Oweeruza 19 - Mawu a Mulluku

Mulevi ni mwaariye mung'onong'ono

¹ Mallapo ayo o Israele wahiriiwa mwene, Mulevi mmodda akhalla woorekamella ntthella na miyaango dda Efuremu. Olliyooyo aamutthella mwaariye mung'onong'ono o etawoni ya Betelehemu ellapo ya Yuda.

² Koma nllapo nimodda mwaariye mung'onong'onoolle aananariwa ekaamba ya mamunoolle nave aathawa ahokollweella waattiitthinnya o Betelehemu ellapo ya Yuda. Aakhalla wenko miyeri misese.

³ Vano mamune aatimulla amuthwara wi allotena mwawiithaalla, omuveka wi ahokollowe. Mamunooyo aari ni oorumeyellaaye ni abulu eelli. Vano yaaphiya o enyumba ya attiitthinnya a mwaariyooyo. Nave mwaariyooyo aamukusella mamunooyo mpa sika attiitthinnya yamoonilliiwa yaamwaakhella ni matta meelli.

⁴ Apwinnya, attiitthinnya a mwaariyoolle, yaamulleella wi akhalle wenko, sika aakhalla wenko mallapo mararu. Aanacha, anawirya nave anakona wenko.

⁵ Nllapo naneesese, alliwaayo yaapeha ohinase wi eroweke. Koma attiitthinnya a mwaariyoolle yaamulleella mukamweniiwoolle wi, “Llipihani murima ni omucha mwanabuledi, vatulli viwa muroweke.”

⁶ Sika athu eellaalle yaakeraatthi anacha nave enawirya nimodda. Attiitthinnya a mutthiyanooyo yaamulleella mukamweniiwooyo wi, “Konanittho weewuno ollello, murimaanyu ohakallalle.”

⁷ Mukamwenooyo atimulleeye wi aroweke attiitthinnya a mwaariyoolle yaamuwatihera wi akonettho wenko.

⁸ Nllapo naneetthanu aavenya ohinase wi aroweke. Attiitthinnya a mwaariyoolle yaamulleella wi, “Llipihani murima nave mutiyere ophiyera misikuwa.” Sika Eellaayo yaacha nimodda.

⁹ Muthooyo, mwaariye mung'onong'ono ni oorumeyellaayoolle yatimulliiwa wi eroweke, attiitthinnya a mwaariyooyo yaamulleella wi, “Ngoonani nndduwa nihanlle vang'ono ovollowa nave vano tti misikuwa. Pepaani konanittho weewuno. Ngoonani onimaripa. Konani weewuno, muhakallalle. Osiisello muneeropeha ohinase wi muroweke owaninyu.”

¹⁰ Koma mukamwenoolle aakhoota okona nllapo nenno. Sika aatimulla anarowa, aphiya vanipuroni noowehana ni Yebusi (ottaphullella Yerusalemu). Olliyooyo aari aakusalle abulu ookhalla ni yookeraatthella eelli nave mwaariyoolle aari ni olliye.

¹¹ Yaphiyiiwa o Yebusi, waari osikuwalle wunchichi nave oorumeyellaayoolle ahaalleella apwinnyaalle wi, “Kaambiiwa tini nihinahapuweehu wi nivollowe m'muzindani wa Yebusoolla wi nakone mwemmo?”

¹² Apwinnyaalle yaamwaakhulla wi, “Khanihapuwa ovollowa mu muzinda wa alleto ayo ehiri Aisraele. Koma nineerovirellella naphiye o Gibea.”

¹³ Sika yaamulleella oorumeyellaayoolle wi, “Hanko naphiye vakhuviru ni nipuro kiromonlleeminno nave nakone o Gibea apaalle o Rama.”

¹⁴ Sika yaavirellella weeta olendwiiwa nave nndduwa nahaavollowella yaatamelliiwa o Gibea, muzinda wa nlloko na Benjamini.

¹⁵ Yaahapuwella wenko wi evollowe mu muzinda wa Gibea nave wi yakone wenko mahiiyu yaayo. Yaavollowa m'muzindanimmo ekeraatthi vanthatoni koma khaavo naari muthu mmodda oyo awaakhenlle wi yakone o enyumba waye.

