Oweeruza 20 - Mawu a Mulluku

Aisraele enakhozekella ekhoto

¹ Aisraele attheene yaatimulla waambeella o Dani ophiya o Beeresheba, owaakattho ellapo ya Giliyadi nave yaatthukumana vamiitthoni va Apwiya o Mizipa.

² Oohoollella a malloko mattheene a Aisraele yaawa vamutthukumanoni wa athu a Mulluku. Nave vaakhalla akhoto aweeta vatthi 400,000.

³ Athu a nlloko na Benjamini yaari yiiwalle wi, Aisraele attheene aatthukumana o Mizipa. Vano Aisraele yaallota wi, “Nilleelle, ddoonanara ddenndda ddeereyille mwawiidde?”

⁴ Vano Mulevoolle, mamunaye a mutthiyana awiiphiwoolle, aallota wi, “Mi ni mwaaraka naaphiya o Gibea, muzinda wa Abenjamini wi nikone wenko.

⁵ Mahiiyu athu a o Gibea yaakiwukila yaapheella enyumba eyo kaariimimo. Yapaalla okiipha sika yaamupharella mwaaraka ophiyera aakhwa.

⁶ Kaamukusa mutthiyanooyo kimuphaddaphadda enthuli enthuli kiddurumiha o nirive nlloko mu yoohallana ya Israele. Athu yaalla aheera yoonanara ni ddoowulliha muru ddinchichi mu Israele

⁷ Kohuulleellani nyu Aisraele attheene. Ddiri ni nyuwaano woona yaweera.”

⁸ Athu attheene yaavenyera nimodda ellota wi, “Khaavo muthu anaaye omusasani waye. Khaavo naari muthu mmodda anaarowe owaniwa.

⁹ Koma vano ninaaweerelleehu athu a o Gibea tti ddawi, noombese nave naatthoolle athu awi yawane ni muzindooyo.

¹⁰ M'millokoni ddittheddene dda Aisraele naatthoollemo athu khumi mwa athu 100. Yaalla eneerotthukumaniha ddoocha dda athu akhoto nave akhotwaayo eneeroya yaahokolloselle athu a o Gibea, muzinda wa Benjamini, ekaamba ya nichimo niwa noonanara wunchichi nno yanenriiwa mu ellapo ya Israele.”

¹¹ Sika Aisraele attheene yaatthukumana yiiwanane emodda wi yawanena muzindooyo.

¹² Malloko a Aisraele yahaarumiha athu a o nlloko na Benjamini wi yaakohe wi, “Ethiyo ddoonanara mweerilleenyu variyari vanyunndda tti ddawiidde?

¹³ Vano hiyaano ninallota wi muweena athwaayo, athu oonanaraalle a o Gibea wi niwiiphe nivenyihe yoonanara mu ellapo ya Israele.” Koma Abenjamini kheyaapanlle wiiwa mawu a Aisraele, abaliiwa.

¹⁴ Sika a Benjamini yaavenyamo m'mizindani mwiwa o Gibea wi yawane ekhoto ni Aisraele.

¹⁵ Nllapo nenno Abenjamini yahaatthukumaniha akhoto 26,000 a m'mizindani, oohiweerengella athu amodda 700 a o Gibea ayo yatthoolliwe.

¹⁶ Mwa athu attheenaayo mwaakhalla athu 700 ootthoolliwa, oonyottho ayo yahipoosa ello naari neehi nimodda yavokha nlluku.

¹⁷ Aisraele attheene, waahiya Abenjamini, yahaatthukumaniha athu amasupada 400,000, athu oodduwella owana phaama ekhoto.

Aisraele enawana ekhoto ni Abenjamini

¹⁸ Aisraele yaatimulla eya o Betele yakoha wa Mulluku wi, “Ttaani mwa hiyaano anaawaambe owana ekhoto ni Abenjamini?” Apwiya yaawaakhulla wi, “Nlloko na Yuda sika ninaawaambe.”

¹⁹ Vano Aisraele yaavenya ohinase yatthipella misasa ddiwa moowehana ni Gibea.

²⁰ Aisraele yaaya yawana ekhoto ni Abenjamini, yaahiya akhotwiiwa moowehana ni muzinda wa Gibea.

²¹ Naalliwattho Abenjamini yaakhuma mu muzinda wa Gibea nave nllapo nenno yaawiipha Aisraele 22,000.

²² Koma Aisraelaayo yaallipihana murima nave yahaahiya wiilli akhotwiiwa vanipuroni valle yaahiyalliiwa akhotwiiwa nllapo nawaambanne.

²³ Vano Aisraelaayo yaaya yinlla vamiitthoni va Apwiya ophiyera misikuwa. Yahaakoha Apwiya wi, “Ethiyo niyeewo wiilli wi nawane ni Abenjamini, abalaahu?” Apwiya yahaakhulla wi, “Ee khaweni mwawanena.”

²⁴ Sika Aisraele yaaphiya vakhuviru wi yawane ni Abenjamini nllapo naneepiilli.

²⁵ Abenjamini yaakhumattho mu muzinda wa Gibea yawanana nllapo naneepiillinno nave yaawiipha akhoto Aisraele 18,000.

²⁶ Vano athu attheene, sika wi mulloko wa athu akhoto muttheene waaya o Betele wi winlle. Yaakeraatthi vamiitthoni va Apwiya, ehalla ocha* nllapo nenno ophiyera misikuwa nave yaavelleella mukutho wooshellelliha ni mukutho wa eyaattano vamiitthoni va Apwiya.

