Yakobo 3 - Mawu a Mulluku

Mitteko dda nllumi

¹ Asinnaka ni arokoraka, anchichi a nyuwaano muhikhalle ahuddihi kaambiiwa hiyaano ahuddihi nineereweeruziwa mookhwaranya athu amodda.

² Attheene ninnachimwa va ddeko ddinchichi. Koma muthu ahinachimwa voollotani, yooyo tti aphaama wunchichi navettho annawora wiihiiha mwiillaaye muttheene.

³ Niniiyaatthi mwanamukoko muwano mwa kavalo wi aniiwellelleke nave ninnookollella mwiillaaye muttheene.

⁴ Onani esitima ddam'maaddini. Naari tti dduullupalli navettho ddinakakhiwa ni ephevo ddamasiva, ddinookollelliwa ni yawookollella eng'onong'ono, orive weko anapaalleeye mullupa awookollella.

⁵ Naari nllumittho tti echiwalo eng'onong'ono koma ninniitukhulla wunchichi. Ngoonanittho wunnuwa wa otthako oyo onahelliwa ni mwanamunllo.

⁶ Sika nllumi niri wonanko munllo. Nllumittho nookhalla ni masiva oonanara, ninakhalla m'mwiillini mwahu ni oripiha mwiilli muttheene. Ninnakhariha munllo mookumaahu muttheene waambeella oyariwa ophiyera okhwa nave ninnavalla munllo o gehena.

⁷ Arive muthu annawora oweta orive mulloko wa enama, wa epallame, wa ddawaapadda ni ddamunyanja nave ndithu annaddiweta ddenndda.

⁸ Koma khaavo muthu anawora oweta nllumi. Tti noonanara, noohookollelleya nave nooddalla ni nttipwi nawiipha.

⁹ Ni nllumi ninnaathokozana Apwiya ayottho eri Attiitthiihu navettho ni nenno ninnaatembelelana athu ayo Mulluku aaphatusalleeye moophwanaphwana ni olliye.

¹⁰ Mawu oothokoza ni ootembelela enakhuma muwano mmoddamodda mwemmo. Asinnaka ni arokoraka, nndda khaddinaphwanella wi ddeereyeke.

¹¹ Khaavo neetuutu mmoddave yooyo anakhumiha maaddi oowaawa ni maaddi ooddiva.

¹² Asinnaka ni arokoraka, muteekho wanamukuyu khoniimma ezipaso dda olivi apaalle muteekho wa mpesa wimma ezipaso ya namukuyu. Mwawi ddiiddattho neetuutu amwiinyu khawora okhumiha maaddi ooddiva.

Ezeru ddoovenyera oddullu

¹³ Ttaani a nyuwaano ari ni ezeru ni wiiwesesa? Oonihe ddenndda ni makhallellwaaye aphaama nave mitteko ddaye mu ezeru ddoomaalleya.

¹⁴ Koma mwakhalla ni ehache yuullupalli ni wiikonda m'murimani mwanyu, muhikoteke ni ovaanyihana ni yawoona voollotani ddawoottha.

¹⁵ Ezeru ddenndda khaddinavenyera oddullu koma tti dda vatthi vaava, ohiri ddoovenyera wa Munepa Waweella koma wa minepa ddoonanara.

¹⁶ Vawi vano vakhalla ehache ni wiikonda, vinnakhallattho waanganyereya ni ddoonanara ddoohiyanahiyana.

¹⁷ Koma ezeru ddoovenyera oddullu ddinneeriha vawaamba okhalla aweella, waneepiilli amurendelle, vatulli viwa oomaalleya, awiiwellella phaama, ooddalla echifundo ni a ezipaso ddaphaama ddoohikondella nave ddoohoottha

¹⁸ Nave echipaso ya echilungamo ennamiddiwa mwamurendelle wi yaapindulelle ayo eneera murendelle.