Oweeruza 2 - Mawu a Mulluku

Mungelo a Apwiya o Bokimu

¹ Mungelo a Apwiya aaya o Bokimu ovenyera o Giligala. Nave ahaalleella Aisraele wi, “Kahuukhumihani mu ellapo ya Iguputo ni wuuvollochihani mu ellapo eyo kallupenlleemi wi kineerewaavaha makhollwaanyu. Kaallota wi, ‘Ngiwa kitathilla echipanganwaaka ni nyuwaano.

² Vano nyuwaano muhinapangana ni athu ookhalla mwiillaponimmu. Mukumulle makuwiiwa mattheene.’ Koma nyuwaano khamwiiwellelle lamulo naka. Ella mweerilleenyu tti tini?

³ Sika vano kinuulleellani wi ngiwiikariha athu ayo munaawaaphwanyeenyu mwaaphiyaka. Koma eneerokhalla adanaanyu nave milluku ddiwa ddineerokhalla musampha wa nyuwaano.”

⁴ Mungelooyo allotille mawu yaalla wa Aisraele attheene, athwaayo yahaamba okhuwa ni winlla.

⁵ Nipuro nenno yaanavaha nnddina nawi Bokimu nave vaavo yaavelleella mukutho wa Apwiya.

Okhwa wa Yoswa

⁶ Yoswa awaakhullelle athu wi eroweke, arive muthu aaya onipuroni nko akawelliweeye wi ekhalle yoohallanaaye.

⁷ Athwaayo yaanaarumeyella Apwiya enthawi ettheene Yoswa aariiye mukumi nave athu yaavirellella waarumeyella Apwiya enthawi ya oohoollella akhwille Yoswa ayo yaari yoonille mitteko dduullupalli nnddo Apwiya yaweerelliiwa Aisraele.

⁸ Yoswa mwaana a Nuni, oorumeyella a Apwiya, akhwille ari ni miyakha 110.

⁹ Vano yaamuvittha mu echigawo ya yoohallanaaye, Timnati Heresi, ellapo yamiyaango ya Efuremu, ompoto wa mwaango wa Gaashi.

¹⁰ Mbado muttheenooyo waakhwa. Vano vatulli viwa vaaphatuwa mbado mmodda oyo wahaadduwenlle Apwiya apaalle mitteko ddiwa nnddo yaweerelliiwa Aisraele.

Aisraele aahiya waallapella Apwiya

¹¹ Aisraele yaheera ddoonanara vamiitthoni va Apwiya nave yaanarumeyella milluku dda Baala.

¹² Alliwaayo yahaahiya Apwiya Mulluku a makhollwiiwa ayo yaakhumihalle mu ellapo ya Aiguputo. Yaathwara milluku ddimodda dda athu oowaapheella nave yaanaddillapella. Nave yahaashiha murima Apwiya.

¹³ Alliwaayo yahaahiya Apwiya enarumeyella milluku dda Baala ni Ashitaroti.

¹⁴ Sika Apwiya yahaashella murima Aisraelaayo nave yahaavelleella m'mattani mwa athu awaakha ddeko ayo yawaakhille ddeko ddiwa. Nave Apwiya yaawaakhullella adaniiwa ayo yawaaphenlle wi yaagonjihe. Vano kheyaawonre waagonjiha adaniiwa.

¹⁵ Yaya okhotoni, Apwiya yaanaawukila alliwaayo moollikana ni mmo yallotelliiwa ni mmo yallupellelliiwa. Sika Aisraelaayo yaahoowa wunchichi.

¹⁶ Vano Apwiya yahaatthoollella Aisraelaayo oweeruza ayo yaavullusa wa athu awoononga ayo yawaakha ddeko ddiwa.

¹⁷ Koma alliwaayo kheyaawiiwellella oohollelliiwaayo vawi yaanarumeyella ni ollapella milluku ddimodda. Makhollwiiwa yaaniiwellella malamulo a Apwiya. Koma mbado yoolla mwawaakuva waahiya othwara ettilla yeella.

¹⁸ Erive enthawi Apwiya yaatthoollella oweeruza, Apwiyaayo yaanakhalla ni olliyooyo. Nave ooweeruzooyo aanaavullusa Aisraele wa adaniiwa enthawi ettheene yookumaaye. Apwiya yaanaamorella ethakaraka alliwaayo yaakhupanyaka ekaamba ya ayo yaakatamiha ni waanyingallella.

¹⁹ Koma erive enthawi oweeruzooyo akhwa, athwaayo yaanaamba weerattho ddoonanara, etthattuwa oonanara okhwaranya makhollwiiwa, enathwara milluku ddimodda, enaddirumeyella ni oddillapella. Kheyaahiya weera ddoonanara ddiwa apaalle etiyamaarwiiwa.

²⁰ Sika Apwiya yahaashella murima Aisraele, ellota wi, “Athwaalla khenathwara echipanganwaaka eyo kaalamulalleemi makhollwiiwa nave vawi kheyaawiiwellelle mawaaka,

²¹ mittho ngiikariha orive mutundu oyo ahiyalle Yoswa akhweeye.

²² Vano kineeroweesa Aisraele wi kiwoone yiiki epwatheke ni weeta ettilla dda mi Apwiya wonanko yeerella makhollwiiwa apaalle iyaayi.”

²³ Sika Apwiya yahaakhullella wi milloko ddennddo ddikhallewo, kheyaaddiikarihalle mwawaakuva nave kheyaaddivelleelle m'mattani mwa Yoswa.