Oweeruza 6 - Mawu a Mulluku

Gideoni

¹ Aisraele yaheerattho ddoonanara vamiitthoni va Apwiya. Vano Apwiya yahaavelleella m'mattani mwa Amidiyani wi yaalamulelle wa miyakha mitthanu ni miilli.

² Amidiyani yaari amasiva ni awoopiha waakhwaranya Aisraele. Vano Aisraele yaaniipittha m'makhunguni ni m'mallitini a m'miyaangoni ni omaka mipanda ddoollipa.

³ Aisraele yaalla mmiddo ddiwa, Amidiyani ni Aamaleke ni athu a wookhuma nndduwa, yaanawa enawanana ekhoto.

⁴ Yaanatthipella misasa ddiwa moowehana ni Aisraele ni owoonongella ddoohata ddiwa ophiya o Gaza. Kheyaahiyenre Aisraelaayo erive yoocha, enkhosa, eng'ombe apaalle bulu.

⁵ Yaanawa ni eng'ombe ddiwa ni misasa ddiwa. Yaanawa anchichi wonanko middope nave waari woohiworeya oweerenga athwaayo ni ekamira* ddiwa nave yaanayoononga ellapweeyo yaawaaka.

⁶ Vano Amidiyani yaahambulla wunchichi ellapo ya Israele. Vano Aisraele yahinllella wa Apwiya wi yaakavihere.

⁷ Aisraele yawinllelliiwa Apwiya ekaamba ya Amidiyanaayo,

⁸ Apwiyaayo yahaarumihella namallotella aalleella wi, “Apwiya Mulluku Aisraele, aallota wi, ‘Tti meene kuuhoollelleni ovenyera o Iguputo wuukhumihani mu ellapo yookaporo.

⁹ Kahuuvullusani wa Aiguputo ni wa attheene yuukatamihani kiwiikariha vamiitthoni vanyu nave kaanuuvahani ellapwiiwa.

¹⁰ Kahuulleellani wi mi tti Apwiya Mullukwaanyu, muhinallapella milluku dda Aamori ayo munakhalleenyu mwiillaponi mwiwa koma khamwaapwathille mawaaka.’ ”

¹¹ Nllapo nimodda mungelo a Apwiya aawa o etawoni ya Ofura akeraatthi vatthi va muteekho wa muthundu oyo waari wa Yowashi, Mwabiyezere. Enthawi yeeyo Gideoni, mwanaye, aari amuuputhaka tirigu, iipitthalle moovotellamo mpesa owiipitthihella Amidiyanaayo.

¹² Vano mungelo a Apwiya aamooneyella allota wi, “Apwiya eri ni weyaano, we muthu amasiva ni oollipa murima.”

¹³ Gideoni aamulleella mungelooyo wi, “Pepaani Apwiya, yaarimi Apwiya eri ni hiyaano kaambiiwa tini nndda ddineereyiiwa? Ddiri wuuwi mitteko ddiwa ddittheddene ddoottikhiniha nnddo makhollwaahu yanilleelliiwa ddawi Apwiya yaanikhumiha mu ellapo ya Iguputo? Koma vano aanitathilla enivelleella m'mattani mwa Amidiyani.”

¹⁴ Apwiya yaamulamula wi, “Khawe ni masiviiwaalla waavulluse Aisraele wa Amidiyani. Tti mi kinuuruma.”

¹⁵ Gideoni ahaakhulla wi, “Nyu Apwiya, kinaawore mwawiidde waavullusa Aisraele? Erukullwaahu tti yoofooka wunchichi mu nlloko na Manase nave miyaano tti mung'onong'ono munibanjani mwahu.”

¹⁶ Apwiya yaamulleella wi, “Mi kineerokhalla ni weyaano nave oneerewaagonjiha Amidiyani wonanko muthu mmodda.”

¹⁷ Vano Gideoni aallota wi, “Apwiya mwaarimi mukeerelle echifundo, kooniheni echizindikiro yawi tti nyuwaano munallota ni miyaano.

¹⁸ Muhinavenyavo vaava ophiyera kiwiillena yoovelleella vamiitthoni vanyu.” Apwiya yaallota wi, “Kineerewuutiyera ophiyera owiillena.”

¹⁹ Vano Gideoni aavollowa mpa mwaye, amwiipha musaanaapuri, amwaapeya buledi oohikhalla ni yisiti a othu woollemella makilogaramu khumi. Enameeyo aayihella munidenguni nave ephwaddiiwa aayihella mwiipallini, awaana ddittheddene nnddo addivelleella wa olliye vatthi va muteekho wa muthundoolle.

²⁰ Mungelo a Mullukooyo aamulleella wi, “Kusa enameella ni buledoolla ohiye vanllukunimvo nave wiithelle ephwaddi vaddullu viwa.” Gideoni aheera ddiiddo.

²¹ Vano mungelo a Apwiya aakusa ekopo m'mattani mwaye attannya ni etthoka ya ekopo enameelle ni buledoolle. Munllo waakhara ovenyera vanllukuni valle oshellelliha enameelle ni buledoolle. Vano mungelo a Apwiyoolle aarimeella ahooneyattho

²² Sika Gideoni aadduwella wi amoonilleeyooyo aari mungelo a Apwiya. Vano aallota wi, “Apwiya Mulluku Muullupalli, koomoona ni miitthwaaka mungelo a Apwiya.”