²⁷ Nibokosi na echipangano na Apwiya naari niri wenko mallapo yaayo.

²⁸ Finehasi mwaana a Eleazara, mwaana a Aroni, sika awehera nibokosinno mallapo yaayo. Sika Aisraele yaakoha wi, “Ethiyo niyettho nawanena ekhoto Abenjamini, abalaahu apaalle nihiyeewo?” Apwiya yahaakhulla wi, “Khawenittho vawi osiisello muneerewaagonjiha.”

²⁹ Sika Aisraele yahaahiya athu awiipittha moowaapheella muzinda wa Gibea.

³⁰ Yaaya woowana ni Abenjamini nllapo naneeraru, yahaatthatta akhotwiiwa wi ewane ekhoto ni athu a muzinda wa Gibea wonanko mallapo mamoddaalle.

³¹ Abenjamini naalliwattho yaakhuma wi yawanena athwaayo, eya woorekamella ni muzindooyo. Nave moollikana ni mallapo mattheenaalle, yahaamba owanana mwawoopiha nave yaawiipha Aisraele 30 ayo yaari m'misewuni dduullupalli, amodda m'musewuni muullupalli wa o Betele, amodda m'musewuni muullupalli wa o Gibea owaaka amodda yaari vawooneyella.

³² Nave yaallota wi, “Noowiikariha wonanko vawaamba valle.” Koma Aisraele yaallota wi, “Hankoni nithawe wi eye omisewuni ddoorekamella ni muzindiiwa.”

³³ Sika Aisraelaayo yaatimulla m'mapuroni mwiwa yatthattana o Baala Tamara. Vano Aisraele yiipitthallaalle yaatthupulluwa m'mapuroni mwiwa woovollowa nndduwa wa muzindooyo.

³⁴ Aisraele ootthoolliwa ayo yawiille wi ewane ni athu a muzinda wa Gibea yaarivo 10,000 nave ekhoto yaaphiya vookatamiha. Koma Abenjamini kheyaadduwella wi ddawoopiha ddahanlle vang'ono oweereyella.

³⁵ Koma Apwiya yahaagonjiha Abenjamini vamiitthoni va Aisraele nave Aisraelaayo yaawoononga akhoto a Abenjamini 25,100 nllapo nenno.

³⁶ Nave Abenjamini yahoona wi aagonjihiwa. Mulloko muullupalli wa Aisraele wahaathawa Abenjamini kaambiiwa waaroromella athu alle yaahiyalliiwa wi ewipitthelle athu a mu muzinda wa Gibea.

Aisraele anaagonjiha adaniiwa vakhotoni

³⁷ Athu yiipitthallaalle mwawaakuva yaavollowa m'muzindani wa Gibea. Yaawiipha athu attheene a m'muzindani mulle ni masupada.

³⁸ Vano echizindikiro eyo yiiwanane Aisraele a mulloko muullapalli ni athu awiipitthaalle yaari yawi, yathuwiha mwiisi munchichi wonanko murapo wooya muddullu m'muzindanimmo,

³⁹ Aisraele anchichaayo ehokollowe wi ewane ekhoto. Koma enthawi yeeyo tti wi Abenjamini yaambille owana mwawoopiha ni Aisraele nave ewiiphalle athu 30. Alliwa yaallota wi, “Noowiipha wonanko mallapo mattheenaalle.”

⁴⁰ Koma mwiisi wa echizindikilweelle waambilliiwa wi tungulii! Owella muddullu, Abenjamini yaaweha mutulli, yoona m'muzindani mutthemwenemmo mwiisi ori tungulii! Owella muddullu.

⁴¹ Vano Aisraele yaahokollowa nave Abenjamini yahaamba woova nave yaatathilla murima vawi yahoona wi ddawoopiha ddahanlle vang'ono oweereyella

⁴² Sika Abenjamini yahaamba waathawa Aisraelaayo, evollowa mu ettilla ya muchipululuni. Koma ekhoto yahaaphwanya nave yahiiphiwa ni Aisraele ayo yakhuma m'muzindani.

⁴³ Yaawaapheella Abenjaminaayo ewiikariha nave ewoononga moohiweerella echifundo ophiya o echigawo ya wookhuma nndduwa wa Gibea.

⁴⁴ Abenjamini ayo yiiphiwe yaarivo 18,000. Attheenaayo yaari athu oollipa murima wunchichi.

⁴⁵ Athu ayo yahanlle yaarukunuwa ethawella mu echipululu ya nlluku na Rimoni. Mwa alliwaayo athu 5,000 yahiiphiwa m'misewuni dduullupalli. Yaawiikarihave Abinjaminaayo ophiya o Gidomu, ewiiphattho amodda 2,000.

⁴⁶ Sika Abenjamini attheene ayo yiiphiwe nllapo nenno yaari 25,000. Attheenaayo yaari athu oollipa murima wunchichi.

⁴⁷ Koma athu 600 sika yathawenlle mu echipululu ya nlluku na Rimoni, enakhalla onllukuni na Rimoninko miyeri misese.

⁴⁸ Koma Aisraele yaahokollweella mutulli yawanana Abenjamini oohalla, ewiipha ni nsupada, athu ni enama ddene ni ddittheddene yakumaniiwana. Nave yahoosa mizinda ddittheddene yaddiphwanyiiwa.