Yawuupullulla 12 - Mawu a Mulluku

Dda mutthiyana ni enowa yuullupalli

¹ Nave oddullu wahooneya echizindikiro yuullupalli, mutthiyana oowara nndduwa, anyinganlle mweeri omanyalloni waye ni korona* ookhalla ni etheneeri khumi ni piilli omuruni waye.

² Aakhalla ni erukullu nave aari vakhuviru omuyara mwaana nave voohoowani ni ddoovoreya ddineereya voomuyarani mwaana ahinlla mookhuwa.

³ Oddullu wahooneyattho echizindikiro emodda, enowa yuullupalli yoofiira yookhalla ni miru mitthanu ni miilli ni manyaka khumi ni korona va orive muru.

⁴ Ni mwiillaaye aapurulla emodda mwa ezigawo ddiraru dda etheneeri dda oddullu nave addivokhella va ellapo yavatthi. Nave enoweeyo yahiimella vahoollo va mutthiyanooyo wi emuttakhune mwaanooyo ayariwa.

⁵ Mutthiyanooyo aamuyara mwaana aamullopwana, oyo anaawaalamulelle athu a mitundu ddittheddene ni ekopo yamukoko. Nave mwaanooyo ori oyariwa wene ahaakhiwa m'mattani mwa amennya, akusiwa oya wa Mulluku ni o mpando woomwenaaye.

⁶ Mutthiyanooyo aathawella ochipululuni, onipuroni nko Mulluku akhozilleeyewo khalle wi aweheriwewo wa mallapo 1, 260.

⁷ Nave oddullu waakhalla ekhoto eyo Mikaele vamodda ni angelwaaye yawaniiwa ni enowa yuullupalli vamodda ni angelwiiwattho.

⁸ Nave enowa yuullupalleeyo yaagonjihiwa sika elliweeyo vamodda ni angelwiiwa kheyaakhullelliwe wi ekhalleke oddullunko.

⁹ Enowa yuullupalleeyo yaavokhelliwa vatthi, enowa yakhalleeyo, nnddina niwa mdiyerekezi apaalle Satana, oyo allekille ellapo yavatthi ettheene. Aavokhelliwa vatthi vamodda ni angelwaaye attheene.

¹⁰ Sika kahiiwa mawu ookhuwa ovenyera ooddullu awi, “Vano ovullusa, masiva ni omwene wa Mulluku nave olamulello wa Mesiya* ddoophiya. Vawi oyo aniimella vamiitthoni va Mullukwaahu aavaanyihaka asinnihu ni arokorihu otthaana ni mahiiyu ahiikarihiwawo oddullu wuno.

¹¹ Asinnihu ni arokorihu yaamupambana Satana ni nikhame na mwaanaankhosa owaakattho omboni wa echikhulupililwiiwa nave yahaakhullella ovelleella okumiiwa wi ekhwe.

¹² Sika hakallallani ellapo yooddullu ni attheene munakhalla wenko! Koma otulli wa ellapo yavatthi ni enyanja! Vawi Satana akitthelle wenko, oosha murima kaambiiwa enthawi emuhallenlle yooyeva.”

¹³ Enowa yuullupalleeyo yoonilliiwa wi yoovokhelliwa va ellapo yavatthi, yahaamba omuthwara mutthiyana amuyanre mwaana aamullopwanoolle.

¹⁴ Nave mutthiyanooyo aavahiwa muuphello meelli muullupalli a mpungu wi avavellena oya onipuroni naye na ochipululuni. Wenko aneerokhallawo aweheriwaka wa miyakha miraru owaaka hafu, oohiphariwa ni enowa yuullupalli.

¹⁵ Nave enowa yuullupalleeyo yaamuttaphera mutthiyanooyo maaddi wonanko muhinje wooddalla wi emukuse.

¹⁶ Nave ellapo yavatthi yaamukavihera mutthiyanooyo voohullani owanoni wiwa emirya maaddi mattheene yakhumalle muwano mwa enowa yuullupalleelle.

¹⁷ Enowa yuullupalleelle yaasha murima ni mutthiyanooyo nave evira wi yawane ekhoto ni anaaye oohalla a mutthiyanooyo, yaalla sika athu attheene enathwara malamulo a Mulluku ni ovelleella omboni dda Yesu.

¹⁸ Nave enowa yuullupalleeyo yahiimella vakhwipi va enyanja.