Oweeruza 15 - Mawu a Mulluku

¹ Viviralle enthawi, Samisoni aaya woomwaarerella mwaariye mu enthawi yoomuhata tirigu amukusalle musaanaapuri. Nave aallota wi, “Kinapaalla wi kivollowe o echipinda ya mwaaraka.” Koma attiitthinnya a mwaariyooyo yaamuwatteella ovollowawo.

² Attiitthinnya a mwaariyooyo yaamulleella wi, “Mi kaganiza wi nyuwaano khamunamupaalla mutthiyanoolla. Sika kaamutthelliha wa mukhwiinyu. Ethiyo mung'onong'onwaaye khahiyo ooreera omukhwaranya olliye? Pepaani, mumukuse olliye munipuroni mwaye.”

³ Samisoni ahaalleella wi, “Olendo yoolla athu ehikeere oolakwa kaweerella yoonanara yuullupalli Afilistaalla.”

⁴ Vano Samisoni aaya aaphara akhatwe 300 aallundellella miilla ddiwa eelli eelli. Variyari va miilla miillinnddo aamakellellavo mitthiko.

⁵ Nave akharihalle mitthikonnddo ahaahiya akhatwaayo wi eyeeke mu emata ddatirigu dda Afilisti. Alliwaayo yaamuhella munllo tirigu oyo aari m'mapwiddini ni oyo aari ahinaretiwe vamodda ni miteekho dda olivi.

⁶ Vano Afilisti yahaamba okohana wi, “Ttaani eerille ddenndda?” Amodda yahaakhulla wi, “Samisoni mukamwene a Mutimunoolle, sika eerille ddenndda, ekaamba yawi Mutimunoolle oomutthelliha mwaara a Samisonooyo wa mukhwaaye.” Vano Afilistaayo yaawa emuhella munllo mutthiyanooyo ni attiitthinnyeene.

⁷ Samisoni allota wi, “Weera wanyu waarimi ori wenngu, kinimallupella wi ngihiya ophiyera kuuhokolloselleni ddoonanara.”

⁸ Vano aawanana wawoopiha wawi aawiipha athu anchichi. Vatulli viwa aavollowa onikhunguni na nlluku na Etamu akhalla wenko.

Samisoni anaagonjiha Afilisti

⁹ Vatulli viwa Afilistaayo yaatthipella misasa ddiwa ddakhoto mu ellapo ya Yuda nave yaawana ekhoto ni athu a mu etawoni ya Lehi.

¹⁰ Athu a o Yuda yaakoha wi, “Kaambiiwa tini munawaneenyu ni hiyaano? Niwiille wi nimumake Samisoni wi nimweere nnddo aneerelleeye.”

¹¹ Vano athu 3,000 a o Yuda yaaya onikhunguni na Etamu yamukoha Samisoni wi, “Ethiyo khonadduwella wi, Afilisti sika enanilamulella?” Vano nndda weerilleewe tti tini? Olliye aawaakhulla wi, “Kooweerella nnddo yakeerelliiwa.”

¹² Vano alliwaayo yaamulleella wi, “Naweella wuumaka wi nuuvelleelle wa Afilisti.” Samisoni ahaalleella wi, “Llupellani wi khamukiipha.”

¹³ Alliwaayo yaamulleella wi, “Iyaayi. Hiyaano nineere moona wuumaka nave nuuvelleelle wa alliwaayo. Khaniwiipha.” Sika yaamumaka ni mikwe miilli ddisha, emukhumihamo munikhunguni mulle.

¹⁴ Samisoni aphiyalle o Lehi, Afilisti yaamuchingamella ekhuwaka. Enthawi yeeyo munepa a Apwiya aamukitthella mwamasiva nave aaphadda mikwe yamumakilliiwana miwono wonanko olusi wawunta. Ottotthowa omora m'mattani mwaye.

¹⁵ Vano Aaphwanya etwaatwara ya bulu oyo akhwille wene. Aayitota awiiphana athu 1,000

¹⁶ Vano Samisoni ahaamba wiipa nchipo nawi, “Ni etwaatwara ya bulu, athu awuukellana! Ni etwaatwara ya bulu, koowiipha athu 1,000!”

¹⁷ Vatulli viwa aayitathilla etwaatwareelle nave nipuronno naaromolliwa wi Ramatilehi.

¹⁸ Vano Samisoni aavolliwa nthona wunchichi nave ahaaveka Apwiya wi, “Nyu mwaavelleella masiva oovullusa manchichi wa mi oorumeyellaanyu. Ethiyo vano kikhwe ni nthona nave kiphariwe ni oohiphaddiwaalla?”

¹⁹ Enthawi yeeyo Mulluku aatthalla muthaani o Lehi nave maaddi yaakhuma vallitinimvo. Samisoni awiryalle maaddaayo, aakhallattho ni masiva nave aahihimuwa. Ekaamba ya yeella nipuronno ninaromolliwa wi Enihakore.

²⁰ Samisoni aaweeruza Aisraele mu enthawi ya Afilisti wa miyakha 20.