Yawuupullulla 10 - Mawu a Mulluku

Dda mungelo ni nibukhu ning'onong'ono

¹ Nave kaamoona mungelo mmodda amasiva awaaka ovenyera oddullu nave ahuruwelliwe m'miraponi navettho mwiisherima waaphenlle omuruni waye. Ekhovaaye yaari wonanko nndduwa ni meto ddaye ddaari wonanko apoto amunllo.

² M'mattani mwaye mwaari nibukhu ning'onong'ono noohulliwa. Nnyallo naye namweto woonnattanatta anyinganlle va enyanja ni nnyallo naye noonyottho anyinganlle vamutundani.

³ Nave aakhuwa ni mawu oowella ayo yiiweyille wonanko winlla wa mikango. Akhuwalle ddiiddo ogugudeya wa murimu waanyakulla otthanu ni opiilli.

⁴ Ogugudeyanko wamaallilliiwa, kaapaalla wi kilembe ddallotiwe mu ogugudeyanko. Koma kahiiwa mawu oovenyera oddullu wi, “Ohimulleelle arive muthu nnddo ogugudeya waneetthanu ni piilli ollotilliiwa nave ohilembe!”

⁵ Nave mungelo oyo kamoonilleemi iimenlle va enyanja ni vamutundani ahiimesa muwonwaaye wa nnattanatta atthoonya oddullu,

⁶ nave allupella mu nnddina na Mulluku, oyo anakhalla enthawi yoohimalla, oyo aphatusalle oddullu, ellapo yavatthi ni enyanja owaaka ddeko ddittheddene ddiri mwemmo. Mungelooyo aallota wi, “Khaviwa vikhalla oselliwa!

⁷ Nave mungelo aneetthanu ni piilli oopa nipallapata naye, vano Mulluku aneerokwakhwaniha yoolingaaye yoovittheya ollikana ni nnddo allotilleeye mwa oorumeyellaaye, anamallotella.”

⁸ Vano kahiiwa mawu oovenyera oddullu ellotiwakattho wonanko vawaamba valle wi, “Khawe wakuse nibukhu noohulliwanne niri m'mattani mwa mungelo olle iimenlle vanyanjani ni vamutundani.”

⁹ Nave kaaya wa mungelooyo kimuveka wi akivahe nibukhu ning'onong'ononno. Olliyooyo aallota wa miyaano wi, “Nikuse nave oniche, nineerowaawa m'murimani mwawo koma muwano mwawo nineeronang'aneya wonanko enwi.”

¹⁰ Kaakusa nibukhu ning'onong'ononno m'mattani mwaye nave kinittakhuna nave muwano mwaka naari nooddiva wonanko enwi. Koma kamiryalleemi, naatthattuwa noowaawa m'murimani mwaka.

¹¹ Vano kaalleelliwa wi, “Ollotelle wiilli dda athu anchichi, mitundu ddinchichi, malloko manchichi, ellotello dda athu ddinchichi ni mamwene manchichi.”