Yakobo 2 - Mawu a Mulluku

Vihikhalle okondella variyari va athu

¹ Asinnaka ni arokoraka vawi munnaakhulupilila Apwiihu Yesu Khrisitu, Apwiya antitimiho, muhinakondellaka variyari va athu moollikana ni wooneya wiwa.

² Vawi muthu eeyuuma oowara emphete ya golide ni yoowara yooreera avollowa mootthukumanella mwanyu nave muthu oohoowa ni oowara matapwata avollowattho,

³ vano muhimuvahe olemu a eyuumoolle voollotani wi, “Nyu keraatthini vaphaamamva.” Navettho muhimulleelle oohoowoolle wi, “We iimella mvo apaalle keraatthi vatthimva vakhuviru ni manyallwaaka.”

⁴ Weera ddiiddo, wenkothi tti okondella variyari va nyookha nave echiweruzwaanyu enavenyera m'maganizoni oonanara.

⁵ Ngiiwani, asinnaka ni arokoraka ookondiwa! Mulluku ahaatthoolla athu oohoowa a mu ellapo yavattheelle wi ekhalle eeyuuma mu echikhulupililo navettho wi yaakhelle omwene oyo aalonjezilleeye wa ayo enamukonda.

⁶ Koma nyuwaano munnamuvevulla muthu oohoowa. Ethiyo athu eeyuuma khehiyo ayo enuuhoosani, khehiyo ayo enuukusellani o nthato namillatu?

⁷ Ethiyo khehiyo ayo enallotella epewe nnddina na ntitimiho nno munaromolliweenyuna?

⁸ Vano munneera phaama mwaarimi muthwaraka malamulo a omwene ayo enaphwanyeya mu mawu a Mulluku awi, “Omukondeke mukhwaawo wonanko mmo oniikondelleewe weekha.”

⁹ Nave mwaakondellaka munnachimwa nave munnavaanyihiwa ni malamulo wi nyuwaano tti oochimwa.

¹⁰ Oyo anathwara malamulo mattheene koma apwesa lamulo nimodda, oopwesa malamulo mattheene.

¹¹ Vawi oyo aallotille wi, “Ohinararuwa,” aallotattho wi, “Ohiiphe.” Nave waahiraruwa koma wiipha, woopwesa malamulo.

¹² Llotakani nave erakani wonanko athu ayo enaaweeruziwe ni malamulo oottaphulla.

¹³ Vawi muthu aweeruza moohikhalla ni echifundo nayeenettho Mulluku aneeromweeruza moohikhalla ni echifundo. Koma oyo ari ni echifundo khanoova echiweruzo ya Mulluku.

Echikhulupililo ni mitteko ddiwa

¹⁴ Asinnaka ni arokoraka, yoophuravo tti tini, muthu allota wi, “Kookhalla ni echikhulupililo,” koma ahinna mitteko. Ethiyo echikhulupililo yeeyo ttuuwora omuvullusa?

¹⁵ Mwanamunno apaalle murokoriyo nllapo nimodda aahikhalla ni yoowara apaalle yoocha,

¹⁶ nave mmodda a nyuwaano allota wi, “Khawe ni murendelle wiikhuneelle ni ovona,” muhimuvahille ddeko ddoopaalleya vamwiillini vaye, yoophuravo tti tini?

¹⁷ Mwawi ddiiddattho, echikhulupililo yoohikhalla ni mitteko, tti yookhwa.

¹⁸ Koma muthu mmodda annallota wi, “Muthu mmodda ookhalla ni echikhulupililo nave mmodda ookhalla ni mitteko. Vano koonihe miyaano echikhulupililo yoohikhalla ni mitteko nave miyaano kineerowooniha echikhulupililwaaka yoovenyera m'mittekoni mwaka.”

¹⁹ Weyaano onnakhulupilila wi Mulluku tti mmoddave, onneera phaama. Naarithi minepa ddoonanara ddinnakhulupililattho nave ddinnatthukumella.

²⁰ Ethiyo onnapaalla omboni wawi echikhulupililo yoohikhalla ni mitteko khenna mphuro, muthu ookarangeya we?

²¹ Ethiyo Abrahamu nikhollo nahu kheeriwe oolungama ni mitteko ddaye, valle aakhullenlleeye omuheraatthi mukutho mwanaye Isaki vanikuwani?

²² Vano wohoona wi echikhulupilwaaye yaheereya nimodda ni mitteko ddaye vawi echikhulupilwaaye yaheeriwa yaphaama ekaamba ya mitteko ddaye.

²³ Nave mawu a Mulluku yaakwakhwana awi, “Abrahamu aamukhulupilila Mulluku nave ekaamba ya echikhulupilwaaye, Mulluku aamwaakhullella wi tti oolungama.” Sika Abrahamu aheeriwa mukhwaaye a Mulluku.

²⁴ Sika mohoona wi muthu annaakhullelliwa wi tti oolungama ekaamba ya mitteko ddaye ohiri ni echikhulupilwaayeve.

²⁵ Yaari emoddamoddave yeeyo ni Rahabu, huloolle. Aheeriwa oolungama vamiitthoni va Mulluku ekaamba ya mitteko ddaye, valle awakhenlleeye oorumiwa a o Israele nave aakavihera othawa vooyeellani ettilla emodda.

²⁶ Sika vano, mwiilli woohikhalla ni munepa tti wookhwa, mwawi ddiiddattho echikhulupililo yoohikhalla ni mitteko tti yookhwa.