Oweeruza 7 - Mawu a Mulluku

Gideoni anaagonjiha Amidiyani

¹ Vano Yerubaala, Gideoni ni athu attheene ayo aariiyena yaavenya ohinase yatthipella misasa ddakhoto vakhuviru ni neetuutu a o Harodi. Misasa dda Amidiyani ddaari mutapo ompoto wiwa, vakhuviru ni mwaango wa More.

² Apwiya yaamulleella Gideoni wi, “Athu oriiwenaalla aakaatella wi kaagonjihe Amidiyani, ekaamba yawi Aisraele eneerokivevulla miyaano voollotani wi, ‘Niivullusalle ni masivaahu.’

³ Vano ollalleye wa athwaayo wi, ‘Oyo anoova nave anatthukumella, ahokollweelle owaniwa.’ ” Sika athu 22,000 yaahokollowa ehalla 10,000.

⁴ Apwiya yaamulleellattho Gideoni wi, “Athwaalla aakaatellattho. Waakuse oyeena omuhinjeni, wenko kineeroweesa meekha munipuroni mwa weyaano. Nave kallota wi, ‘Oyo athaananena,’ athaananena nave oyo kinaawuulleelleemi wi, ‘Olla ahithaananena,’ ahithaananena.”

⁵ Sika Gideoni aayaana athwaalle omuhinjeni. Nave Apwiya yaamulleella wi, “Attheene ayo enaawiryeke moonyangulla maaddi ni nllumi wonanko mmo eneerella anapwa, waahiye vaweekhiiwa. Nave ayo enaawiryeke mookokhora waahiyettho vaweekhiiwa.”

⁶ Vano waata wa athu ayo yawiryalle moonyangulla maaddi yaari 300. Koma athu amodda oohallaayo yaakokhora enawirya.

⁷ Sika Apwiya yaamulleella Gideoni wi, “Kineerewuuvullusani ni athu 300 yaallave ayo yawiryalle moonyangulla maaddaalle. Vano kineerewaavelleella m'mattani mwawo Amidiyani. Koma amodda attheenaayo eroweke owaniwa.”

⁸ Sika Gideoni ahaarumiha athu attheene owaniwa koma athu 300 yaahalla. Vano athu ootthoolliwaayo yaakusa ddoocha ni mapallapata. Misasa dda Amidiyani ddaari muhito, mutapo.

⁹ Mahiiyu vaavo Apwiya yaamulleella Gideoni wi, “Venya khawe wawane ekhoto ni Amidiyani ayo eri m'misasanimmo vawi kooddivelleella m'mattani mwawo.

¹⁰ Koma waarimi woovaka, waambe oyaawo omisasaninko ni awuurumeyellaawo Puri.

¹¹ Oneerewiiwa nnddo enallotiiwa vano oneerollipa murima nave oneeroya wawanena Amidiyani ayo eri m'misasanimmo.” Vano Gideoni ni Puri oorumeyellaaye, yaaya okhwipi omodda wa misasannddo nko waari akhoto.

¹² Amidiyani ni Aamaleke ni athu oovenyera wookhuma nndduwa yaaddalla mutapo mutthemwene wonanko nazombe ekaamba ya waata wiwa. Nave ekamira* ddiwa ddaari ddawaata wonanko mihava dda mukhwipi mwa enyanja.

¹³ Vano ephiyalle vakhuviru yaamwiiwa muthu mmodda amutthopoollellaka mukhwaaye nnddo allohilleeye. Aallota wi, “Mi koolloha. Kahoona mwitthi wa buledi a barele ophikireyaka, okitthella omisasani dda Amidiyani nave waaphiya woopana ni musasa mmodda opwanyuwavo.”

¹⁴ Mukhwaayoolle ahaakhulla wi, “Ddennddo khaddihiyo ddeko ddimodda koma ekhoto ya Gideoni, mwaana a Yowashi, muthu a o Israele. Mulluku oomweeriha Midiyani ni akhotwaaye wi evelleelliwe m'mattani mwa Gideoni.”

¹⁵ Gideoni iiwalle nnddo ddallohiwe ni ottaphullella wiwa, aakokhora amuthokoza Mulluku nave aahokollweella omisasani wa Aisraele aalleella wi, “Venyani, Apwiya ahaavelleella m'mattani mwahu Amidiyani.”

¹⁶ Ahaakawa athu 300 m'millokoni miraru, awinnya athu attheenaalle mapallapata ni epalli mmo muwari mwiwa mwahiri ello koma mitthiko ddookhara.

¹⁷ Vano ahaalleella athwaayo wi, “Mukiweheke miyaano nave mukittakiheke. Kaphiya m'malireni a misasa mweereke eyo kineerekeemi.

¹⁸ Kiipa nipallapata miyaano ni attheene ayo kiriimina nyuwaano mwiipettho mapallapata mu mapuro mattheene a misasa nave mukhuwe wi, ‘Apwiya ni Gideoni.’ ”

¹⁹ Sika Gideoni ni athu 100, ayo aariiyena, yaaphiya m'malireni mwa misasanndde variyari va mahiiyu oowehera eri waakakhanihiwa wene. Vano yahiipa mapallapata, epwesa epalli nndde ddaari m'mattani mwiwa.

²⁰ Enthawi yeeyo athu a m'millokoni miillinndde alliwattho yahiipa mapallapatiiwa, epwesa epallinndde, attheenaalle ekusalle mitthikonndde o nnatta noonyottho ni mapallapata a o nnattanatta wi ewiipeke. Vano yaakhuwa wi, “ ‘Nsupada na Apwiya ni Gideoni.’ ”

²¹ Arive muthu ahiimella vanipuroni vaye moowaapheella misasannddo nave akhoto a m'misasanimmo yahaamba othawa ekhuwaka.

²² Akhoto 300 a Agidiyonaalle yiipalle mapallapata, Apwiya yaaweeriha Amidiyanaalle wi ewaneke anayaayove. Attheenaalle yahaapheella miru wawi yawana anayaayove. Akhotwaayo yaathawa yaphiya o Beteshita Zerera, ophiyera omalireni a etawoni ya Abele Mehola vakhuviru ni Tabati.

²³ Aisraele a nlloko wa Nafutali, a nlloko na Asheri ni a nlloko na Manase nittheene, yahiithaniwa nave yaawiikariha Amidiyanaayo.

²⁴ Gideoni aarumiha othenga mu ellapo ettheene yamiyaango ya Efuremu woollota wi, “Kitthani muwane ni Amidiyani nave muwaakhe madoko ophiya o Betebara navettho muhinje wa Yordani.” Sika Aefuremu attheene yaatthukumana yaakha madokwiiwa ophiya o Betebara navettho muhinje wa Yordani.

²⁵ Yahaaphara mamwene meelli a Midiyani, Orebu ni Zebu. Yaamwiipha Orebu vanllukuni na Orebu nave Zebu yaamwiiphella vanipuroni noovotellamo ezipaso ddampesa o Zebu yawiikarihiiwa Amidiyanaalle. Vano yaawana muru wa Orebu ni wa Zebu wa Gideoni, okhopella wa muhinje wa Yordani.