Tito 2 - Mawu a Mulluku

Ehuddiho yawoona

¹ Nave weyaano ohuddiheke moollikana ni ehuddiho yawoona.

² Waalleelle allopwana awuulluvalla wi ekhalleke oohilezela, eezeru, awiihiiha, oollipihella mu echikhulupililwiiwa, mu echikondi navettho mu ovillella.

³ Waalleelle atthiyana awuulluvalla mwawi ddiiddattho wi makhallellwiiwa ekhalle aweella. Ehaalloteke akhwiiwa, ehilloteke ddoonanara dda akhwiiwa apaalle okhalla akaporo oowirya ottheka. Enapaalleya wi ehuddiheke ddaphaama,

⁴ wi mwawi ddiidda yaahuddiheke atthiyana ang'onong'ono waakonda amamuniwa ni aniiwa,

⁵ wi ekhalleke awiihiiha ni aweella, oowehera nibanja niwa phaama ni owaavaha olemu amamuniwa wi ahikhallevo oonyaambusa mawu a Mulluku.

⁶ Mwawiiddiiddattho waasimikizelle allopwana ang'onong'ono ekhalleke awiihiiha.

⁷ Weyaano okhalleke echisanzo ya makhallello aphaama mu ddittheddene. Ehuddihwaawo ekhalleke yawoona navettho ohuddiheke moolemu.

⁸ Mawaawo ekhalle awoona wi ehivaanyihiwe. Vano wi adanaawo ewulliwe muru nave ehikhallena yoonanara yoonillotella hiyaano.

⁹ Waalleelle akaporo wi ewiiwellelleke apwiiwa navettho yaahakallalliheke mu ddeko ddittheddene. Ehaavaanyiheke,

¹⁰ apaalle owiiyera. Koma enapaalleya yooniheke wi tti aphaama ni oororomelleya wi yariihe ehuddiho ya Mulluku oovullusaahu mu erive ello.

¹¹ Vawi echisomo ya Mulluku yohooneya wi yaavulluse athu attheene.

¹² Echisomweella enanihuddiha hiyaano ohiya makhallello oochimwa navettho minkhella dda ellapo yavatthi nave wi nikhalle awiihiiha, oolungama ni oomulluku mu ellapweella.

¹³ Nooddalla ni otiyera ninatiyereehu nllapo noodala, wooneya wa ntitimiho na Mullukwaahu muullupalli ni Yesu Khrisitu Oovullusaahu.

¹⁴ Ahiivelleella yeekhaaye mu nipuro na hiyaano wi anoopolle hiyaano o machimo mattheene nave wi aneerihe wi nikhalle aweella navettho wi nikhalle aaye ayo mirima ddiwa ddiri va mitteko ddaphaama.

¹⁵ Ohuddihe ddeko ddenndda navettho opharihe mutteko olamulellwaawo vawaallipihani murima ni waahumullulla. Vihikhalle muthu anuuvevulleke.