Tito 3 - Mawu a Mulluku

Makhallello a ookhulupilila

¹ Owuupuseke ookhulupilila wi yiiyeviheke vamiitthoni va attekweene ni oolamulella nave ewiiwellelleke. Navettho ekhalleke ookhozeka ophara mitteko ddaphaama ddittheddene.

² Waalleelle wi ehilloteke epewe koma ekhalleke amurendelle ni awaattaneya nave yooniheke omaalleya wa athu attheene.

³ Vawi hiyaanottho khalle naari ookarangeya, oohiiwellella, oohollosiwa, akaporo a minkhella ni ddoohakallalliha ddoohiyanahiyana. Nakhallella weera ddoonanara ni ehache naari awiitana ni oonyambusana mmodda ni mukhwaaye.

⁴ Koma Mulluku Oovullusaahu uupullullalleeye oreera murima ni echikondaaye,

⁵ aanivullusa ohiri ekaamba ya echilungamwaahu koma ekaamba ya echifundwaaye. Aanivullusa hiyaano oweella mwa obadiziwa wa oyariwa wanaanweene nave aanitthattusa anaanweene oyeella mwa Munepa Waweella.

⁶ Mulluku aanimiminella Munepa Waweella mwawaata oweella mwa Yesu Khrisitu Oovullusaahu.

⁷ Sika wi mwa echisomwaaye nilungamihiwe ni Mulluku navettho wi naakhellena okumi woohimalla oyo ninatiyereehu.

⁸ Mawu yaalla tti oororomelleya. Kinapaalla wi ollipihelle ddeko ddenndda wi oomukhulupilila Mulluku yiivelleelleke vaweerani mitteko ddaphaama. Nndda tti ddaphaama ni ddoopinduliha wa arive muthu.

⁹ Koma oheerekena ovaanyana wookarangeya va ntthopoollo na manddina a makhollo ni okangana ni ovaanyana dda malamulo vawi ddenndda tti ddoohikhalla ni mutteko ni ddoohipinduliha.

¹⁰ Mumuchenjeze wookwakhwana wiilli muthu awaambiha omwareya koma aahiiwellella muhimpwatheke muthooyo.

¹¹ Munnadduwella wi muthu awi ddiidda tti oonanara ni oochimwa nave anaddiipa mullatu yeekhaaye.

Malamulo oomalliha

¹² Kamurumiha Aritema apaalle Tikiko wenko weeseese owa wa miyaano o Nikopoli kaambiiwa kinaganiza wi kinaakhalle wenko eyitta.

¹³ Weeseese omukavihera Zena, mullupa a malamulo ni Apolo wi etimulle va olendwiiwa nave woonesese wi yookhalla ni erive ello enapaalleya.

¹⁴ Athwaahu ehuddere wiivelleella va mitteko ddaphaama vookaviherani va ddoopaalleya wi ehikhalleke oohimma ezipaso.

¹⁵ Attheene ayo enakhalla ni miyaano ennuuvaha mooni. Ovelleelle mooni wa ayo enanikonda hiyaano mu echikhulupililo. Echisomo ekhalle ni nyuwaano attheene.