Oweeruza 17 - Mawu a Mulluku

Milluku dda Mika

¹ O ellapo yamiyaango ya Efuremu waakhalla muthu mmodda nnddina naye Mika.

² Vano olliye ahaalleella amennya wi, “Muthu mmodda aawiiyerani makobiri a siliva 1,100 nave mwaamutembelela miyaano kiiwaka. Makobiraayo tti alla, eri ni miyaano. Tti miyaano kaakusalle.” Amennyaayo yaamulleella wi, “Apwiya yuudalise mwanaka.”

³ Vano olliyooyo ahaahokollosella amennya makobiri mattheene. Vano amennyaayo yaallota wi, “Kinaapatula makobiri a silivaalla wi ekhalle a Apwiya, epharihiwe mutteko woosema nifano ni onihuruwella ni siliva. Sika kinimuuhokollosella makobiraalla.”

⁴ Vano Mika aahokolloselle makobiraalle, amennyaayo yaakusavo makobiri asiliva 200 evelleella wa oohana mikoko. Muthooyo aasema nifano, eeka makobiraayo, ahuruwellana nifanonno. Vano nahiimesiwa mpa mwa Mika.

⁵ Mikooyo aakhalla ni enyumba yoovekellamo yaayeyaaye. Vano aasowa yoowara ya efodi* apanga mafano a mu enyumba ooromolliwa terafimu, iitthoollella mwanaye mmodda wi akhalle mullupa mukutho.

⁶ Mallapo yaayo o Israele khewaari mwene. Arive muthu aaneera nnddo ddinamuddivella.

⁷ O Betelehemu Yuda waakhalla musombwe mmodda eelleto a nlloko na Yuda oyo aari Mulevi.

⁸ Muthooyo aatthaama o Betelehemu ellapo ya Yuda, anaashaasha waamodda wookhalla. Eetaka aaphiya mu ellapo yamiyaango ya Efuremu o enyumba ya Mika.

⁹ Mikoolle aamukoha wi, “Ethiyo munavenyera wuuwi?” Muthooyo ahaakhulla wi, “Mi tti Mulevi a o Betelehemu ellapo ya Yuda, kinaashaasha wawi kikhallekewo.”

¹⁰ Vano Mika aamulleella wi, “Khallani ni miyaano, mukhalle mulangizaaka navettho mullupa mukuthwaaka, kineerekewuullivellani makobiri asiliva khumi vamuyakhani, kineerekewuuvahanittho ddoowara ni ddoocha.”

¹¹ Mulevooyo ahaakhullella okhalla ni muthooyo, atthattuwa wonanko mmodda mwa anaaye.

¹² Vano Mika aamuzoza Mulevooyo wi akhalle mullupa mukutho nave olliyooyo akhalla mu enyumba ya Mika.

¹³ Vano Mika aallota wi, “Vano koodduwella wi Apwiya eneerokeerella ddaphaama vawi Mulevi sika ari mullupa mukuthwaaka.”