Oweeruza 18 - Mawu a Mulluku

Mika ni nlloko na Dani

¹ Mallapo yaayo khawaari mwene mu ellapo ya Israele. Athu a nlloko na Dani yaanaashaasha ellapo wi ekhallekemo nave wi ekhalle yoohallaniiwa vawi ophiyera enthawi yeeyo alliwaayo yaari ehinavahiwe ellapo wi ekhalle yoohallaniiwa variyari va malloko a Israele.

² Sika athu a nlloko na Danaayo yahaaruma athu atthanu oollipa murima, ootthoolliwa mwa mabanja mattheene wi yazonde ellapo. Athwaayo yavenyenre o etawoni ya Zora ni ya Eshitaoli. Athwaayo yahaalleella wi, “Khaweni mwazonde ellapweeyo.” Alliwaayo yaaphiya o ellapo yamiyaango ya Efuremu o enyumba ya Mika, ekona wenko.

³ Eri wenko yaadduwella mawu a musombwe Eelevoolle vano yaaya wa olliye yamukoha wi, “Wawiille wuno ni aani? Oneerawo tini wuno? Onapharawo mutteko tini wuno?”

⁴ Olliyooyo ahaalleella wi, “Kiri va echipangano ni Mika, aakilemba mutteko vano kiri mullupa mukuthwaaye.”

⁵ Alliwaayo yaamulleella wi, “Pepaani, onikohelle wa Mulluku wi nidduwelle neeki neete phaama va olendwaahoolla.”

⁶ Mullupa mukuthoolle ahaalleella wi, “Khaweni ni murendelle. Olendwaanyoolla ori m'mattani mwa Apwiya.”

⁷ Vano athu atthanwaalle yaavenyawo yaphiya o Laishi, ewoona athu ayo yakhalla wenko, edduwella wi athwaayo kheyaarina yowaakatamiha wonanko mmo yakhallella Asidoni. Yaari athu oomaalleya ni oohirurumuwa, oohipaalla erive ello navettho yaari athu eeyuuma. Yahoona wi athwaayo yaanakhalla wuuteete ni Asidoni nave wi kheyeetellana ni athu amodda.

⁸ Oozonda ellapwaalle yaahokollweella wa abaliiwa o Zora ni o Eshitaoli nave abaliiwaayo yahaakoha wi, “Vano munanilleella ddawiidde?”

⁹ Alliwaayo yahaakhulla wi, “Venyani nawanena ekhoto vawi ellapweeyo nooyoona, ethayiiwa tti yaphaama wunchichi. Vano ethiyo kheyiivo munaaweereenyuvo? Muhiselliwe ovollowa mu ellapweeyo ni oyaakha.

¹⁰ Mwayaawo muneerowoona wi tti athu oohirurumuwa. Ellapweeyo tti yuullupalli. Mulluku ooyivelleella m'mattani mwanyu. Nipuronno tti noohirama ello eyo enaphwanyeya va ellapo yavatthi.”

¹¹ Vano athu 600 a nlloko na Dani yaakusa ezida ddiwa ddakhoto etimullawo o Zora ni o Eshitaoli.

¹² Yaatthipella misasa ddiwa ddakhoto o Kiriyati Yearimu ellapo ya Yuda. Ekaamba ya yeella nipuronno ophiyera ollello ninaromolliwa wi misasa dda Dani nave niri woovollowa nndduwa wa Kiriyati Yearimu.

¹³ Ovenyera wenko yaaya o ellapo yamiyaango ya o Efuremu yaphiya o enyumba ya Mika.

¹⁴ Vano athu atthanu ayo yayiille yazondaka ellapo ya Laishaalle yahaakoha abaliiwaayo wi, “Ethiyo munnadduwella wi emodda mwa enyumba ddenndda mookhalla efodi,* mafano oosema amikoko ni mafano mamodda ooromolliwa terafimu? Vano ganizerani yawi mweere.”

¹⁵ Athwaayo yaahapuwa yaphiya va enyumba ya Mika wulle wakhalla Mulevi yamukoha mmo akhallelleeye.

