Oweeruza 21 - Mawu a Mulluku

A nlloko na Abenjamini enaashelliiwa atthiyana wi yaatthelle

¹ Aisraele yaari ellupenlle o Mizipa wi, “Khaavo naari mmodda a hiyaano oyo anaamwaakhullelle mwanaye aamutthiyana wi atthelliwe ni Abenjamini.”

² Athwaayo yaaphiya o Betele, ekeraatthi wenko vamiitthoni va Mulluku ophiyera misikuwa, yinllaka moowelliha mawu ni moomoriha ethakaraka.

³ Alliwaayo yeehina, “Apwiya Mulluku Aisraele kaambiiwa tini nndda ddeereyilliiwa mu ellapo ya Israele wi ollello nlloko na Abenjamini nahalliiwa vang'ono otthollowa mu ellapo ya Israele?”

⁴ Osaka wene athwaayo yaavenya ohinase. Yamaka nikuwa wenko, evelleella mukutho wooshellelliha ni wa eyaattano.

⁵ Aisraele yaallota wi, “Ethiyo ttaani oyo variyari va malloko a Aisraele ahiphiyalle va mutthukumano wa Apwiya?” Valle yaari ellupenlle dda athu ayo ehinaaphiye va mutthukumano wa Apwiya o Mizipa wi, “Muthu anaaweere ddennddo anaphwanella iiphiwe.”

⁶ Koma Aisraele yahaamorella ethakaraka abaliiwa a nlloko na Benjamini ellota wi, “Ollellova nlloko nimodda noovenyihiwamo mu ellapo ya Israele.

⁷ Ethiyo ninaaye naaphwanye wuuwi atthiyana a athu ehanllaalla vawi naallupella wa Apwiya wi, khaniwinnya aniihu aatthiyana wi yaatthelle.”

⁸ Vano alliwaayo yaakoha wi, “Ethiyo mu nlloko na Aisraele ttaani ahiwiille wa Apwiya o Mizipa?” Vano ddaadduwanyeya wi khaavo naari mmodda a o Yabeshi Giliyadi oyo awiille omisasani, omutthukumanoni wulle.

⁹ Vawi athu yatthukumanniiwa yahoona wi khaavo muthu naari mmodda o Yabeshi Giliyadi.

¹⁰ Sika athu yatthukumannaayo yahaarumiha o Yabeshi Giliyadi athu 12,000 oollipa murima wunchichi, yaalamula wi, “Khaweni mwawiiphe athu a o Yabeshi Giliyadi ni masupada. Mwawiiphettho atthiyana ni aniiwa.

¹¹ Nnddo munaaweereenyu tti ddawi, ‘Mwawiiphe allopwana attheene navettho arive mutthiyana oyo amudduwenlle mullopwana.’ ”

¹² Variyari va athu a o Yabeshi Giliyadi yahaaphwanyawo anamwalli 400 ayo yaari ehinamudduwelle mullopwana. Yaayo yaawaana omisasani o Shilo, muzinda oyo ori mu ellapo ya Kanani.

¹³ Vano athu yatthukumannaayo yaarumiha othenga wa Abenjamini ayo yaari o nlluku na o Rimoni waalleella wi ekhoto yoomalla.

¹⁴ Abenjamini yaawa enthawi yeeyo. Nave Aisraele yaawinnya Abenjaminaayo atthiyana a o Yabeshi Giliyadi yahiiphiwaallaalle. Koma yaayelleella, kheyaakwakhwanille.

¹⁵ Aisraele yahaamorella ethakaraka Abenjaminaayo ekaamba yawi Apwiya yaari yaavenyihallewo athu amodda mu nlloko nimodda na Aisraele

¹⁶ Vano attekweene a vamutthukumanoni valle yaallota wi, “Ethiyo ninaawaaphwanyelle wuuwi atthiyana athu eyelleellaalla vawi atthiyana a nlloko na Benjamini ahiiphiwa?”

¹⁷ Alliwaayo yaallota wi, “Tti woopaalleya wi athu oohalla a nlloko na Benjamini ekhallena edduullu wi nlloko niwa nihitthollowe variyari va Aisraele.

¹⁸ Koma khaniworave owinnya aniihu aatthiyana wi yaatthelle.” Valle Aisraele yaari ellupenlle wi, “Akhalle ootembeleliwa muthu oyo anaawinnye Abenjamini mutthiyana.”

¹⁹ Sika yaallota wi, “Valle wookhalla Ehakallallo ya Apwiya ya muyakha ni muyakha o muzinda wa Shilo.” Shilo aari wookhuma nndduwa wa musewu woovenyera o Betele oya o Shekemu, omwera wa Lebanoni.

²⁰ Sika yahaalamula Abenjaminaayo wi, “Khaweni mwiipitthe mu emata dda ezipaso ddampesa,

²¹ nave mwaaweheseseke. Anamwani aatthiyana a o Shilo yaawaaka wi yiine maddoma, mutthupulluwe mu emata dda ezipaso ddampesannddo mwaaphare, arive muthu aaye aaye nave muyeekena mu ellapo ya Abenjamini.

²² Vano attiitthiiwa apaalle arokoriwa yaawa enakhupanya, hiyaano nineerowaalleella wi, ‘Pepaani, naakhullelleni wi naakuse vawi athwaalla khanaaphwanyelle atthiyana voowanani ekhoto navettho nyuwaano khamurimawinnya atthiyanaayo. Mwaariki nyuwaano muwinnyalle neereweera wi moochimwa.’ ”

²³ Abenjaminaayo yaheera ddennddo. Mwa atthiyana ayo yiinalle yahaakusavo ayiwa moollikana ni waata wiwa, ethawana. Vatulli viwa yaatimulla ehokollweella o yoohallaniiwa yamakattho mizinda ddanaanweene enakhallamo.

²⁴ Vano Aisraele yaavenyawo wenko enthawi yeeyo, arive muthu aaya o nlloko naye navettho o nibanja naye, o yoohallanaaye.

²⁵ Mallapo yaayo khamwaari mwene mu Israele. Arive muthu eera nnddo ddamuddivella yeekha.