Oweeruza 8 - Mawu a Mulluku

Ogonjihiwa woomallihella wa Amidiyani

¹ Nllapo nimodda Aefuremu yaamukoha Gideoni wi, “Ethiyo wahiniithanelle tini wawaneewe ni Amidiyani?” Vano yaamusimwella wunchichi.

² Olliye aawaakhulla wi, “Keerille tini voophwanaphwanihani ni nnddo mweerilleenyu? Ethiyo mweerille nyu Aefuremu kheddihiyo dduullupalli okhwaranya nnddo yeerille a nlloko na Abiyezere?

³ Mulluku ahaavelleella m'mattani mwanyu mamwene a Midiyani, Orebu ni Zebu. Vano miyaano keerille tini voophwanaphwanihani ni nnddo mweerilleenyu?” Gideoni allotille ddenndda, athwaayo mirima ddiwa ddaakeraattheya.

⁴ Enthawi yeella Gideoni ni athu 300 ayo aariiyena yaaphiya o Yordani ellapuwa muhinje etopille wunchichi koma yaavirellella owiikariha adaniiwa.

⁵ Vano ephiyalle va Sukoti, Gideoni ahaaveka athu amodda wenko wi, “Pepaani avaheni buledi athu ayo eri ni miyaanwaalla vawi aatopa wunchichi. Ninamwiikariha Zeba ni Zalimuna, mamwene a Midiyani.”

⁶ Koma oohoollella a o Sukoti yaamwaakhulla wi, “Ethiyo onavekeewe wi naavahe akhotwaawaalla buledi, Zeba ni Zalimunaayo wohaagonjiha khalle?”

⁷ Gideoni ahaakhulla wi, “Iyaayi! Apwiya yaavelleella m'mattani mwaka Zeba ni Zalimu, kineerewuuwashullani nyuwaano ni ekopo ddamiiwa dda muchipululuni.”

⁸ Ovenyera wenko aaya o Penuwele wi amuvekewo buledi. Koma athu a o Penuwele yaamwaakhulla emoddamoddave yeeyo wonanko athu a o Sukoti.

⁹ Vano Gideoni ahaalleella athu a o Penuwele wi, “Kaagonjiha nave kaahokollowa mwamurendelle, kineerokumullavo nttatthanna.”

¹⁰ Enthawi yeeyo Zeba ni Zalimu yaari eri o Karikori ni akhotwiiwa, ayo yaari athu vakhuviru 15,000. Alliwaalla tti akhoto ayo yahanlle mwa akhoto oovenyera wookhuma nndduwa vawi akhoto 120,000 yaari ekhwille.

¹¹ Gideoni aaweella ettilla ya athu ookhalla m'misasani wookhuma nndduwa wa Noba ni Yogobeha nave ahaamba owana ni akhotwaayo vawi yaari oohikhozeka.

¹² Zeba ni Zalimuna yaathawa koma Gideoni aawiikariha aaphara mamwene meelli a Amidiyanaayo aasimelliha akhotwiiwa attheene.

¹³ Vano Gideoni mwaana a Yowashi aawaawo okhotoninko oweella mutunda wa Heresi.

¹⁴ Wenko aamupharawo musombwe a o Sukoti, aamba omukoha. Musombooyo aamulembella Gideoni manddina a oohoollella ni aattekweene a o Sukoti 77.

¹⁵ Vano Gideoni aawa wa athu a o Sukoti allota wi, “Athwaalle tti alla, Zeba ni Zalimuna, alle mwakillotelleenyu wi, ‘Ethiyo Zeba ni Zalimunaayo wohaagonjiha khalle onalloteewe wi naavahe yoocha vawi aatopa wunchichi?’ ”

¹⁶ Vano Gideoni ahaaphara attekweene a m'muzindanimmo nave aakusa miwashullo ddamiiwa dda muchipululuni aawashulla attekweene a o Sukotaayo.

¹⁷ Nave aakumulla nttattha na o Penuwele, awiipha allopwana attheene a m'muzindanimmo.