²³ Koma Apwiya yaamulleella wi, “Murendelle okhalle ni weyaano, ohooveke, khokhwa.”

²⁴ Vano Gideoni ahaamakella Apwiya nikuwa vanipuroni vaavo nave aavaha nnddina nawi, “Apwiya tti murendelle.” Ophiyera ollello nikuwanno nookhallawo o Ofura, muzinda wa athu a nlloko na Abiyezere.

²⁵ Mahiiyu vaavo Apwiya yaamulleella Gideoni wi, “Okuse eng'ombe yaamullopwana, yaneepiilli, yamiyakha mitthanu ni miilli, yaattiittho. Nave wakumulle nikuwa na Baala nno attiittho eriiwana. Wakuhevo nifano na Asherimu nno niri vakhwipi va nikuwanno.

²⁶ Vano vaddullu va mpandamva omakevo nikuwa na Apwiya Mullukwaawo ni malluku ootthatta phaama. Okuse eng'ombe yaamullopwana, yaneepiilli, yamiyakha mitthanu ni miilli, yaattiitthweelle ovelleelle mukutho wooshellelliha. Okuse nifano na Asherimu nno onaakuheewe wi okhalle ekhuni.”

²⁷ Sika Gideoni ahaakusa athu khumi mwa oorumeyellaaye nave aheera moollikana ni mmo Apwiya yamulleellelliiwa. Koma vawi aanawoova wunchichi athu a munibanjani naattiitthinnya owaakattho athu a m'muzindanimmo, khaaweerille nndda otthaana koma mahiiyu.

²⁸ Athu a m'muzindanimmo yavenyiiwa ohinase, yahoona nikuwa na Baala nikumulliwe, nifano na Asherimu nne naari vakhwipi va nikuwanno nikuhiwe. Nave eng'ombe yaamullopwana, yaneepiilleelle evelleelliwe mukutho vaddullu va nikuwa namakiwe vaavonno.

²⁹ Vano yahaamba okohana wi, “Eerille ddenndda ttaani?” Yaashaashille ni okohakoha, yaallota wi, “Gideoni mwaana a Yowashi sika eerille ddenndda.”

³⁰ Vano athu a m'mizindanimmo yaamulleella Yowashi wi, “Mukhumihe mwanawooyo. Anaphwanella wi iiphiwe vawi ookumulla nikuwa na Baala nave ookuha nifano na Asherimu nno naari vakhwipi va nikuwanno.”

³¹ Koma Yowashi ahaalleella attheene ayo yamuwukilallaayo wi, “Ethiyo nyuwaano sika munaamuvaddere ekhoto Baala? Ethiyo nyuwaano sika munapaalla wi mumuteteze? Arive muthu oyo anamuwanella ekhoto Baala aneerewiiphiwa osiisello ohinase. Olliye aarimi ari mulluku aneerewiivaddella ekhoto yeekhaaye vawi nikuwa naye nookumulliwa.”

³² Ella sika ekaambiiwa va nllapo nenno Gideoni avahiweeye nnddina nawi Yerubaala, ottaphullella wi, “Baala iiteteze yeekha” vawi Gideoni aakumulla nikuwa naye.

³³ Vano Amidiyani ni a Aamaleke attheene ni athu attheene a wookhuma nndduwa, yaatthukumana nave ellapuwalle muhinje wa Yordani, yaatthipella misasa dda athu akhoto mu ntapo na Yezireele.

³⁴ Koma Munepa wa Apwiya waavollowa mwa Gideoni. Sika Gidiyonooyo ahoopa nipallapata nave a Abiyezeraalle yahiithaniwa wi emuthware.

³⁵ Aarumiha othenga mu ellapo ettheene ya Manase nave alliwattho yahiithaniwa wi emuthware. Yaarumihattho mithenga wa Aasheri, Azebuloni navettho Anafutali. Attheenaayo yaathaanana ni olliye.

³⁶ Gideoni aallota ni Mulluku wi, “Khaya munapaalla wi mwaavulluse Aisraele omweella mwa miyaano.

³⁷ Ngoonani, kinatthatta mapururu eenkhosa vanipuroni noomuuputhellavo tirigu, nikame niimma vamapururunive vaava nave vathayani vikhalla vawumma sika kineerodduwella wi muneerowaavullusa Aisraele oweella mwa miyaano moollikana ni mmo mullotelleenyu.”

³⁸ Vano ddaheereya mwawi ddiiddo. Avenyilleeye ohinase aawamulla mapururwaalle, maaddi a nikame yakhumalle yaaddalla embale.

³⁹ Vano Gideoni aallotattho ni Mulluku wi, “Muhinakishella murima mukaakhullelle wi killotettho omoddave wenngu. Pepaani, mukaakhullelle wi vamapururunimva vikhalle vawumma nave vathayani vatthevenemva vimme nikame.”

⁴⁰ Vano Mulluku aheera ddiiddo mahiiyu vaavo, mwawi vamapururuni vaavo sika vaari vawumma koma vathayani vatthevene vahimma nikame.