Yawuupullulla 1 - Mawu a Mulluku

Mawu awaamba

¹ Nibukhu nenna tti na ddeko nnddo Yesu Khrisitu uupullullalleeye. Mulluku aamuvaha eyuupullullo yeella wi awoonihe oorumeyellaaye nnddo ddinaphwanella weereya veneva. Khrisitu aamutthoonyihella oorumeyellaaye Yohane voomurumihellani mungelwaaye,

² nave Yohane ootthopoolla ddittheddene oonilleeye. Olla sika ombonaaye woollota dda mawu a Mulluku navettho omboni wa dda Yesu Khrisitu.

³ Oodalisiwa tti muthu oyo aneerenga nibukhu nenna navettho oodalisiwa tti muthu oyo aniiwa ddoollotelliwannddo nave aneera ddilembiwe munibukhunimmu! Vawi enthawi yohaatamella yawi ddeko ddittheddenenndda ddeereye.

Mooni woovenyera wa Yohane oya wa mipingo mitthanu ni miilli

⁴ Ovenyera wa Yohane oya wa mipingo mitthanu ni miilli dda mu echigawo ya Asiya.* Echisomo ni murendelle ddikhalle ni nyuwaano ddoovenyera wa Mulluku oyo arivo ollello, aarivo khalle ni oyo anaawe muhoollo navettho ddoovenyera wa minepa mitthanu ni miilli ddookhalla vahoollo vampandoni woomwenaaye,

⁵ ddoovenyerattho wa Yesu Khrisitu, mboni oororomelleya oyo aari awaamba ovenyihiwa wa ookhwa nave oyottho ari oolamulella a mamwene a va ellapo yavatthi. Olliyooyo annanikonda hiyaano nave ni mukutho wa okhwa waye aanittaphulla hiyaano ovenyera o machimwaahu.

⁶ Nave aaneeriha wi nikhalle omwene wa allupa mukutho oomurumeyella Mulluku Attiitthinnya. Wa Yesu Khrisitu okhalle ntitimiho ni masiva wa enthawi yoohimalla! Amen.

⁷ Ngoonani aneeroowa m'miraponi! Arive muthu aneeromoona naarittho alle yamuhomille. Malloko mattheene a va ellapo yavatthi eneeromwinllella. Sika ddinaakhalle ddiiddo!

⁸ “Mi tti awaambeella ni oomallihella,” eni ddiiddo Apwiya Mulluku Amasiva Mattheene ayo erivo ollello, yaarivo khalle ni oyo enawa muhoollo.

Yawuupullulliwa ni Yohane

⁹ Miyaano Yohane, mwanamunninyu nave mukhwiinyu mu ddoohoosa, mu ovillella ni mu oovollowa mu omwenaaye ekaamba yoomuthwara Yesu. Kaahiyiwa va echilumba ya Patimo kaambiiwa kaallalleya mawu a Mulluku ni ovelleella omboni dda Yesu.

¹⁰ Va nllapo na Apwiya kaahoollelliwa ni Munepa Waweella nave kahiiwa mawu oollotiwa moowella mutulli mwaka wonanko woopa wa nipallapata.

¹¹ Mawaayo yaari awi, “Olembe nnddo onooneewe nave orumihe nibukhunno wa mipingo dda o mizinda mitthanu ni miilli, o Efeso, Smurina, Pergamo, Tiyatira, Sarde, Filadelfiya ni o Laodikeya.”

¹² Kaarukunuwa wi kiwoone enakillotihaayo ttaani nave kahoona ddoohiyavo enyali dda golide dditthanu ni piilli,

¹³ nave variyari va ddoohiyavo enyalinnddo vahiimella awooneya wonanko Mwaana a Muthu, awanre mukanjo woophiya m'manyalloni mwaye navettho amakenlle mukhwamba wa golide va ekhakaddaaye.

¹⁴ Murwaaye ni meehaaye ddaari ddaweella wunchichi wonanko nthoche, miitthwaaye yaari wonanko mallumi amunllo,

¹⁵ manyallwaaye yaari oowala wonanko mukoko wawoosa viikho nave wooreerihiwa ni mawaaye yaari wonanko onyakulla wa maaddi manchichi.

¹⁶ Aatukhulla etheneeri dditthanu ni piilli o nnattanatta naye nave muwano mwaye mwaari nsupada nawiisha nngu ni nngu nookhumellella otte. Ekhovaaye yaari yoowala wonanko nndduwa na otthaana.

¹⁷ Kamoonilleemi, kahiivokhella vatthi vahoollo vaye wonanko muthu ookhwa. Koma olliyooyo ahookolla nnattanatta naye akiphara nave allota wi, “Ohoove! Mi tti awaambeella ni oomallihella.

¹⁸ Ookumoolle tti miyaano! Kaari ookhwa koma vano kookhalla ni okumi woohimalla. Kookhalla ni kiiyi a va okhwa ni a va ellapo ya ookhwa.

¹⁹ Vano onaphwanella wi olembe mu nibukhunna ddeko ddittheddene onooneewe, ddineereya owaakattho dda ddeko nnddo ddineereye muhoollo.

²⁰ Nngu sika ottaphullella wa etheneeri dditthanu ni piilli onooneewe ddiri mu nnattanatta mwaka ni ddoohiyavo enyali dda golide dditthanu ni piilli. Etheneeri dditthanu ni piillinnddo sika oohoollella a mipingo mitthanu ni miilli nave ddoohiyavo enyali dditthanu ni piillinnddo sika mipingo.