¹⁶ Enthawi yeella yaari yawi athu 600 a nlloko na Dani ookhalla ni ezida ddakhotwaalle yiimenlle va mullako.

¹⁷ Vano athu atthanu ayo yaari ezondille ellapweeyo yaavollowa mpammo ekusamo efodi, mafano oosema ni a mikoko ni mafano mamodda ooromolliwa terafimu. Enthawi yeeyo mullupa mukuthoolle aari iimenlle va mullako ni akhoto 600 ookhalla ni ezida ddakhotwaalle.

¹⁸ Athwaalle yavollowiiwa mpa mwa mika mulle yakusaka efodi, mafano oosema ni a mikoko ni mafano mamodda ooromolliwa terafimu, mullupa mukuthoolle aakoha wi, “Ethiyo eyo muneereenyu tti tini?”

¹⁹ Alliwa yaamwaakhulla wi, “Okhurumuwe nave omaalleeye. Nithwareke, wakhalle mulangizi ni mullupa mukuthwaahu. Yaphaama ttiivi wi okhalle mullupa mukutho a nlloko nittheene na Aisraele ni wi okhalle mullupa mukutho a muthu mmodda?”

²⁰ Vano mullupa mukuthoolle murimaaye waamweella nave aakusa efodi, nifano noosema ni a mikoko ni mafano mamodda, athaanana ni athwaayo.

²¹ Sika yaavenyawo etimulla, yaahoolliha anamwani, eng'ombe ni katundu mmodda.

²² Yeetille olendo woorekama ovenyera va enyumba ya Mika, Mikooyo ni athu awaatamanana yahiithaniwa wi yaathwareke athu a nlloko na Dani nave yahaaphwanya.

²³ Alliwaayo yahaakhuwella athu a nlloko na Danaalle. Vano athu a nlloko na Danaayo yaarukunuwa emukoha Mika wi, “Yuukatamihalle tti tini wi oweeke ni mulloko wawi ddiidda?”

²⁴ Mika aawaakhulla wi, “Mookaakha milluku ddaka, mookaakhattho mullupa mukuthwaaka nave ngihanlle ni ello. Vano nyuwaano munakikoha wi, ‘Yuukatamihalle tti tini?’ ”

²⁵ Athu a nlloko na Danaalle yahaakhulla wi, “Ohinavirellella otokollolla, mwaamodda athwaalla ttuusha murima nave ttuuwuukutha, sika we ni nibanja nawo nittheene muneerewiiphiwa.”

²⁶ Vano athu a nlloko na Danaalle yaavirellella ni olendwiiwa. Sika Mika awoonilleeye athwaalle wi yaari amasiva omukhwaranya olliye, aahokollweella owaniwa.

²⁷ Ekusalle ddeko nnddo Mika addipangilleeye ni mullupa mukuthoolle, athu a nlloko na Danaayo yaaphiya o Laishi wa athu oomaalleya ni oohirurumuwa, yaawanana ekhoto nave ehella munllo muzindiiwa.

²⁸ Khaarivo awaavullusa vawi yaari wuuteete ni o Sidoni nave kheyeetellana ni athu amodda. Muzindooyo waari mu ntapo na Beterehobu. Athu a nlloko na Danaayo yaamakattho muzindooyo enakhallamo.

²⁹ Muzindooyo yaawuvaha nnddina nawi Dani okusella nnddina na nikhollo niwa, oyo aari mwaana a Israele. Koma nnddina na muzindooyo vawaamba naari Laishi.

³⁰ Vano athu a nlloko na Danaalle yahimmesa nifano na siliva ooweekanne. Nave Yonatani, mwaana a Gereshomo, mwaana a Mose ni anaaye attheene, yaakhalla allupa mukutho a nlloko na Dani ophiyera nllapo nno yaphariwiiwa okaporo.

³¹ Sika enthawi ettheene enyumba ya Mulluku yaariiwa o Shilo, athu a nlloko na Danaalle yallapella nifano nne Mika anipangilleeye.