Yakobo 5 - Mawu a Mulluku

Waachenjeza athu eeyuuma

¹ Vano nyu, athu eeyuuma, ngakiiwellelleni. Inllani moomoriha miitthori ekaamba ya ddoohoosa ddinaawe wa nyuwaano!

² Eyuumeenyu yohunta nave ddoowara ddanyu ddoochiwa ni enjenjete.

³ Golidaanyu ni silivaanyu ookhalla ni murawa nave murawooyo sika oneerelle omboni wawuuvaanyihani nave oneerewoononga mwiillaanyu wonanko munllo. Mohiitthukumanihella eyuuma mallapo oomallihellaalla.

⁴ Allupa mutteko oohata m'matani mwanyu khamunaallivella. Mwiiwe okhuwa wiwa! Okhuwa wa oohataayo wohiiweya ni Mulluku, Apwiya Amasiva Mattheene.

⁵ Mohiichella va ellapo yavatthi ni eyuuma. Mohiineneviha okhozekella nllapo nawiiphiwa.

⁶ Mooweeruza nave moowiipha athu oolungama, oohiwora wiiteteza.

Ovillella ni ovekella

⁷ Asinnaka ni arokoraka, villellani wonanko muthu oollima ophiyera owa wa Apwiya. Annatiyera wi ezipaso ddaphaama ddooneye m'matani mwaye. Annatiyera moovillella ophiyera ddirupelliwe ni murimu awaamba ni oomallihella.

⁸ Nyuwaanottho munaphwanella wi muvillellekettho. Llipihani murima vawi Apwiya eri vakhuviru ophiyera.

⁹ Asinnaka ni arokoraka, muhillotellaneke ddoonanara wi Mulluku ahiweeruzeni. Ooweeruza ohiimella vamullakoni.

¹⁰ Asinnaka ni arokoraka, upuwellani anamallotella ayo yaallotille mu nnddina na Apwiya. Muweere yaalla wonanko echisanzo ya ovillella naari mu ddoohoosa.

¹¹ Ninaweera oodala kaambiiwa yaavillella. Mwahiiwa dda ovillella wa Yobu navettho munnadduwella mmo eerelliweeye ni Apwiya voomallihella. Vawi Apwiya aaddalla ni ethakaraka ni oreera murima.

¹² Asinnaka ni arokoraka nave ohiyana ni ddittheddene, muhillupelleke mwaasimikizellaka ello. Muhillupelleke mooromolla oddullu apaalle ellapo yavatthi apaalle erive ello. Mweereke “ee” vawaakhullellani nave mweereke “iyaayi” mwaakhootaka wi muhimorelle mu echiweruzo ya Mulluku.

¹³ Ethiyo ookhallavo mmodda a nyuwaano ari mu ddoohoosa? Avekelle. Ethiyo ookhallavo mmodda a nyuwaano anahakallalla? Iipe ddoomutitimiha Mulluku.

¹⁴ Ethiyo ookhallavo mmodda a nyuwaano anavoriiwa? Awiithane attekweene a mpingo* nave evekelle ni omuzoza makhura mu nnddina na Apwiya.

¹⁵ Nivekello nenna naweeriwa mu echikhulupililo nineeromuchiriha oovoriiwooyo. Apwiya eneeromuvenyiha nave aari achimwalle, aneerokhululukelliwa.

¹⁶ Sika vano muwululellaneke machimwaanyu nave muvekellaneke wi muchirihiwe. Nivekello na muthu oolungama ninnakhalla namasiva nave ninnaphara mutteko.

¹⁷ Namallotella Eliya aari muthu wonanko hiyaano nave aavekella moollipiha wi murimu ahirupe nave murimooyo khaarupalle va miyakha miraru ni hafu.

¹⁸ Aavekellattho nave murimu aarupa wi ellapo yimme ezipaso ddiwa.

¹⁹ Asinnaka ni arokoraka, mmodda a nyuwaano ahollowa ohiya yawoona nave mukhwaaye amuhokollosa,

²⁰ mudduwelle wi arive muthu oyo anamuhokollosa oochimwa mu ettillaaye yoohollowa, aneerovullusa okumi wa muthooyo wuukhwaani nave machimo manchichi eneerokhululukelliwa ekaamba ya olliyooyo.