Yawuupullulla 13 - Mawu a Mulluku

Dda enama dduullupalli ddawoopiha piilli

¹ Nave kahoona enama yuullupalli yawoopiha ekhumaka mu enyanja. Yaari ni manyaka khumi ni miru mitthanu ni miilli, va nirive nnyaka vaakhalla korona* ni va orive muru vaalembiwa nnddina noomweerella epewe Mulluku.

² Enama yuullupalli yawoopiheeyo yooneya wonanko nanthavi, manyallwaaye yooneya wonanko echimbalangondo navettho eyanwiiwa yooneya wonanko ya mukango. Enowa yuullupalleeyo yaavaha enama yuullupalli yawoopiheeyo masivaaye, mpandwaaye woomwene, owaakattho olamulellwaaye wuullupalli.

³ Mmodda wa miru dda enama yuullupalli yawoopiheeyo wooneya wonanko waakhalla ni nikhwata nookhwana koma nikhwatanno naavolla. Nave athu attheene a va ellapo yavatthi moottikhina yaathwara enama yuullupalli yawoopiheeyo.

⁴ Arive muthu aallapella enowa yuullupalleeyo kaambiiwa yaavelleella olamulellwiiwa wa enama yuullupalli yawoopiha. Yaallapellattho enameeyo ellota wi, “Ttaani ari wonanko enama yuullupalli yawoopiheella? Ttaani anaawore owanana?”

⁵ Enama yuullupalli yawoopiheeyo yahaakhullelliwa wi ollotelleke epewe ni omuvevulla Mulluku nave yaavahiwa olamulello waweera ddiidda wa miyeri 42.

⁶ Yahaamba omullotella epewe Mulluku, nnddina naye, onipuroni anakhalleeye ni ayo enakhalla oddullu.

⁷ Yahaakhullelliwa wi ewane ni athu a Mulluku ni waagonjiha. Navettho yaavahiwa olamulello va nirive nlloko, erive ellapo, erive ellotello ni orive mutundu.

⁸ Athu attheene ookhalla va ellapo yavatthi eneerollapella enama yawoopiha yuullupalleeyo, waapatula yaayove manddiniiwa yalembiwe ehinaphatusiwe ellapo yavatthi mu nibukhu na akumi na mwaanaankhosa iiphiwoolle.

⁹ “Vano ngiiwani, mwaarina maaru!

¹⁰ Ayo enaphwanella ohiyiwa mundende eneerowallelliwa nave ayo enaphwanella wiiphiwa ni nsupada eneerewiiphiwa. Nngu sika wiithaniwa wa athu a Mulluku wi evillelleke ni okhulupilila.”

¹¹ Nave kahoona enama emodda yuullupalli yawoopiha ekhumaka mu ellapo yavatthi. Yaakhalla ni manyaka meelli wonanko mwaanaankhosa koma yaanallota wonanko enowa yuullupalli.

¹² Yaaphariha mutteko olamulello muullupalli yavahiwiiwa ni enama yuullupalli yawoopiha yawaambeelle. Yaawatihera ellapo yavatthi ettheene vamodda ni athu attheene ookhalla mwemmo wi ellapelle enama yuullupalli yawoopiha yawaamba, nikhwata niwa nookhwana navonllenne.

¹³ Enama yuullupalli yawoopiha yaneepiilleella yaheera ddoottikhiniha dduullupalli, yaheeriha wi munllo okitthe ovenyera oddullu athu attheene yoonaka.

¹⁴ Yahaalleka athu attheene a va ellapo yavatthi ni ddoottikhiniha yaakhullelliwiiwa weera vamiitthoni va enama yuullupalli yawoopiha yawaambeelle. Yaanaalleellattho athu a va ellapo yavatthi wi eseme nifano nootitimiha enama yuullupalli yawoopiha yakakathiwe ni nsupada koma ekhalla ni okumeelle.

¹⁵ Enama yuullupalli yawoopiha yaneepiilleella yahaakhullelliwa oviddeellella okumi mwa nifano na enama yuullupalli yawoopiha yawaambeelle wi nifanonno nilloteke ni owiipha athu attheene ayo ehinamullapella.

¹⁶ Enama yuullupalli yawoopiha yahaawatihera athu attheene, ang'onong'ono ni uullupalli, eeyuuma ni oohoowa, akaporo ni ehiri akaporo wi edindiwe va nnattanatta apaalle va eyuuchi ddiwa.

¹⁷ Yeerille ddiiddo wi ahikhallevo muthu anaakulle apaalle okulliha ahinadindiwe. Yeella sika nnddina na enama yuullupalli yawoopiha apaalle echiwerengero yoottaphullella nnddina naye.

¹⁸ Vano vinapaalleya ezeru ni wiiwesesa. Oyo arina ezeru ddoottaphullella echiwerengero ya enama yuullupalli yawoopiheeyo kaambiiwa echiwerengerweeyo enattaphullella nnddina na muthu. Echiwerengerweeyo tti 666.