¹⁸ Vano Gideoni ahaakoha Zeba ni Zalimuna wi, “Ethiyo athu mwawiiphalleenyu o Tabori yooneya mwawiidde?” Alliwa yahaakhulla wi, “Arive muthu ooneya wonanko mmo onooneyella weyaano. Yooneya wonanko anamwani a mamwene.”

¹⁹ Gideoni ahaalleella wi, “Yaalle yaari asinnaka, anamwani awaamwa nipelle nimodda ni miyaano. Kinimallupella vamiitthoni va Mulluku wi, ‘Mwahiwiiphalleke miyaanottho ngaawiipheni.’ ”

²⁰ Vano aamulleella Yetere, mwanaye awaamba wi, “Venya owiiphe athwaalla.” Koma musombooyo khaahullullalle nsupada naye vawi aamoova, ekaamba yawi aayeva.

²¹ Vano Zeba ni Zalimuna yaamulleella Gideoni wi, “Munaaniiphe tti nyuwaano vawi nyu tti muttekweene nave mookhalla ni masiva manchichi.” Enthawi yeeyo Gideoni aavenya awiipha Zeba ni Zalimuna akusa ddeko ddooreeriha dda Golide nnddo ddaari mukohi mwa ekamira* ddiwa.

²² Vano Aisraele yaamulleella Gideoni wi, “Mukhalle oolamulellaahu, mwaninyu naari edduullu ddanyu vawi moonivullusa wa Amidiyani.”

²³ Koma Gideoni aawaakhulla wi, “Mi nguulamulellani, mwanakattho khuulamulellani. Apwiya sika enuulamulelleni.”

²⁴ Gideoni ahaalleellattho wi, “Kuuvekeni ello emodda. Arive muthu a nyuwaano akivahe endolo mwaakhilleenyu okhotoni.” (A Midiyani yaanawara endolo ddagolide wonanko yawarella athu a muchipululuni, Aishmaele).

²⁵ Alliwaayo yahaakhulla wi, “Nineerohakallalla owinnyani ddenndda.” Vano ahaanddellella yoowaraaye nave arive muthu aavokhellavo endolo ddaye nnddo aakhilleeye okhotoni.

²⁶ Endolo ddavelleelliwennddo ddaallemella makilogaramu 20, wooheerengellavo ddooreeriha dda golide, ogufu wamukohi, ddoowara ddooreera ddoofiira dda mamwene a Midiyani ni malaamba a mukohi mwa ekamira.

²⁷ Golidooyo aamweeka oopa mafano ooromolliwa Efodi ahiya mu muzindaaye wa Ofura. Vano Aisraele attheene yaamuhiya Mullukwiiwa yaamba ollapella mafano a efodeeyo wenko nave yaatthattuwa musampha wa Gideoni ni a vanibanjani naye.

²⁸ Sika Amidiyani yaagonjihiwa ni Aisraele nave khayaawaheyillettho waawukila. Vano mwiillaponimmo mwaakhalla murendelle wa miyakha 40 va enthawi ya Gideoni.

Okhwa wa Gideoni

²⁹ Gideoni mwaana a Yowashi aaya akhallaka owaniwa.

³⁰ Vano aari ni anamwani 70, anamwani aayeaaye vawi aakhalla ni awariye aanchichi.

³¹ Mwaariye mung'onong'ono mmodda oyo akhalla o Shekemu aamuyarellattho mwaana aamullopwana nnddina naye Abimeleki.

³² Gideoni, mwaana a Yowashi, aakhwa ekaamba yawuulluvalla nave aavitthiwa mu mahame a Yowashi, attiitthinnya a o Ofura, muzinda wa nlloko na Abiyezere.

³³ Akhwille Gideoni, Aisraele yahaambattho ollapella milluku dda Baala nave yaamutthattusa Baala a o Beriti akhalla mullukwiiwa.

³⁴ Aisraele kheyaawuupuwelle Apwiya Mullukwiiwa, ayo yaavullusalle wa adaniiwa attheene oowaapheella.

³⁵ Nave kheyaawoonihalle othokoza wa nibanja na Yerubaala sika wi Gideoni, va ddaphaama nnddo aweerelleeye.