Oweeruza 9 - Mawu a Mulluku

Abimeleki anavollowa omwene

¹ Vano Abimeleki, mwaana a Yerubaala, aaya o Shekemu wa abaliiwa a amennya, ni wa nlloko na nibanja na amennya wi,

² “Akoheni athu a o Shekemu wuno wi, ‘Yaphaama ttiivi wa nyuwaano wi anamwani attheene 70 a Yerubaala yuulamulellekeni apaalle wi mmoddave uulamulellekeni? Muupuwellekethi wi miyaano tti mbalaanyu a vanikutthani.’ ”

³ Abaliiwa aamennya yaallota dda ella wa athu attheene a o Shekemu munipuroni mwaye nave athwaayo murimiiwa waari va Abimeleki ekaamba yawi aallota wi olliye tti mbaliiwa a vanikutthani.

⁴ Yaamuvaha makobiri a Siliva 70 a mu enyumba yoomuvekellamo Baala Beriti ayo Abimeleki ahaalembella ganyu athu oohitthopoowa ni oohipwatha mutteko ayo yamuthwanre.

⁵ Aaya o enyumba ya attiitthinnya o Ofura, awiiphella asinne attheene 70, anamwani a Yerubaala, vanllukuni nimodda. Koma Yotamu, ethwako ya Yerubaala, aahalla ekaamba yawi ahiipittha.

⁶ Vano aneetthi a ellapo ya Shekemu yaatthukumana o enyumba ya Betemilo, eya o muteekho wa muthundu vakhuviru ni opoto oollapellavo a o Shekemu, yamuvollochiha omwene Abimeleki.

Nifano na Yotamu

⁷ Yotamu iiwalle ddenndda aawella iimella vaddullu va mwaango wa Gerizimu, akhuwa moowelliha mawu wi, “Ngakaapelleni maaru nyu athu a o Shekemu wi Mullukuttho awaapelleni maaru.

⁸ Khalle miteekho ddaaya ddamuzoza omwene muthu awi aalamulelleke. Sika miteekhonnddo ddaawulleella muteekho wa olivi wi, ‘Weyaano okhalle mwenaahu.’

⁹ Koma muteekho wa olivi waakhoota, ollota wi, ‘Miyaano ngihiya makhuraaka ayo athu enariihelliiwa milluku ni athwiine wi kalamulelleke miteekho.’

¹⁰ Vano miteekhonnddo ddaalleella muteekho wanamukuyu wi, ‘Hanko wakhalle mwenaahu.’

¹¹ Koma muteekho wanamukuyooyo waakhoota, ollota wi, ‘Miyaano ngihiya ezipaso ddaka ddaphaama ddoonang'aneya wi kalamulelleke miteekho.’

¹² Vano miteekhonndde ddaalleella muteekho wampesa wi, ‘Hanko wakhalle mwenaahu.’

¹³ Koma muteekho wampesa waakhoota, ollota wi, ‘Miyaano ngihiya omupanga vinyo oyo anahakallalliha milluku ni athwiine wi kalamulelleke miteekho.’

¹⁴ Vano miteekhonnddo ddaalleella muteekho wamiiwa wi, ‘Hanko wakhalle mwenaahu.’

¹⁵ Muteekho wamiiwa wahaakhulla wi, ‘Mwaarimi mupaallaka ni murimaanyu muttheene wi mi kikhalle mwenaanyu, waawoni mwiipitthe m'muuthuuchini mwakammu. Koma mwaaheera ddiiddo munllo oneerokhuma mwa miyaano ni oshellelliha miteekho dda mikunguza dda o Lebanoni.’ ”

¹⁶ Yotamu aavirellella ollota wi, “Ethiyo mwaheera ni murimaanyu muttheene ni moororomelleya voomuzozani Abimeleki wi akhalle mwene? Ethiyo moomweerella yaphaama Yerubaala ni nibanja naye, vooganizellani mitteko nnddo eerilleeye?

¹⁷ Khehiyo attiitthaaka yuuvaddenreni ekhoto ehiya okumiiwa vooswaani wi yuuvulluseni nyuwaano wa Amidiyani?

¹⁸ Koma ollello moowukila nibanja na attiitthaaka, muwiipha anaaye 70 vanllukuni nimodda. Nave moomuvollochiha omwene Abimeleki, mwaana a mwaariwa mung'onong'ono wi aalamulelleke aneetthi a o Shekemu ekaamba yawi tti mbalaanyu a vanikutthani.

