Yakobo 1 - Mawu a Mulluku

¹ Ovenyera wa miyaano Yakobo, oorumeyella a Mulluku ni a Apwiya Yesu Khrisitu. Kinaavaha mooni athu a Mulluku a malloko khumi ni meelli yaayo yapallalleyelle va ellapo yavatthi ettheene.

Echikhulupililo ni ezeru

² Asinnaka ni arokoraka, muhakallalleke mwaaweesiwaka moohiyanahiyana,

³ vawi munnadduwella wi weesiwa wa echikhulupilwaanyu onnawiiha ovillella.

⁴ Ovillella wonngu waapharaka muttekwiiwa phaama muneerowaraalla wunchichi mu echikhulupililo ohirama erive ello.

⁵ Nave mmodda a nyuwaano aahikhalla ni ezeru, avekelle wa Mulluku. Aneerewaakhella vawi Mulluku annaavaha athu attheene ni murimaaye muttheene.

⁶ Nave aveke ni echikhulupililo moohikayikella. Vawi oyo anakayikella ari wonanko mafunde a mu enyanja ayo enakakhiwa ni ophikirisiwa ni ephevo.

⁷ Muthu yoolla aheeseke wi aneerewaakhella erive ello ovenyera wa Apwiya,

⁸ vawi yoolla tti a mirima miilli ni ookayikella va ddeko ddittheddene aneereeye.

Ohoowa ni eyuuma

⁹ Ookhulupilila oohoowa ehakallalleke vawi Mulluku annawunnuwiha.

¹⁰ Nave ookhulupilila eeyuuma enapaalleya wi ehakallallekettho Mulluku aavaha murima wawiiyeviha vawi eneeromalla mwawaakuva wonanko malluwa.

¹¹ Vawi nndduwa ninnakhuma ni oviha wiwa nave ninnuumiha ddoomella, malluwaaye ennamora navettho oreera wiwa onnamalla. Mwawi ddiiddattho muthu eeyuuma aneeronyaalla apharaka mutteko moohakallalla.

Weesiwa

¹² Oodalisiwa tti yaayo enavillella vaweesiwani kaambiiwa yapambana weesiwanko, eneerewaakhella emphaso yookumi eyo Mulluku alonjezilleeye wa athu oomukonda.

¹³ Muthu eesiwaka ahilloteke wi, “Kinneesiwa ni Mulluku.” Vawi Mulluku khanawora weesiwa ni ddoonanara nave olliyooyo khanamweesa arive muthu.

¹⁴ Koma athu attheene eneesiwa ni minkhella ddiwa ddoonanara nnddo ddinaakopa ni waaphara.

¹⁵ Vano minkhella ddinakhalla wonanko ddinnakusa erukullu nave ddinnayara machimo. Nave machimwaayo yunnuwa, ennayara okhwa.

¹⁶ Muhoottotthiweke asinnaka ni arokoraka ookondiwa.

¹⁷ Erive emphaso yaphaama ni yooreera wunchichi enavenyera oddullu, ddinakittha wa Attiitthiihu ayo yaphatusalle ddoowala ddittheddene ddooddullu, oyo ahinatthattuwa nave owala wiwa khonatiithiwa.

¹⁸ Moollikana ni opaalla waye mwaneena, aanivaha okumi oweella mwa mawaaye awoona wi hiyaano nikhalle wonanko ezipaso ddawaamba dda ddoophatusiwa ddaye.

Wiiwa ni weera

¹⁹ Upuwellani nndda, asinnaka ni arokoraka ookondiwa. Arive muthu akhalle awaakuva wiiwa, awiithaallella ollota nave oohaakuva osha murima.

²⁰ Vawi osha murima wa muthu khonahoollella o echilungamo ya Mulluku.

²¹ Sika muhiye erive makhallello oonanara navettho erive machimo. Akhellani mwawiithaalla mawu yaayo yaalliwe ni Mulluku m'mirimani mwanyu vawi yaayo sika enaawore wuuvullusani.

²² Iwellellani ni weera mawaaye, muhiilleke nyookha vawiiwanive mawaayo.

²³ Vawi muthu aawiiwaka mawu ahineera aniweeyennddo, ari wonanko muthu awiiwehera ekhovaaye vanigalasini,

²⁴ nave iiwehera ekhovaaye, avenyavo, annatiwalla wi anooneya mwawiidde.

²⁵ Nave oyo anaakhella malamulo aphaama wunchichaalla, oovaha ottaphuwa, aawaathwaraka, aahikhalla awiiwa ni ootiwalla nave aweerana mutteko aneerodalisiwa mu ddaweera ddiwa.

²⁶ Muthu mmodda addeesa wi tti oomullapella Mulluku, ahinamaka nllumi naye, omullapella waye Mulluku tti woohikhalla ni mutteko nave aniilleka yeekhaaye.

²⁷ Ollapella wawoona ni waweella vamiitthoni va Mulluku ni Attiitthiihu tti waapwatha akhwaadduni ni anaamukhwelle mu ddoohoosa ddiwa navettho wiivaanyiha weekhaawo wi ohiripihiwe ni dda va ellapo yavatthi.