¹⁶ Vatulli viwa yaamoona muthu mmodda awuulluvalla avenyeraka omuttekoni waye omata misikuwa. Aari a mu ellapo yamiyaango ya Efuremu koma akhalla o Gibea. (Aneena a wenko yaari Abenjamini).

¹⁷ Muthu awuulluvalloolle atukhullalle miittho aamoona avoolendonooyo ekeraatthille vanthatoni na muzindooyo nave aamukoha wi, “Ethiyo olendoolla onaya wuuwi? Nave onavenyera wuuwi?”

¹⁸ Mulletooyo ahaakhulla wi, “Ninaya wuuteete o ellapo yamiyaango ya Efuremu nko kinakhalleemi nave ninavenyera o Betelehemu mu ellapo ya Yuda. Kayiille o Betelehemu nave vano kinaya owanihu koma khaavo naari mmodda oyo akaakhenlle mpa mwaye.

¹⁹ Manasi owaaka yoocha ya abulwaahu ddookhallavo. Kookhallanattho Buledi ni vinyo ookikwakhwanella miyaano, mwaarakoolla ni oorumeyella oyo ari ni hiyaanoolla. Kheyiivo eyo ninapaallaahu.”

²⁰ Vano muthu awuulluvallooyo aallota wi, “Koowaakhellani onyumbani waka. Kineerewuukaviherani va ddittheddene munapaalleenyu. Vano muhinakona vanthatonimva.”

²¹ Sika ahaakusella owaniwa, aavaha yoocha abulwaalle. Nave alletwaayo yaahuwa manyallwiiwa, yaacha nave yaawirya.

²² Yachiiwa moohakallalla, yaawoona athu a m'muzindanimmo, athu oonanara, yaaphenlle enyumbeeyo yuukuthaka nchiwi. Yaamulleella muthu awuulluvalloolle, mwaneena a enyumboolle wi, “Mukhumihe muthu olle awiille mpa mwawo wi nikonena.”

²³ Mwaneena a enyumboolle aakhuma aalleella wi, “Iyaayi, abalaaka muheere ddoonanara wonanko ddennddo.

²⁴ Mva vookhalla mwanaka namwalli oohimudduwella mullopwana ni mwaara a mulletoolla. Kineerewuukhumihellani yaalla naanweene vaava, mwaakuse nave muweerena eyo munapaalleenyu. Koma muheere ello yoonanareeyo wa mulletoolla.”

²⁵ Koma athwaayo yaakhoota omwiiwellella. Sika mulletoolle aamuphara mwaariye mung'onong'onoolle amukhumihella yaariiwanko. Alliwaayo yaakonana nave yaheerana ddoonanara mahiiyu mattheene ophiyera ohinase. Mitthupi ddinllalle yaamuhiya wi aroweke.

²⁶ Vano oyaaka ni osa mwaara amulevoolle aawa iikuhella va mullako wa enyumba ya muthoolle mmo mwaari mamunoolle. Ophiyera otte waasa.

²⁷ Mamunoolle avenyille ohinase nave ahullalle machiwi a enyumbeeyo wi aroweke aamoona mwaariye mung'onong'onoolle ari kwalaa! Va mullako wa enyumbeeyo, mattaaye eri vaferemuni.

²⁸ Aamulleella wi, “Venya nitimulle.” Koma mutthiyanooyo khaawaakhullalle ello. Vano aamuwelliha vabuluni nave mulletooyo aatimulla anaya owaniwa.

²⁹ Avollowille mpa mwaye aakusa mpeni aphaddaphadda mwiilli wa mwaariyoolle enthuli khumi ni piilli. Nave aarumiha erive enthuli o nirive nlloko na Israele.

³⁰ Athu ayo yoonille ddenndda yaallota wi, “Ddenndda khaddineereyeke waambeella enthawi eyo Aisraele yakhumalliiwa mu ellapo ya Iguputo ophiyera ollello. Niganize phaama, niiwanane nave neerevo ello.”