooveni Mulluku nave mutitimiheni vawi enthawi yawi eeruze yoophiya. Mullapelleni olliyooyo aphatusalle oddullu, ellapo yavatthi, enyanja ni aneetuutu!”

⁸ Mungelo aneepiilli aamuthwara awaamboolle allota wi, “Ookumuwa! Babiloni oovuwa ookumuwa! Olle aweerihalle athu attheene wi emuwirye vinywaaye oolezeliha ni a makhallello ooraruwa!”

⁹ Mungelo aneeraru ahaathwara akhwaaye eellaalle allotaka ni mawu oowella wi, “Oyo anallapella enama yuullupalli yawoopiha vamodda ni nifano naye, aakhella echidindwaaye va eyuuchi vaye apaalle va nnatta vaye

¹⁰ amuwirye yeekha vinyo a Mulluku, vinyo oohisungunula a onanariwa waye nko ahenlleeye mu kapu a osha murima waye! Attheene eneera ddenndda eneerollakiwa ni munllo owaaka sulufure vamiitthoni va angelwaaye aweella ni mwaanaankhosa.

¹¹ Mwiisi wa munllo woohoosa onnavirellella oya muddullu wa enthawi yoohimalla. Ayo enallapella enama yuullupalli yawoopiha ni nifano naye ni ayottho yadindiwe nnddina naye khewa yiithuuwa otthaana ni mahiiyu.”

¹² Vano nngu sika wiithaniwa wa athu a Mulluku ayo enathwara malamulwaaye wi evillelleke ni okhalla oororomelleya wa Yesu.

¹³ Nave kahiiwa mawu oovenyera oddullu ellotaka wa miyaano wi, “Lemba ddenndda, oodalisiwa tti ayo waambeella ollello oya muhoollo enaakhwe eri mu eyaattano ni Apwiya!” Munepa Waweella ahaakhullella wi, “Ddawoona aakhalla ni odalisiwa! Eneerohakallalla ni wiithuuwa o mitteko ddiwa ddootopiha kaambiiwa mitteko ddiwannddo ddinnaathwara.”

Dda ohata wa va ellapo yavatthi

¹⁴ Kaaweha nave kahoona murapo waweella, vamuraponimvo vakeraatthille mmodda awooneya wonanko mwaana a muthu amuwanre korona* a golide omuruni waye wonanko mwene nave aphareelle echikwakwa yawiisha m'mattani mwaye.

¹⁵ Nave mungelo mmodda aakhuma ovenyera mu enyumba ya Mulluku yooddullu nave anakhuwa akeraatthille vamuraponoolle ni mawu oowella awi, “Kusa echikwakwaaweeyo waambe otulla ddoohata kaambiiwa enthawi yookwakhwana nave ddoohata dda va ellapo yavatthi ddohimma!”

¹⁶ Vano akeraatthille vamuraponooyo ahaamba mutteko ni echikwakwaaye, aatulla ddoohata dda va ellapo yavatthi.

¹⁷ Nave kaamoonattho mungelo mmodda akhumaka mu enyumba ya Mulluku yooddullu, nayeenettho aakhalla ni echikwakwaaye yawiisha.

¹⁸ Mungelo mmodda, oyo aari oolamulella munllo, aawa ovenyera va nikuwa na mukutho. Aamukhuwella mungelo ookhalla ni echikwakwa yawiishoolle ni mawu oowella awi, “Ambavo ophadda mpesa wa mu emata ya va ellapo yavatthi kaambiiwa mpesooyo wohimma!”

¹⁹ Sika mungelooyo ahaamba ophadda ni echikwakwa mpesa wa mu emata ya va ellapo yavatthi nave awuvokhella mu yoovotella ya osha murima wawoopiha wa Mulluku.

²⁰ Mpesooyo waavotiwa mu yoovotella yaari otte wa muzinda nave nikhame sika nakhumalle moovotella mpesammo neetellella wonanko muhinje woorekama makilomita 300 nave owallamella wiwa vakhuviru mamita meelli.