Oweeruza 5 - Mawu a Mulluku

Nchipo na Debora ni Baraki

¹ Nllapo nenno Debora ni Baraki, mwaana a Abinowamu, yahiipa nchipo nawi,

² “Etitimiheye Apwiya, vawi oohoollella a Aisraele yaahoollella, athu yahiivelleella.”

³ Apellani maaru, nyu mamwene, iwani, nyu oolamulella. Kineerowiipella Apwiya nchipo naphaama, kineerowiipella Apwiya Mulluku a Israele.

⁴ “Nyu Apwiya, mwakhumenyu mu Seiri, mweeteenyu ovenyera o Edomu, ellapo yavatthi ettheene yaatthukumella, oddullu waattotthowa, mirapo ddaandonya maaddi.

⁵ Miyaango ddaatikheya, mwaango wa Sinai waheengereya, vamiitthoni va Apwiya Mulluku a Israele.

⁶ Va enthawi ya Shamigara mwaana a Anati, va enthawi ya Yaele, m'misewuni khemweetiwa, alleto yalambalala mu asimisewu amukhwipi.

⁷ Athu yaathawa m'matawoni mwiwa, matawoni yaamaalla mu Israele, ophiyera ophiyalle, Debora, waphiyalle wonanko moowe a Israele.

⁸ Athu yatthoonlliiwa milluku ddimodda, ekhoto yaaphiya mwiillaponi. Mwa athu 40,000 mu Israele, ttaani atukhullalle yoomuteteza apaalle nivaka?

⁹ Etitimiheye Apwiya, murimaaka ori ni oohoollella a akhoto a o Israele, ori ni athu ayo awiivelleella, variyari va akhwiiwa.

¹⁰ Nyu munawella va abulu aweellesesa, nyu mukeraatthelle matiresi, nyu muneeta vatthi, mutthopoolle ddenndda.

¹¹ Wiihimeni oowiipa machipo enimiipa ohakallallella wi Apwiya aagonjiha, ohakallallella wi athwiiwa o Israele aapambana.” “Vano Athu a Apwiya yaatthukumana ovenyera m'mawaniwa.”

¹² “Yaallota wi, ‘Venya, Debora venya, hoollella weyaano, hoollella, ipa nchipo. Venya Baraki, we mwaana a Abinowamu ahoollelle akaporwaawo.’ ”

¹³ Vatulli viwa athu oororomelleya yaawa wa oohoollelliiwa, athu a Apwiya yaawa wa alliwa voollipanani ni amasiva.

¹⁴ Yaavollowa mutapo ovenyera o Efuremu, yuuthwaraka we Benjamini ni abalaawo. Waavenyera oohoollella akhoto o Zebuloni ni o Makiri, ni o Zebuloni ootukhulla ekopo ya oohoollella.

¹⁵ Oolamulella a Isakara yaawa ni Debora, athu a wa Isakara yaamuthwara Baraki enathamakella o ntapo emuthwaraka. Koma athu a nlloko na Rubeni yaari oohiyana maganizo, oohidduwella yawi yeere.

¹⁶ Kaambiiwa tini mwaselliweenyu omakhollani a enkhosa, voowiiwellellani wiipa wa ezitoliro ddoowiithanella enkhosa? Athu a nlloko na Rubeni yaari oohiyana maganizo, oohidduwella yawi yeere.

¹⁷ Agiliyadi yaahalla vakhopella va Yordani, kaambiiwa tini athu a nlloko na Dani yaselliwiiwa mukallawani? Athu a nlloko na Ashere yaakeraatthi museresere mwa enyanja, okeraattheya m'madokoni mwiwa mwa enyanja.

¹⁸ Athu a nlloko na Zebuloni, tti ayo yahiyalle okumiiwa va ddawoopiha. Anafutali yaahiyattho okumiiwa vooswaani, voowanani ekhoto vaddullu va miyaango.

¹⁹ “Mamwene yaawa enawana ekhoto, mamwene a o Kanani yaawana ekhoto o Taanaki, vakhuviru ni muhinje wa Megido koma kheyaamwakhille siliva apaalle erive ello.

²⁰ Etheneeri ddaawana ekhoto ovenyera oddullu, ddaawana ekhoto ni Sisera, ddeetaka mumilekani ddiwa ddamuddullu.

²¹ Maaddi oosefukella a muhinje wa Kishoni, yahaakwakwadda attheene, maaddi oothamaka, maaddi amasiva a muhinje wa Kishoni. Murimaaka llipihella, eta mwamasiva!”

²² “Vano weeta wa manyallo a akavalo wahiiweya wunchichi akavalo ayo yalluphallupha, ethamakaka wunchichi.”

²³ Mungelo a Apwiya aallota wi, “Omutembelele Merozi, waatembelele wunchichi aneetthaaye, vawi kheyaawiille wi yaakavihere Apwiya, voollipanani ni adaniiwa amasiva.”

²⁴ “Yaele mwaara a Hebere Mukeni, akhalle ooriiheya waakhwaranya atthiyana attheene, waakhwaranya atthiyana attheene enakhalla m'misasani.

²⁵ Muthoolle aavekille maaddi, Yaele aamuvaha mukaka, aamuvaha mukaka woonyuunya mu kapu ooreera.

²⁶ Aakusa ekhomo ya musasa, amukusattho hamala mu nnattanatta naye, amukhomana Sisera, amukaddana murwaaye, amunyenyana mphattamaaru mwaye.

²⁷ Sisera aanyongollowa iikuha, akonaatthi vakhuviru ni Yaele. Aanyongollowa iikuha vakhuviru ni Yaele. Nko aanyongollowelleeye iikuhelle wenko, akhwa.”

²⁸ Amennya a Sisera yaatthurumella vaniwindoni, ewehaka oweella vanyerengoni yaallota wi, “Kaambiiwa tini nigareta naye nihinaphiyiiwa mwawaakuva? Kaambiiwa tini mukhito wa magaretaaye onaselliwiiwa.

²⁹ Atthiyana eezeru ddinchichi yaamwaakhulla, mwaneenaaye aaddaakhullella.

³⁰ ‘Ethiyo yaalla khenaashaasha ni okawana ddeko ddawaakha okhotoni? Anaakawella arive akhoto, mutthiyana mmodda apaalle eelli. Sisera anaakawella ddawaakha okhotoni ni ddoowara ddamalluwamalluwa wi atthiyanaayo ewareke mukohi.’ ”

³¹ “Nyu Apwiya, adanaanyu ekhweke etathiyeke ddiidda, Koma akhwiinyu ekhalle oowala wonanko nndduwa, nookhuma mwamasivaaye.” Vano ellapweeyo yaakhalla vamurendelleni miyakha 40.