Rute 2 - Mawu a Mulluku

Rute anuurulla m'matani mwa Bowazi

¹ Naomi aakhalla ni mbalaaye eeyuuma yinchichi, nnddina naye Bowazi a mu nibanja na muha mamunoolle Elimeleki.

² Nllapo nimodda Rute aamulleella Naomi wi, “Mukaakhullelle wi kiye kamuurulle tirigu omata wa arive muthu oyo anaakeerelle echifundo.” Naomi aamulleella wi, “Khawe mwanaka.”

³ Sika Rute aatimulla aya wawuurulla m'matani, aathwaraka vatulli athu ayo yahata. Vano mwa ekaraaye aaphiya m'matani mwa Bowazi oyo aari a munibanjani na Elimeleki.

⁴ Vihinallekelle Bowazi aaphiya ovenyera o Betelehemu nave ahaallochella athu yahataalle voollotani wi, “Apwiya yuudaliseni!” Alliwa yahaakhulla wi, “Apwiya yuudaliseni nanyeene!”

⁵ Vano Bowazi aamukoha kapitawaaye oyo aawehera athu yahataalle wi, “Ethiyo mutthiyanoolla tti a nibanja niivi?”

⁶ Kapitawaayooyo ahaakhulla wi, “Mutthiyanoolla tti Mmowabu oyo awiille ni Naomi ovenyera o ellapo ya Mowabu.

⁷ Olliyoolla aakiveka wi, ‘Pepaani, mukaakhullelle kimuurulleke tirigu m'matanimmu vowaathwarani vatulli athu enahataalla!’ Sika ookhalla uurullaka ovenyera ohinase ophiyera enthawi yeella. Iithuwalle enthawi yooyevave vamuuthuuchini.”

⁸ Vano Bowazi aamulleella Rute wi, “Ngakiiwe, namwalliwe, ohinaya wuurullaka o emata emodda, ohinahiya emata yeella koma waathwareke vatulli moowaatamella allupa mutteko aatthiyanaakaalla.

⁹ Oweheke emata enahatiweella nave waathwareke vatulli. Kohaalleella asombwaayo wi ehuukatamiheke. Vano waavolliwaka nthona oyeeke wawiryeke maaddi vaminoni dda maaddi ayo asombwaayo enaarikiiwa.”

¹⁰ Vano Rute aakokhora, apopheya ekhovaaye vatthi nave aakoha wi, “Kaambiiwa tini mukeerelleenyu echifundo ni opwatha dda miyaano, mulleto?”

¹¹ Koma Bowazi ahaakhulla wi, “Ddittheddene okhanlleewe oweerellaka akogwawaawo kooddiiwa, waambeella enthawi eyo mamuno akhwilleeye. Kohiiwattho wi wohaahiya attiittho ni amaayo ni ellapo yoowaninyu nave woowa wa athu ayo wahaadduwelleewe ovenyera khalle.

¹² Apwiya yuuhokolloselle ddaphaama nnddo weerilleewe. Apwiya Mulluku a Aisraele yuuvahe emphaso yuullupalli vawi woowa wa alliwa wi yuuteteze.”

¹³ Rute aallota wi, “Mookeerella echifundo yinchichi, apwiyaaka, mookikhurumusa murima nave moollota mwa echifundo ni miyaano naari miyaano kihiri mmodda a allupa muttekwaanyu aatthiyana.”

¹⁴ Enthawi yoocha Bowazi aamulleella Rute wi, “Waawo wuno, omukuse buledoolla nave omurerye muvinyonimmu.” Sika aakeraatthi vatthi vakhuviru ni athu oohataalle nave Bowazi aamuvaha tirigu awaarika. Aamucha avona ophiyera tirigu mmodda aahalla.

¹⁵ Atimullalleeye wi uurulleke, Bowazi ahaalangiza allupa muttekwaayaalle wi, “Mumwaakhullelleke mutthiyanoolla wi uurulleke naari variyari va evukunndda, muhinamuhumullullaka.

¹⁶ Muhullulleke makalla mamodda va evukunnddo ni omuhiyera wi uurulle, muhinamuhumullullaka.”

¹⁷ Sika Rute ahuurulla m'matani mulle ophiyera misikuwa. Vatulli viwa aamuuputha tirigoolle nave aari vakhuviru makilogaramu 10.

¹⁸ Vano aamukusa barelooyo ayaana owaniwa, awoonihella akogwawaayaalle. Vano aakhumiha yoocha yahanlle avonilleeye aavaha akwegwawayaayo.

¹⁹ Naomi aamukoha wi, “Wuurulla wuuwi ollello? Mutteko yoolla wawuphara m'matani mwawani? Oodalisiwa akhalle muthu oyo aweerelle echifundo.” Rute ahaalleella akogwawaayaayo dda muthu oyo aphareeyewo mutteko, allota wi, “Muthooyo nnddina naye tti Bowazi.”

²⁰ Vano Naomi aamulleella Rute wi, “Apwiya emudalise muthu yoolla. Apwiya enasunga malonjezwiiwa wa athu ookumi naarittho wa athu ookhwa.” Nave aallotattho wi, “Muthooyo tti munasaahu, mmodda mwa abalaahu, oyo ari ni olamulello woonipwatha hiyaano.”

²¹ Vano Rute aallota wi, “Woonjerera vaavo muthooyo ookilleella wi, ‘Waathwareke vatulli allupa muttekwaaka ophiyera emallihalle ohata m'matani mwakammu.’ ”

²² Naomi aamulleella Rute wi, “Tti waphaama mwanaka wi wuurulleke mwawaathwara vatulli allupa mutteko aatthiyanaayo vawi ttuukumanawo ni ddookatamiha waya m'matani mmodda.”

²³ Sika vano Rute aanaathwara vatulli allupa mutteko aatthiyana a Bowazi, uurullaka ophiyera athu emallihalle omuhata tirigu. Enthawi ettheeneeyo Rute akhalla nimodda ni akogwawaaye.