Oweeruza 14 - Mawu a Mulluku

Samisoni ni namwalli o Timna

¹ Samisoni aaya o Timna amoonawo namwalli Eefilisti.

² Ahokollweelle owaniwa ahaalleella attiitthinnya ni Amennya wi, “Koomoona namwalli Eefilisti o Timna. Mwakikuselle yooyo wi kimutthelle.”

³ Koma attiitthinnya ni amennya yaamukoha wi, “Ethiyo khaavo mutthiyana awi omutthelle variyari va abalaawaalla apaalle variyari va athu amutundwaahu, onapaalleewe wi omutthelle namwalli Eefilisti, oohiphaddiwa?” Koma Samisoni ahaalleella attiitthinnyaalle wi, “Mi mwakikuselle yooyo vawi annakiya m'mwiitthoni.”

⁴ Attiitthinnya ni amennyaayo kheyaadduwella wi ddennddo ddaari ddoovenyera wa Apwiya vawi Apwiya yapaalla ephwanye mpata woowanella ni Afilisti. Enthawi yeella Afilisti sika yaalamulella Aisraele.

⁵ Vano Samisoni aaya o Timna ni Attiitthinnya ni amennya. Aphiyalle o emata ddampesa dda o Timna, Samisoni aamoona mwaana a mukango athurumaka opaalla omuphara.

⁶ Vano munepa a Apwiya aamukitthella Samisoni awukhaddulla mukangooyo wonanko mmo muthu anamukhaddullelleeye musaanaapuri. Koma khaawaalleelle attiitthinnya apaalle amennya nnddo eerilleeye.

⁷ Vano Samisoni aaya amukohera namwalloolle nave aamukonda wunchichi namwallooyo.

⁸ Viviralle enthawi Samisoni aahokollowa wi amukuse namwalloolle. Nave aahapuwa wi oone mukango awiiphalleeyoolle. Vano ahoona enwi eri mumukangoni mulle nave erikenlle.

⁹ Samisoni aavavulla enweeyo, ayikusella m'mattani mwaye anacha eetaka. Aphiyalle wa attiitthinnya ni wa amennya ahaavaha makallapha echa. Koma khaawaalleelle wi ayivavullalle mumukangoni wookhwa.

¹⁰ Attiitthinnyaalle yaaya wa namwalloolle nave Samisoni ahaakhozella ehakallallo wenko vawi tti mmo yeerella asombwe.

¹¹ Athu yoonilliiwa, yaawaana asombwe 30 wi ekhalle ni olliye.

¹² Samisoni ahaalleella wi, “Kinapaalla kuullotelleni mwambi, mwakilleella ottaphullella wiwa vihinamalle mallapo matthanu ni meelli a ehakallallweella, kineerewuuvahani ddoowara ddabafuta 30 navettho ddoowara dda va nllapo na ehakallallo 30.

¹³ Koma mwalephela okilleella ottaphullella wiwa, nyuwaano sika munaakivahe ddoowara ddabafuta 30 navettho ddoowara dda va nllapo na ehakallallo 30.” Alliwa yaamwaakhulla wi, “Llota mwambooyo niwiiwe.”

¹⁴ Vano aallota wi, “Mu yowaacha akhwiiwa mwaavenyera yoocha, mu yamasiva mwaavenyera yoonang'aneya.” Koma vaamalla mallapo mararu athwaayo elephelaka ottaphullella phaama mwamboolla.

¹⁵ Nllapo naneesese yaamulleella mwaara Samisoni wi, “Omunyengerere mamunooyo wi anilleelle ottaphullella wa mwamboolle. Waaheera ddiiddo nineerewuuhella munllo vamodda ni enyumba ya attiittho. Muniithanihalle wi munaakhe ddaahu?”

¹⁶ Vano mwaara Samisoni ahaamba winlla vamiitthoni va mamune allotaka wi, “Nyu munnakiita nave khamunakikonda. Mohaallotella mwambi athu a mu ellapwaaka koma woohikilleella miyaano ottaphullella wiwa.” Samisoni aamulleella wi, “Naari attiitthaaka ni amoowaaka ngaalleelle ottaphullella wiwa, vano kuulleelle weyaano?”

¹⁷ Aavirellella winlla mallapo mattheene matthanu ni meelli a ehakallallweeyo. Vano va nllapo naneetthanu ni piilli aamulleella vawi aamuwatihera wunchichi. Enthawi yeeyo mutthiyanooyo ahaalleella athu a mu ellapwaayaalle ottaphullella wa mwambooyo.

¹⁸ Sika athu a m'muzindanaalle yaamulleella Samisoni va nllapo naneetthanu ni piilli nndduwa nihinavollowe wi, “Tti tini eri yoonang'aneya okhwaranya enwi? Tti tini eri yamasiva okhwaranya mukango?” Samisoni ahaalleella wi, Mwahaallimalleke ni musote wang'ombaaka, khamwaawore ottaphullella mwamboolla.

¹⁹ Vano Munepa wa Apwiya waamukitthella Samisoni mwamasiva nave Samisonooyo aaya o Ashikeloni awiipha athu 30 a mwiillaponimmo nave aawaakha ddoowara ddiwa dda nllapo na ehakallallo addivelleella wa ayo yattaphullelle mwambaalle. Nave aahokollweella o enyumba yaattiitthinnya ashille murima.

²⁰ Enthawi yeeyo attiitthinnya a mwaara Samisoni yaamutthelliha wa mukhwaaye a Samisoni oyo aari oomuvelleella vookwatini valle.