Rute 4 - Mawu a Mulluku

Bowazi anamutthella Rute

¹ Bowazi aaya akeraatthi vatthi vanipuroni nootthukumanellavo vamullakoni va etawoneeyo. Vano aamoona mbalaayembalaaye amwaakaayoolle aphiyaka. Sika Bowazi aamulleella wi, “Mukhwaaka ngahapuwella wuno, okeraatthi mva.” Muthoolle aahapuwa akeraatthi.

² Aawiithanattho attekweene a nthato khumi aalleella wi, “Keraatthini mva.” Alliwaayo yaakeraatthi.

³ Vano aamulleella mbalaayoolle wi, “Naomi oyo awiille ovenyera o ellapo ya Mowabu, anakulliha emata eyo yaari ya muha Elimeleki, mbalaahu.

⁴ Sika kooganiza ddawuulleella ddenndda wi weyaano okulle emateeyo vamiitthoni va attekweene. Waapaallaka oyikulla, oyikulle. Koma waahipaallaka okilleelle wi kidduwelle vawi khaavo mmodda koma weyaanove nave vatulli va weyaano tti miyaano.” Nave muthooyo aallota wi, “Kineerokulla emateeyo.”

⁵ Koma vano Bowazi aamulleella wi, “Nllapo nenno onaakulleewe emata wa Naomi, oneeromukusattho Rute, Mmowabu, mutthiyana olle mamune akhwille. Vano aayare anamwani wi nnddina na muha mamunooyo nuupuwelliweke nave emateeyo ekhalle yoohallana ya nibanjanno.”

⁶ Vano mbalaayooyo aallota wi, “Ngiwora woopolla emateeyo wi ekhalle yaaka, woova wi kineerowoononga yoohallanaaka nave miyaano ni a munibanjani naka nineerohoowa. Mukulle nyuwaano, miyaano ngiwora.”

⁷ Mallapo yaayo athu yaawoopollihanaka apaalle waakakhana ddeko ni mukhwaaye, ddakhalla ddawi, aanarulla esapatwaaye emodda amwinnya mukhwaayooyo. Mu Israele, yeella sika yaari ettilla yawooniha wi athwaayo ahiiwanana.

⁸ Sika mbalaaye amulleelleeye Bowazooyo wi, “Mukulle nyuwaano.” Aarulla esapatwaaye amwinnya Bowazi.

⁹ Vano Bowazoolle ahaalleella attekweene ni athu attheene yaari vaavwaayo wi, “Attheenenyu tti amboni ollello wi miyaano kookulla wa Naomi ddeko ddittheddene nnddo ddaari dda ayo yakhwille, Elimeleki, Kiliyoni ni Maloni.

¹⁰ Koomukusattho Rute a o Mowaboolle, mwaara a muha Maloni wi akhalle mwaaraka. Nave aayare anamwani wi emateeyo ekhalle yoohallana ya nibanja na ookhooyo. Nave wi nnddina naye nihitiwalliwe variyari va abalaaye ni athu oowaniwa. Nyuwaano attheene ollellova tti amboni.”

¹¹ Athu attheene yaari vamullakoni valle ni attekweenaalle yaallota wi, “Ee, hiyaano tti amboni. Mutthiyana oyo onaamutthelleewe, Apwiya emweerihe wi akhalle wonanko Rakele ni Leya, atthiyana ayo yamuyarele Yakobo anamwani anchichi. Weyaano okhalle muthu eeyuuma mu nlloko na Efurata nave okhalle muthu oovuwa mu etawoni ya Betelehemu.

¹² Anamwani ayo Apwiya enaawuuvahiiwa mwa mutthiyana yoolla, emake nibanja nawo woona na Perezi, mwaana a Yuda ooyariwa mwa Tamara.”

Edduullu dda Bowazi

¹³ Sika Bowazi aamutthella Rute nave Apwiya yaamudalisa Rutooyo wawi aakhalla ni erukullu amuyara mwaana aamullopwana.

¹⁴ Vano atthiyana a mu Betelehemu yaamulleella Naomi wi, “Etitimiheye Apwiya ayo ehuuhiyalleni nyookha wi muhikhalle ni mbalaanyu. Nnddina na mwaanooyo nivuwe mu Israele.

¹⁵ Mwaanooyo aneerewuuhakallallihani nave aneerewuupharani muwono mwaawuulluvallaka. Ddawoona mvokohaanyu oyo anuukondani, oyo uuyarelleni mwaana tti ookhwaranya anamwani aallopwana atthanu ni eelli.”

¹⁶ Naomi aamutukhulla mwaanooyo amukhupaarella nave anamullella.

¹⁷ Atthiyanaalle yaallalleya wi, “Mwaana aamullopwana ooyariwa wa Naomi.” Nave yaamuvaha nnddina nawi, Obedi. Olliyoolla aakhalla attiitthinnya a Yese, oyo aari attiitthinnya a Davide.

^18-22 Vano alla tti makhollo a Davide: Yese, Obedi, Bowazi, Salomoni, Nashoni, Aminadabu, Ramu, Hezironi ni Perezi.