¹⁹ Vano mwaarimi mumweerelle mwawoona ni moororomelleya Yerubaala ni nibanja naye nittheene, muhakallallena Abimelekooyo nave olliyettho ahakallalle ni nyuwaano.

²⁰ Koma ddaarimi ddihiri ddiiddo, munllo okhume mwa Abimeleki waashellihe aneetthi attheene a o Shekemu ni athu a o enyumba ya Betemilo. Nave munllo okhume mwa aneetthi a o Shekemu navettho mwa athu a o Betemilo ni omushelliha Abimeleki.”

²¹ Vano Yotamu aathawa aya o Beere akhallaka wenko, omoova Abimeleki mwanamunne.

²² Abimeleki ahaalamulella Aisraele wa miyakha miraru.

²³ Koma Mulluku aamwiitaniha Abimeleki ni athu a o Shekemu nave athu a o Shekemwaayo kheyaaroromelleyille wa Abimeleki.

²⁴ Nndda ddaheereya wi ddimuhokollweelle nnddo aweerelleeye anamwani 70 a Yerubaala. Nave wi nikhame niwa nikhalle va Abimeleki, mbaliiwa oyo awiiphalle navettho wa athu a o Shekemu ayo yamullipihalle murima wi awiiphe abalaaye.

²⁵ Sika athu a o Shekemu yahaahiya athu vaddullu va mwaango wi emwiipitthelle Abimeleki nave yaanawaakha ddeko ddiwa athu attheene ayo yaweella ettilla yeeyo nave yaamulleella Abimeleki.

²⁶ Vano Gaala, mwaana a Ebedi, aatthaamella o Shekemu ni abalaaye. Vano athu o Shekemu yaamuroromella.

²⁷ Athwaayo yaaya omata yarukulla ezipaso ddampesa eddiwamulla yeera ehakallallo. Vano yaaya o enyumba ya mullukwiiwa yacha ni owirya nave yaamba omutembelela Abimeleki.

²⁸ Vatulli viwa Gaala, mwaana a Ebedi aallota wi, “Ethiyo hi athu a o Shekemu niri awiidde? Kaambiiwa tini ninamurumeyelleehu Abimeleki? Ethiyo olliye ttaani? Khahiyo mwaana a Gideoni, oyo analamulella Zebuli? Koma vano kaambiiwa tini hiyaano ninamurumeyellaahu? Hankoni nikhalle vatulli va nikhollo nahu Hamori oyo aambihalle nlloko nahu.

²⁹ Kaariki miyaano kinaalamulella athu a m'muzindanimmu, yeeromuvenyihavo voomweneni Abimelekooyo nave keeromulleella wi, ‘Woonjerere akhotwaawo nave owe niwane ekhoto.’ ”

³⁰ Zebuli, oolamulella muzindooyo iiwalleeye mawu a Gaala, mwaana a Ebedi, aasha murima.

³¹ Ahaaruma athu wa Abimeleki o Aruma yallota wi, “Ngoonani, Gaala mwaana a Ebedi ni abalaaye, aawa o Shekemu, ennaweeriha athu a m'muzindani wi yuuwukileni.

³² Ekaamba ya yeella nyuwaano ni athu ayo muriinyuna muye mahiiyu mwiipitthe m'matani.

³³ Vano ohinase nndduwa naakhumaka, muye mwawane ekhoto ni athu a m'muzindanimmo. Gaalooyo ni athwaaye yaawaaka wi ewaneke ni nyuwaano, muwanena moollipa moollikana ni mmo munaaworelleenyu.”

³⁴ Sika Abimeleki ni athu ayo aariiyena yaavenya mahiiyu yiipittha m'muzindani wa Shekemu m'millokoni misese.

³⁵ Gaala, mwaana a Ebedi aakhuma iimella va mullako wa muzinda. Vano Abimeleki ni athu aariiyena yaatthupulluwa yiipitthalliiwa wulle.

³⁶ Gaala awoonille athwaayo, aamulleella Zebuli wi, “Ngoona, athu enakittha ovenyera vaddullu va miyaango.” Zebuli ahaakhulla wi, “Onoona miithuuchi dda miyaango ddookhalla wonanko athu”

³⁷ Gaala aallotattho wi, “Ngoona, athu enakittha ovenyera variyaririyari va mwaango nave mulloko mmodda onavenyera o embali ya muteekho wamuthundu wa athu awoombesa makhanga.”

