Rute 1 - Mawu a Mulluku

Elimeleki anaya o Mowabu ni nibanja naye

¹ Enthawi emodda Aisraele yalamulelliwiiwa ni oweeruza, mwaakhalla ettalla mwiillaponimmo. Sika muthu mmodda a o etawoni ya Betelehemu o echigawo ya Yuda aaya ni mwaariye owaaka anaaye aallopwana eelli wi yakhalle wa enthawi yooyeva mu ellapo ya Mowabu.

² Nnddina na muthu yoolla naari Elimeleki nave mwaariye aari Naomi. Anaaye eellaalle manddiniiwa yaari Maloni ni Kiliyoni. Yaari a nlloko na Efurati oovenyera o Betelehemu o Yuda. Yaaya o Mowabu yakhallaka wenko.

³ Vano Elimeleki mamune a Naomi aakhwa. Sika Naomi ahanlle ni anaaye eellaalle.

⁴ Alliwaayo yahaatthella Amowabu. Mmodda nnddina naye aari Olipa mmodda aari Rute. Yaakhalla o Mowabunko vakhuviru miyakha khumi.

⁵ Koma Maloni ni Kiliyoni yaakhwa. Sika Naomi aahalla yeekha woohikhalla ni mamune naari anamwani.

Naomi ni Rute anahokollweella o Betelehemu

⁶ Vano Naomi ni avokohaaye eellaalle yahaamba okhozekella olendo woohokollweella owaniwa ovenyera mu ellapo ya Mowabu. Vawi ahiiwa wi mu ellapo yoowaniwa Apwiya yahaadalisa athwiiwa ni waavaha ddoocha.

⁷ Sika aatimulla ni avokohaayaalle ovenyera nko yakhalliiwa nave yahaamba olendo woohokollweella o ellapo ya Yuda.

⁸ Vano Naomi ahaalleella avokohaayaalle wi, “Arive muthu ahokollweelle wa amennya. Apwiya eweerelleni ddaphaama wonanko mmo mwaweerelleenyu anaaka ekhwillaalle ni wa miyaano.

⁹ Apwiya yuukavihereni wi muphwanye wookhallawo nave arive muthu anyuwaano atthelliwe.” Vano ahaakhupaarella aallaanya. Koma alliwaayo yahaamba winlla moowelliha mawu.

¹⁰ Yaamulleella Naomi wi, “Iyaayi, ninapaalla wi nithaanane ni nyuwaano oya wa athu oowaninyu.”

¹¹ Koma Naomi ahaalleella wi, “Pepaani anaaka, hokollweellani owaninyu. Kaambiiwa tini munapaalleenyu othanana ni miyaano? Ethiyo munaganiza wi miyaano ttuuwora waayara anamwani aallopwana wi ekhalle amamuninyu?

¹² Hokollowani anaaka, muroweke owaninyu, ngitthelliwa vawi kohuulluvallesesa. Naari kaariki ni echikhulupililo yookhalla ni anamwani nave kikhalla ni mullopwana mahiiyuva wi kaayare anamwani aallopwana, yaanyu enaakhallevo tti tini?

¹³ Ethiyo mweerowora waatiyera ophiyera yunnuwe? Ethiyo ddenndda ddeerewuulephelihani otthelliwa? Iyaayi, anaaka, okumaaka tti wa ethakaraka ddinchichi wuukhwaranyani nyuwaano vawi Apwiya aakiwukila.”

¹⁴ Enthawi yeeyo yahaambattho winlla moowelliha mawu. Olipa ahaakhupaarella akogwawaaye nave ahaallaanya, ahokollweella owaniwa. Koma Rute aamuwanddeellella Naomooyo.

¹⁵ Vano Naomi aamulleella Rute wi, “Ngamoone mbalaawo oohokollweella owaniwa ni wa milluku ddaye. Naweenettho hokollowa omuthwareke mbalawoolle.”

¹⁶ Koma Rute ahaakhulla wi, “Muhinakiwatihera wi kuuhiyeni apaalle wi kihuuthwareni. Nko munaayeenyu miyaanottho kinaaye wenko, nko munaakhallekeenyu miyaanottho kinaakhalleke wenko. Abalaanyu enaakhelle abalaaka nave Mullukwaanyu anaakhalle Mullukwaaka.

¹⁷ Nko munaakhwelleenyuwo miyaanottho kinaakhwelle wenko nave kinaavitthiwe wenko. Apwiya ekillake miyaano mwawoopiha kuuhiyani nyuwaano ohiri ekaamba ya okhwa.”

¹⁸ Naomi oonilleeye wi Rute oosimikiza omuthwara, aahiya omuwatihera.

¹⁹ Sika eellaayo yaavirellella ni olendwiiwa ophiyera yaaphiya o Betelehemu. Yaphiyalliiwa o Betelehemunko, athu attheene a etawoni yeeyo yaarurumuwa wunchichi ekaamba ya alliwaayo. Vano atthiyana amodda yaallota wi, “Olla tti Naomi?”

²⁰ Olliyooyo ahaalleella wi, “Muhinakiromollaka wi Naomi koma mukiromolleke wi Mara vawi Apwiya Mulluku Muullupalli aheeriha okumaaka wi okhalle wa ethakaraka ddinchichi wuukhwaranyani nyuwaano.

²¹ Kayiillewo kiri ni ddeko ddinchichi koma Apwiya aakihokollosa kihinna ello. Sika vano munakiromollella tini wi Naomi, Apwiya Mulluku Muullupalli ekiwukilalle nave ekihoosille?”

²² Sika Mmu tti mmo Naomi ahokolloweelleeye ovenyera o Mowabu ni Rute, mvokohaaye Mmowaboolle. Nave yaphiyalle o Betelehemu wulle enthawi yawaamba omuhata tirigu.