Oweeruza 4 - Mawu a Mulluku

Debora ni Baraki

¹ Ehudi akhwille Aisraele yaheerattho ddoonanara vamiitthoni va Apwiya.

² Vano Apwiya yahaavelleella m'mattani mwa Yabini, mwene a o Kanani oyo alamulella etawoni ya Hazori wi aagonjihe. Oohoollella a akhotwaaye ari Sisera oyo akhalla o Harosheti Goyimu.

³ Vano Aisraele yahinllella wa Apwiya wi aakavihere vawi Sisera aakhalla ni magareta a mikoko 900 nave ahaahoosa mweekuku Aisraele wa miyakha 20.

⁴ Enthawi yeeyo Debora, namallotella aamutthiyana, mwaara a Lapidoti, ahaahoollella Aisraele.

⁵ Olliye akeraatthesa vatthi va muteekho wa mukwarangwa wa Debora variyari va echigawo ya Rama ni Beteli, ellapo yamiyaango ya Efuremu. Nave Aisraele yaanawa wa olliye wi aweeruze.

⁶ Debora aamuruma muthu wi amwiithane Baraki, mwaana a Abinowamu a o Kedeshi ellapo ya Nafutali. Baraki awiille Debora aamulleella wi, “Apwiya Mulluku a Aisraele, annuulamula wi, ‘Khawe waatthukumanihe athwaawo o mwaango wa Tabori nave waakuse athu 10,000 a nlloko na Nafutali ni na Zebuloni.

⁷ Kineeromweeriha Sisera, oohoollella a akhoto a Yabini wi akumane ni nyuwaano omuhinjeni wa Kishoni, aakusalle magaretaaye ni akhotwaaye. Nave kineeromuvelleella m'mattani mwanyu.’ ”

⁸ Baraki ahaakhulla wi, “Mwayaawo, kineeroyaawo koma mwaahiyaawo mi ngiyaawottho.”

⁹ Debora aallota wi, “Nineerothaanana komathi nyuwaano khamuriihiwa naari mupambanne vawi Apwiya eneeromuvelleella Sisera m'mattani mwa mutthiyana” Vano Debora aatimulla aya o Kedeshi ni Baraki.

¹⁰ Baraki aawiithana athu a malloko a Zebuloni ni Nafutali wi ewe o Kedeshi. Athu ayo yamuthwanre yaari 10,000 nave Debora aathaananana.

¹¹ Enthawi yeeyo Mukeni mmodda nnddina naye Hebere aari iipatulalle variyari va Akeni akhwaaye, edduullu dda Hobabu, mullamwaaye a Mose, atthipella musasaaye wuuteete vakhuviru ni muteekho wa muthundu wa o Zaananimu, waatamella o Kedeshi.

¹² Vano Sisera alleelliwe wi Baraki mwaana a Abinowamu, ooya o mwaango wa Tabori,

¹³ aawiithaniha magaretaaye amikoko mattheene 900 ni athu attheene yakhalla ni olliye etimulla ovenyera o Harosheti Goyimu yaphiya o muhinje wa Kishoni

¹⁴ Debora aamulleella Baraki wi, “Venyani, ollello Apwiya aamuvelleella Sisera m'mattani mwanyu. Apwiya ahuuhoollellani khalle” Sika Baraki aakittha o mwaango wa Tabori, athu 10,000 emuthwaraka.

¹⁵ Vano Apwiya yaamwaapheelliha muru Sisera ni magaretaaye mattheene ni akhotwaaye attheene. Baraki ni akhotwaaye yaanaathwara vatulli ewiiphaka athu anchichi. Sisera aakittha vagaretanaaye anathawa eetaka vatthi.

¹⁶ Baraki ahaathwara magareta ni akhotwaayo aphiya o Harosheti Goyimu nave akhoto attheene a Sisera yahiiphiwa ni nsupada. Khaavo naari muthu mmodda oyo avulluwalle.

¹⁷ Koma Sisera aathawa eetaka vatthi aphiya omusasani wa Yaele mwaara a Hebere Mkeni vawi vaakhalla murendelle variyari va Yabini, mwene a o Hazori ni nibanja na Hebere Mkeni.

¹⁸ Vano Yaele aakhuma anamuchingamella Sisera, amulleella wi, “Hapuwani apwiya, hapuwellani wa miyaano, muhoove.” Sika aavollowa m'musasanimmo nave aamukhuneella ni ekalipeti.

¹⁹ Siserooyo aamulleella mutthiyanooyo wi, “Pepaani moowe, kivaheni maaddi oowirya, kookhalla ni nthona.” Mutthiyanooyo aattaphulla nthumba na nttapara namukaka amuvaha wi awirye nave aamukhuneellattho ni ekalipeti.

²⁰ Vatulli viwa aamulleella mutthiyanooyo wi, “Mwiimelle va mullako wa musasa nave muthu mmodda awa anuukohani wi, ‘Ethiyo mookhalla muthu mwemmo?’ Mumulleelle wi, iyaayi khaamo.”

²¹ Koma Yaele, mwaara a Hebere, aakusa ekhomo ya musasa ni hamala m'mattani mwaye nave aheeta mwawiitta aya wa Siseroolle, amukhomella ekhomweeyo mphattamaaru mwaye ekhumellella ntthella ophiyera yaatthipelleya vatthi vawi aakona ekaamba yootopa nave aakhwa.

²² Baraki aweeye amuthwaraka Sisera, Yaele aakhuma anamuchingamella amulleella wi, “Waawoni wuno kiwoonihelleni muthu munamwaasheenyu.” Olliye aavollowa mu musasa wa mutthiyanooyo nave aamoona Sisera akhwille ekhomweeyo eri mphattamaaru mwaye.

²³ Sika nllapo nenno Mulluku aamugonjiha Yabini mwene a o Kanani vamiitthoni va Aisraele.

²⁴ Nave Aisraele yaamusimelliha Yabini, mwene a o Kanani, ophiyera yaamoononga.