Oweeruza 16 - Mawu a Mulluku

Samisoni o Gaza

¹ Samisoni aaya o Gaza nave wenko aamoonawo mutthiyana ooraruwa nave aakonana.

² Athu a o Gaza yaalleelliwa wi, “Samisoni ari weewuno.” Vano athwaayo yahaapheella nipuronno yiipittha mahiiyu mattheene va mullako wa muzindooyo. Alliwaayo yaamaalleya mahiiyu mattheene ellotaka wi, “Hankoni nimutiyere ophiyera ohinase osillewo, vatulli viwa nimwiiphe.”

³ Koma Samisoni aakona ophiyera variyari va mahiiyu. Variyari va mahiiyumvo aavenya, aphara machiwi a va mullako wa muzindooyo, aphara maferemu. Aatulla erive ello vaavo, iireya vanthurini nave ayaana vaddullu va mwaango woowehana ni Hebroni.

Samisoni ni Delila

⁴ Vatulli viwa Samisoni ahaamba omukonda mutthiyana mmodda nnddina naye Delila a mu ntapo na Soreki.

⁵ Anamwani aallopwana a mamwene a Afilisti yaawa wa mutthiyanooyo emulleella wi, “Omunyengelele mullopwanoolla, woone mvo vinavenyera masivaaye awoopihaalla navettho mmo ninaaworelleehu omugonjiha wi nimmake nave nimugonjihe. Nave arive muthu a hiyaano aneerewuuvaha makobiri manchichi.”

⁶ Vano Delila aamulleella Samisoni wi, “Killeelleni miyaano. Ethiyo masivaanyu enavenyera vaavi? Ethiyo wi muthu uumakeni nave uugonjiheni, ere mwawiidde?”

⁷ Samisoni aamwaakhulla wi, “Muthu akimaka ni mikwe ddikitthi ddookungella miira mitthanu ni miilli ddisha kineerokhalla oofooka nave kinaakhalle wonanko arive muthu.”

⁸ Vano anamwani aallopwana a mamwene a Afilistaayo yaamwinnya mutthiyanooyo mikwe ddikitthi mitthanu ni miilli ddisha nave olliye aamumakana mamunoolle.

⁹ Enthawi yeeyo mutthiyanoolle aari awiipitthihalle athu mu echipinda ya muwari. Vano aakhuwa wa mamunayoolle wi, “Mamunaka Samisoni, Afilistaalle enimawa,” Koma olliye aaphadda mikwennddo wonanko ntthupu naashaka. Sika kheyaadduwenlle nko onavenyera masivaaye.

¹⁰ Vano Delila aamulleella Samisoni wi, “Mookilleka nave mookoottottha. Pepaani killeelleni mmo enaawumakelliiwani.”

¹¹ Samisoni aamulleella wi, “Erimakimaka ni mikwe ddisha nnddo ehinapharihekiiwa mutteko kineerokhalla oofooka nave kinaakhalle wonanko arive muthu.”

¹² Sika Delila aakusa mikwe ddisha amumakana, akhuwa wa olliye wi, “Nyu amamunaka, Afilistaalle aawa.” Enthawi ettheeneeyo athu alle yamwiipitthellaalle yaari eri mu echipinda yamuwari. Koma Samisoni aaphadda mikwennddo wonanko olusi wawunta.

¹³ Delila aamulleella Samisoni wi, “Ophiyera ollello munakhulla okilleka nave okoottottha. Killeelleni mmo athu enaaworelliiwa wuumakani.” Samisoni aamulleella wi, “Wakilluwa meehaakaalla ni yoolluwella ekuwo nave waamaka moollipiha, kineerokhalla oofooka nave kinaakhalle wonanko athu amodda.”

¹⁴ Sika vano Samisoni aakona nave Delila aalluwa meehi a Samisoni ni yoolluwella ekuwo. Nave ahaamaka moollipiha akhuwa wi, “Nyu amamunaka, Afilistaalle enimawa.” Koma olliye aarurumuwa attaphulla meehaalle.

¹⁵ Vano mutthiyanooyo aallota wi, “Munaawore ollota mwawiidde wi munnakikonda koma murimaanyu ohiri va miyaano? Mookhalla mukikarangeyihaka oraru nave khamukilleelle nko onavenyera masivaanyu awoopihaalla.”

¹⁶ Vano amusimellihalle ni omukoha nirive nllapo, Samisoni murimaaye waatopa ophiyera opaalla okhwa.