³⁸ Vano Zebuli aamukoha wi, “Otokollolla wawo wulle ori wuuwi? Khe weyaano valle wallota wi, ‘Abimeleki ttaani wi nimurumeyelleke.?’ Athu waanyaambuseewe tti yaalla. Khuma vano wawanena ekhoto.”

³⁹ Gaala aakhuma aahoollellaka athu a o Shekemu yawanana ekhoto Abimeleki.

⁴⁰ Koma Abimeleki aamwiikariha athawa. Athwaaye anchichi yaaphoreya mu ettilla ettheene ophiya o mullako wa muzindooyo.

⁴¹ Abimeleki aakeraattheya o Aruma nave Zebuli aamwiikariha Gaala ni abalaaye wi ehikhalle o Shekemu.

⁴² Osaka wene athu a o Shekemu yaakhuma eya m'matani nave Abimeleki aalleelliwa ddenndda.

⁴³ Olliye ahaakusa athwaaye, aakawa milloko miraru, yiipittha m'matanimmo. Ewoonille athu ekhumaka m'muzindanimmo yaawanana, ewiipha athu attheenaayo.

⁴⁴ Abimeleki ni mullokwaaye yaathamakella muhoollo yakhalla va mullako wa muzindooyo nave athu a milloko miilli ddimoddanndde yahaathamakella athu attheene yaari m'matanaalle ewiipha.

⁴⁵ Ekhotweeyo yaawaniwa nllapo nittheene. Abimeleki ahaakha muzindooyo awiipha athu attheene yaari mwemmo. Aawoononga muzindooyo awumidda mwiinyu.

⁴⁶ Athu attheene a o nttattha na Shekemu yiiwalliiwa ddenndda yaaya yavollowa mu mpanda wa enyumba yoomullapellamo Baala Beriti.

⁴⁷ Abimeleki aalleelliwa wi athwaayo aatthukumana wenko.

⁴⁸ Vano aaya ni athwaaye attheene omwaangoni wa Zalimoni. Wenko aamukusa kottokwa m'mattani mwaye aphadda enthambi dda miteekho iireya vanthurini. Vano ahaalleella athwaayaayo wi, “Nndda moonilleenyu keeraka, mwaakuve nanyeenettho mweere wonanko mmo keerelleemi.”

⁴⁹ Sika arive muthu aaphadda enthambaaye anamuthwara Abimeleki, iimesa vampandani valle nave ehella munllo, sika athu attheene yaari onttatthani na Shekemu allopwana ni atthiyana 1,000 yaakhwa.

⁵⁰ Vatulli viwa Abimeleki aaya o muzinda wa Tebezi awaapheella ni misasa muzindooyo awaakha.

⁵¹ Koma m'muzindanimmo mwaakhalla nttattha noollipa nave athu attheene, allopwana ni atthiyana, yaathawella munttatthanimmo, yiiwallella muwari. Nave yaawella vaddullu va enyumba ya nttatthanno.

⁵² Abimeleki aawa onttatthani wulle anawanana nave ahaatamella va mullako wa nttatthanno wi anihelle munllo.

⁵³ Koma mutthiyana mmodda aavokhella nlluku na nsillo vamuru va Abimeleki, anyenya ekharakadda.

⁵⁴ Sika Abimelekooyo aamwiithana musombwe oyo amutukhullella ezida ddaye ddakhoto amulleella wi, “Hullulla nsupada nawo okikokhollena, nginapaalla wi athu yeereke wi, ‘Mutthiyana sika amwiiphalle.’ ” Musombooyo aamuhoma ni nsupada ophiyera naakhumellella otte, akhwa.

⁵⁵ Aisraele yoonille wi Abimeleki ookhwa, yaahokollweella owaniwa.

⁵⁶ Mmu tti mmo Mulluku aamuhokolloselleeye yoonanara Abimeleki aweerelleeye attiitthinnya voowiiphani abalaaye 70.

⁵⁷ Mulluku ahaahokollosella yoonanara athu a o Shekemu ekaamba ya onanara wiwa nave wahaamorella otembelela wa Yotamu, mwaana a Yerubaala.