Rute 3 - Mawu a Mulluku

Rute anakumana ni Bowazi

¹ Nllapo nimodda Naomi aamulleella Rute wi, “Tti woopaalleya wi otthelliwe wi omwaashe awuupwatha ni awuuteteza.

² Bowazi, oyo allupa mutteko aatthiyanaaye ayo waariiwena, tti mbalaahu. Mahiiyu vano olliye anaakhalle amuuputhaka tirigu onipuroni naye noomuuputhella.

³ Vano ohape wiihelle makhura awunkhella phaama nave oware ddoowara ddaphaama, oye onipuroni nawuuputhellanko. Koma Bowazi ahiwoone ophiyera amallihalle ocha ni owirya.

⁴ Aayaaka wookonatthi, wamuwehesese mvo anakonaattheeye. Wakhunuulle yawiikhuneellaaye omanyalloni waye oveka echitetezo nave wakonaatthi vakhuviru ni manyallwaaye. Vano olliyooyo aneerewuulleella yawi weere.”

⁵ Rute ahaakhulla wi, “Kineereweera ddittheddene mullotilleenyunnddo.”

⁶ Sika Rute aayaawo onipuroni naye noomuuputhella wulle nave aheera moollikana ni mmo akogwawaayaalle yamulleellelliiwa.

⁷ Bowazi amallihalle ocha ni owirya, aari oohakallalla nave aaya akonaatthi vakhwipi mvo vuukelliwe tirigu. Vano Rute aawa moohirumiha mukhito akhunuulla manyallo a Bowazi, akonaatthi vaavo.

⁸ Vano variyari va mahiiyu Bowazi aarurumuwa, arukunuwa nave aamoona mutthiyana akonaatthille omanyalloni waye.

⁹ Vano aamukoha wi, “We ori aani?” Mutthiyanooyo ahaakhulla wi, “Mi tti Rute, mullupa mutteko aamutthiyanaanyu. Pepaani, wakhalla wooworeya mukikhuneelle ni yawiikhuneellaanyu kaambiiwa nyuwaano tti mbalaaye a muha mamunaka nave munaphwanella mukipwatheke vookitthellani.”

¹⁰ Bowazi aallota wi, “Apwiya yuudalise, namwalli. Ddaphaama nndda weerilleewe ollello ddookhwaranya nnddo weerilleewe vawaambanndde wa akwegwawaawo vawi khokelle wa asombwe, oohoowa apaalle eeyuuma.

¹¹ Vano ohikhupanye, namwalli, kineeroweerella ddittheddene onaavekeewe kaambiiwa arive muthu mutawonimmu annadduwella wi weyaano tti mutthiyana aphaama.

¹² Ddawoona miyaano tti mbalaaye a muha mamuno koma ookhallavo mbalaayebalaaye okikhwaranya miyaano.

¹³ Kona weewuno mahiiyu vano. Ohinase olliyooyo uutthella ddaphaamave koma ahipaallaka, miyaano kineerewuutthella. Kinimallupella vamiitthoni va Apwiya Ookumi. Kona ophiyera ohinase.”

¹⁴ Sika Rute aakona omanyalloni wa Bowazi ophiyera ohinase. Koma aavenya epiphi ehinamalle kaambiiwa Bowazooyo khaapaalla wi athu edduwelle wi mutthiyanooyo aawa onipuroni naye noomuuputhella tirigu wulle.

¹⁵ Vano Bowazi aamulleella Rute wi, “Waana wuno yawiikhuneella owanreeweeyo, waanddellelle vatthi.” Rute ahaanddellella yawiikhuneelleeyo nave Bowazi aahavullellavo makilogaramu 20 a tirigu, amureya Rutoolle. Vano Rute aavenyawo avollowa mu etawoni mulle.

¹⁶ Aphiyalle wa akogwawaayaalle, yaamukoha wi, “Weetillewo mwawiidde mwanaka?” Rute aamulleella ddittheddene nnddo Bowazoolle eerilleeye.

¹⁷ Nave aallota wi, “Ookivaha makilogaramu 20 a tirigu akilleella wi, ‘Ohihokollweelle wa akogwawaawo mattave’ ”

¹⁸ Akogwawaayaalle yaamulleella wi, “Tiyeraka mwanaka, noone mmo ddeko ddinaakhallelliiwa. Kaambiiwa muthooyo khahiyera vaavo koma aneeroddipotokosa ddennddo ollello vaava.”