Yakobo 4 - Mawu a Mulluku

Waattana ni ellapo

¹ Ethiyo ekhoto ddinavenyera wuuwi? Okangana variyari vanyu onavenyera wuuwi? Ethiyo khaddinavenyera mu minkhella ddanyu nnddo ddinawana m'mwiillini mwanyu?

² Munnapaalla ddeko koma ddinnuuramani, sika munniipha. Munnakhallella ehache ddeko koma khamunawora oddiphwanya, sika munnakangana ni owana. Khamunaphwanya nnddo munapaalleenyu kaambiiwa khamunamuveka Mulluku.

³ Nave mwaveka khamunaakhella kaambiiwa munaveka moonanara. Ddooveka ddanyu munapaalla ophariha mutteko va ddeko ddawuuhakallallihani.

⁴ Nyu athu oohiroromelleya! Khamunadduwella wi waattana ni ellapo yavatthi tti wiitana ni Mulluku? Athu enapaalla waattana ni ellapo yavatthi enaddiitaniha weekhiiwa ni Mulluku.

⁵ Muheese wi khamuri yawoona mu mawu a Mulluku awi, “Munepa oyo Mulluku ahiyalleeye mwa hiyaano tti wooddalla ni minkhella ddamasiva.”

⁶ Koma echisomo ya Mulluku tti yuullupalli wunchichi. Sika mawu a Mulluku eni, “Mulluku annaahiiha awiitukhulla koma annaweerella echifundo awiiyeviha.”

⁷ Sika vano mwiivelleelle wa Mulluku. Mullipaneke ni Satana nave aneerewuuthawani.

⁸ Mumwaatamelleke Mulluku nave olliye aneerowaatamellani. Muddeellihe, nyu athu oochimwa! Ellihani mirima ddanyu, nyu athu a mirima miilli!

⁹ Khallani ni ethakaraka, inllani moomoriha miitthori. Ottheya wanyu otthattuwe winlla, ohakallalla wanyu otthattuwe okhupanya!

¹⁰ Mwiiyevihe nyookha vamiitthoni va Apwiya nave eneerowunnuwihani.

Muhiweeruzeke ookhulupilila akhwiinyu

¹¹ Asinnaka na arokoraka, muhillotellaneke ddoonanara. Oyo anallota ddoonanara dda ookhulupilila mukhwaaye apaalle omweeruza, anallotella ddoonanara moovaanyana ni malamulo komattho anaweeruza malamulo. Nave waweeruza malamulo, khorittho aweera malamulo koma aweeruza.

¹² Mulluku sika mmoddave yooyo oovaha malamulo ni aweeruza. Olliye yeekhaaye ttuuwora ovullusa ni woononga. Weyaano tti aani wi omweeruzeke mukhwaawo?

Oohikota

¹³ Vano ngakiiwelleni, nyu munallota wi, “Ollello apaalle osiisello nineeroya omuzindani mmodda namallewo muyakha nikullihaka malonda wi niphwanye makobiri manchichi.”

¹⁴ Khamunadduwella wi osiisello okumaanyu onaakhalle mwawiidde! Nyu muri wonanko mwiisi, oyo onooneya enthawi yooyeva nave vano opallalleya.

¹⁵ Munapaalleya mulloteke wi, “Apwiya yaakhullella nineerokhalla ni okumi nave nineereweera yawi yoori yawi yoori.”

¹⁶ Koma vano munnakota ni wiitukhulla. Wiitukhulla wenko tti woonanara.

¹⁷ Muthu anadduwella yaphaama yawi eere koma aheera, yooyo tti oochimwa.