¹⁷ Sika aamuwululella mwaariyooyo dda m'murimani mwaye ddittheddene wi, “Ephatuwellwaaka nginachemeke vawi kaatthoolleyella wa Mulluku ovenyera kihinayariwe. Erimakichema meehaakaalla, masivaaka enoorokivenyella. Kineerokhalla oofooka nave kinaakhalle wonanko arive muthu.”

¹⁸ Vano Delila ahoona wi oomuwululella dda m'murimani mwaye ddittheddene, sika aawiithana anamwani aallopwana a mamwene mattheene Aafilistaalle aalleella wi, “Waawoni omoddave wenngu vawi ookiwululella dda m'murimani mwaye ddittheddene.” Vano anamwani aallopwana a mamwene Aafilistaalle yaawa wa mutthiyanoolle ekusalle makobiri m'mattani mwiwa.

¹⁹ Mutthiyanooyo aamweeriha Samisoni wi akoneke vametoni vaye. Vano aamwiithana muthu wi acheme matuthu matthanu ni meelli ameehi a m'muruni mwa Samisoni. Vano olliyooyo ahaamba ofooka nave masivaaye yaamuvenyera.

²⁰ Vatulli viwa Delila aakhuwa wi, “Nyu amamunaka, Afilistaalle enimawa.” Samisoni aavenya aganizaka wi, “Kineerokhuma wonanko mmo kineerelleemi erive enthawi nave kineerottaphuwa.” Koma khaadduwella wi Apwiya aamuhiya.

²¹ Afilistaalle yaamuphara emutthorokolla miitthwaaye nave eyaana o Gaza emmakille ni onyolo wamikoko. Wenko muttekwaaye waari woosilla vansilloni mundende.

²² Koma vatulli viwa meehaaye yachemiwaalle yahaamba omellattho.

Okhwa wa Samisoni

²³ Nllapo nimodda anamwani aallopwana a mamwene a Afilisti yaatthukumana wi evelleelle mukutho muullupalli wa Dagoni mullukwiiwa nave wi ehakallalle vawi yeehina, “Mullukwaahu oonikavihera omugonjiha Samisoni, mudanaahu.”

²⁴ Athu yamoonilliiwa Samisoni, yahaamba omutitimiha mullukwiiwa. “Nave yaallota wi mullukwaahu oonikavihera omugonjiha mudanaahu, muthu awoononga ellapo olle awiiphalle athu anchichi.”

²⁵ Mirima ddiwa ddaweellilliiwa yaallota wi, “Mwiithaneni Samisoni wi anihakallallihe.” Sika yaamukhumiha Samisoni mundende, vano olliye ahaamba waahakallalliha. Sika yaamwimmesa variyari va apoto

²⁶ Vano Samisoni aamulleella musombwe oyo amuphareelle nnatta wi, “Okihiye wi kaaphare apoto ayo echirikullalle enyumbeella wi kaahameelle.”

²⁷ Enthawi yeeyo enyumbeeyo yaari eddanlle ni athu, allopwana ni atthiyaneene. Anamwani aallopwana a mamwene mattheene a Afilisti yaari mwemmo. Nave vaddullu va enyumbeeyo vaakhalla athu ookwakhwana 3,000, allopwana ni atthiyaneene, ayo yamoonella Samisoni attheellaka mowaahakallalliha.

²⁸ Vano Samisoni aavekella wa Apwiya allota wi, “Nyu Apwiya Mulluku, pepaani, mukuupuwelle omoddave wenngu. Nave mukivahe masiva nyu Mulluku wi kaahokolloselle epewe Afilistaalla ekaamba ya miitthwaaka meellaalla.”

²⁹ Enthawi yeeyo Samisoni ahaaphara apoto eelli a variyari ayo yachirikullalle enyumbaayo. Ahaahameella ni masivaaye mattheene, nnatta naye noonnattanatta niri va opoto mmodda nave nnatta naye noonyottho niri va opoto mmodda.

³⁰ Sika Samisoni aallota wi, “Kikhwe nimodda ni Afilistaalla.” Sika aakakha ni masivaaye mattheene nave enyumbeeyo yahaamorella anamwani aallopwana a mamwene Aafilistaalle ni athu attheene ayo yaari mwemmo. Sika waata wa athu ayo yakhwille va enthawi ya okhwa waye waakhwaranya waata wa athu ayo awiiphalleeye ari mukumi.

³¹ Vano abalaaye a Samisoni ni nibanja naye nittheene yaawa emukusa nave yaamuvittha variyari va Zora ni Eshitaoli, mahame a Manowa, attiitthinnya. Samisoni ahaahoollella Aisraele wa miyakha 20.