Oweeruza 3 - Mawu a Mulluku

Milloko nnddo ddahanlle mwiillaponimmo

¹ Vano waakhalla milloko ddimodda nnddo ddahanlle mwiillaponimmo wi Apwiya eweesekena Aisraele ayo yahoonillena erive ekhoto mu Kanani.

² Apwiya yaheera ddenndda wi ehuddiheke orive mbado wa Aisraele dda owana ekhoto, ottepesesa ayo yahiyidduwelle ekhoto ovenyera khalle.

³ Millokonnddo tti mamwene matthanu a Afilisti, Akanani attheene, Asidoni attheene ni Ahivi ookhalla m'miyaangoni dda Lebanoni, waambeella omwaangoni wa Baala Heremoni ophiya o mpata wa Hamati.

⁴ Yaahiyalle wi eweesekena Aisraele wi ewoone yaawiiwellellaka malamulo a Apwiya ayo yaalamulelliiwa makhollwiiwa oweella mwa Mose.

⁵ Sika Aisraele yaakhalla variyari va Akanani, Ahiti, Aamori, Aperezi, Ahivi ni Ayebusi.

⁶ Aisraelaayo yahaamba waatthella athu a milloko ddenndda nave yaanaatthelliha aniiwa wa athu a milloko ddenndda. Vatulli viwa yahaamba ollapella milluku ddiwa.

Dda Otiniyele

⁷ Aisraele yaheerattho ddoonanara vamiitthoni va Apwiya. Yahaatiwalla Apwiya Mullukwiiwa, enarumeyella mafano a Abaala ni Asherimu.

⁸ Ekaamba ya yeella Apwiya yahaashella murima Aisraelaayo, emweeriha Kushani Rishataimu, mwene a o Mesopotamiya wi aagonjihe Aisraelaayo. Sika Aisraelaayo yaamurumeyella mwene Kushani Rishataimu wa miyakha mitthanu ni miraru.

⁹ Koma Aisraelaayo yinllelliiwa wa Apwiya, Apwiyaayo yahaarumihella owaavullusa oyo aavullusalle. Olliyoolla aari Otiniyele, mwaana a Kenazi, mung'onong'onwaaye a Kalebe.

¹⁰ Munepa wa Apwiya waakitthella mwa olliyooyo nave aatthattuwa oweeruza Aisraele nave aaya awana ekhoto nave Apwiya yaamuvelleella m'mattani mwaye Kushani Rishataimu, mwene a o Mesopotamiya.

¹¹ Vano ellapweeyo yaakhalla vamurendelleni wa miyakha 40. Vatulli viwa Otiniyele, mwaana Kenazi, aakhwa.

Dda Ehudi

¹² Aisraele yaheerattho ddoonanara vamiitthoni va Apwiya. Sika Apwiya yaamuvaha masiva Egiloni, mwene a o Mowabu wi aagonjihe Aisraele kaambiiwa alliwaayo yaheera ddoonanara vamiitthoni va Apwiya.

¹³ Egilonooyo aawiithana Aamoni moottakanyiherana ni Aamaleke eya yaagonjiha Aisraele. Nave yahaakha muzinda wa mikwarangwa.

¹⁴ Vano Aisraele yaamurumeyella Egiloni, mwene a o Mowabu, miyakha 18.

¹⁵ Koma Aisraelaayo yinllelliiwa wa Apwiya, Apwiyaayo yahaarumihella owaavullusa oyo aavullusalle. Olliyoolla aari Ehudi, mwaana a Gera, Mubenjamini, muthu oonyottho. Aisraele yaanakhoma musonkho wa Egiloni, mwene a o Mowabu, oweella mwa Ehudi.

¹⁶ Vano Ehudi aahana nsupada naye nawiisha nngu ni nngu, noorekama masentimita 50. Nave aamakellella nsupadanno muwari mwa ddoowara ddaye vakasambarani a onnattanatta naye.

¹⁷ Nave aaya wookhoma musonkho wa Egiloni, mwene a o Mowabu, oyo aari ooneneva wunchichi.

¹⁸ Ehudi amallihalle okhoma musonkhooyo, ahaalleella athu ootukhulla musonkhwaayo wi eroweke.

¹⁹ Koma olliyooyo aahokollowa aphiyalle vamallukuni oosemiwa o Giligala aphiya wa mwene allota wi, “Amwene, kookhalla ni mawu wa nyuwaano oovittheya.” Sika mwenooyo ahaalamulella wi emaalleye nave ahaakhumihella vaatte attheene yiimenlle vamiitthoni vaye.

²⁰ Vano Ehudi aamwaatamella mwenooyo, ari yeekhaaye mu echipinda yavaddullu yoovira ephevo. Nave aallota wi, “Kookhalla ni mawu oovenyera wa Mulluku awi kuulleelleni.” Mwenooyo ahiimella mvo akeraatthilleeye.

²¹ Ehudi aahullulla nsupadanne vakasambarani onnattanatta ni muwono woonyottho amuhomana mwenooyo vamirimani vaye.

²² Nsupadanno naavollowa ni ekumbwiine nave makhura yaahuruwella nsupadanno wawi khaawonre ohullullu, nikhumellella otulli.

²³ Vano Ehudi aakhumella okhote awalla machiwi mattheene a echipinda yavaddullweeyo.

²⁴ Ehudi avenyillewo oorumeyella mwenaalle yaawa. Yoonille wi machiwi a echipinda yavaddullweelle tti oowalla, yaaganiza wi, “Apaalle mwene animiikavihera muwarimmu.”

²⁵ Alliwaayo yaatiyera enthawi yinchichi sika vano yaatopa. Koma yoonille wi mwenooyo khanahulla machiwaayo, yaakusa makii ehulla echipindeeyo nave yamphwanya mwenooyo ari kwalaa vatthi, akhwille.

²⁶ Enthawi eyo yaselliwiiwa ni otiyera, Ehudi aathawa. Aakhwaranya vamallukuni oosemiwa athawella o Seira.

²⁷ Aphiyalle ahiipa nipallapata mu ellapo yamiyaango ya Efuremu. Aisraele attheene yaakittha ovenyera o ellapo yamiyaangweeyo aahoollella.

²⁸ Ahaalleella athwaayo wi, “Kithwarekeni, Apwiya ahaahiya m'mattani mwanyu adanaanyu Amowabu.” Vano yaamuthwara yaakha madoko a Yordani wawi yahaatiyellella Amowabwaayo nave khaavo naari muthu mmodda aakhullelliwe wi allapuwe.

²⁹ Enthawi yeeyo yaawiipha Amowabu 10,000. Athu attheene yiiphiwaayo yaari amasiva nave oodduwella ekhoto nave khaavo naari mmodda avulluwalle.

³⁰ Sika nllapo nenno Amowabu yaagonjihiwa ni Aisraele. Vano Aisraele yaakhalla mwamurendelle miyakha 80.

Dda Shamigara

³¹ Akhwille Ehudi, vaawa Shamigara, mwaana a Anati, oyo awiiphalle Afilisti 600 ni ekopo yoottotthella eng'ombe. Nave olliyoottho ahaavullusa Aisraele.