Yawuupullulla 11 - Mawu a Mulluku

Dda amboni eelli a Mulluku

¹ Vano kaavahiwa epango yawooneya wonanko mulingo nave kaalleelliwa wi, “Khawe nave walinge enyumba ya Mulluku ni nikuwa na mukutho nave waweerenge athu enallapella mpammo.

² Koma ohilinge nthato niri otte wa enyumbeeyo kaambiiwa naavelleelliwa wa athu oohimullapella Mulluku, ayo enaawe enyingallelle muzinda waweella wa miyeri 42.

³ Kineerewaarumiha ambonaaka eelli ewanre eziguduli nave eneerollotella wa mallapo 1, 260.”

⁴ Amboni eellaalla sika miteekho miilli dda olivi nave ddoohiyavo enyali piilli ddookhalla vamiitthoni va Apwiya a va ellapo yavatthi.

⁵ Muthu apaalla wi aaphoriihe, munllo onnakhuma muwano mwiwa owoononga adaniiwa. Sika emoddamoddave yeeyo, arive muthu anapaalla waaphoriiha iiphiwe.

⁶ Aakhalla ni olamulello wommaka murimu wi ahirupe va enthawi enallotelliiwa. Aakhallattho ni olamulello wootthattusella aneetuutu amaaddi okhalla nikhame. Aakhallattho ni olamulello woowiiha millilli ddoohiyanahiyana va ellapo yavatthi enthawi enapaalliiwa.

⁷ Vano ambonaayo yamalliha ollotella, enama yawoopiha yookhuma ovenyera ollitini woowallamellesesa wulle eneerowanana ekhoto. Nave enama yawoopiheeyo eneeropambana voowiiphani ambonaayo.

⁸ Nave mitembo ddiwa ddineerophwanyeya ddiri m'misewuni dda muzinda muullupalli, nko Apwiiwa yatthomeyiweewawo vamutandani. Muzindooyo waromiwe wi, “Sodomu apaalle Iguputo.”

⁹ Athu oovenyera o ellapo ddittheddene, malloko mattheene ni ellotello dda athu ni mitundu ddittheddene eneerekowehesesa mitembo dda ambonaayo wa mallapo mararu ni hafu nave kheyaakhullella wi ddivitthiwe mu mahame.

¹⁰ Athu a va ellapo yavatthi eneerohakallalla ekaamba ya okhwa wa amboni eellaalla. Eneereweera ehakallallo ni orumihellana emphaso kaambiiwa anamallotella eellaayo yaanaahoosa athu a va ellapo yavatthi.

¹¹ Koma emanlle mallapo mararu ni hafwaayo, mpweya woovaha okumi woovenyera wa Mulluku waaviddeellelliwattho mwa mitembonndde nave ddaavenya nave athu attheene ayo yoonille yahoova.

¹² Nave anamallotella eellaayo yahiiwa wiithana wa mawu oowella oovenyera oddullu wi, “Waani wuno!” Adaniiwaalle yoonaka yaawella oddullu m'miraponi.

¹³ Enthawi yeeyo vaakhalla echivomerezi va emodda mwa ezigawo khumi dda muzinda ekumuwa nave athu 7,000 yahiiphiwa. Amodda oohallaayo yahoova nave yaatitimiha wunnuwa wa Mulluku Muullupalli.

¹⁴ Otulli waneepiilli woomalla, vano otulli waneeraru oneeroowa naanweene vaava!

Dda nipallapata naneetthanu ni piilli

¹⁵ Nave mungelo aneetthanu ni piilli ahoopa nipallapata naye. Nave kahiiwa mawu oowella ovenyera oddullu oollota wi, “Omwene wa ellapo yavattheella tti wa Apwiihu ni wa Mesiyaaye.* Nave Apwiihu eneerolamulella wa enthawi ddoohimalla!”

¹⁶ Vano attekweene 24 ookeraatthi vamipandoni ddiwa dda omwene vamiitthoni va Mulluku yaakokhora nave emullapella Mulluku

¹⁷ ellota wi, “Apwiya Mulluku Amasiva Mattheene, nyuwaano muriwo ollello nave mwaariwo khalle! Ninnuuthokozani ekaamba yowooniha masivaanyu muullupalli nave mohaamba olamulella!

¹⁸ Athu oohimullapella Mulluku yaasha murima, koma enthawaanyu yoosha murima yoophiya, enthawi yawi ookhwa yeeruziwe. Enthawi yowaathuva oorumeyella, anamallotellaanyu yoophiya, nave athwaanyu attheene, ayo enawoovani, uullupalli ni ang'onong'onweene. Enthawi yoophiya yoowoononga ayo enoononga ellapo!”

¹⁹ Vano enyumba ya Mulluku yooddullu yaahulliwa nave nibokosi na echipangano nahooneya. Nave vaakhalla ettari, ogugudeya wa murimu ni echivomerezi navettho marallalla muullupalli.