Oweeruza 13 - Mawu a Mulluku

Oyariwa wa Samisoni

¹ Aisraele yaheerattho ddoonanara vamiitthoni va Apwiya. Vano Apwiya yahaavelleella m'mattani mwa Afilisti wa miyakha 40.

² Enthawi yeeyo o Zora waakhalla muthu mmodda Mudani, nnddina naye Manowa. Mwaariye khaari ni anamwani, khaayara.

³ Mungelo a Apwiya aamooneyella mutthiyanooyo amulleella wi, “Ngoonani naari ophiyera ollello muhinna anamwani koma muneerokhalla ni erukullu nave muneeromuyara mwaana aamullopwana.

⁴ Vano chenjerani, muhinamuwiryaka vinyo apaalle erive yoolezeliha. Nave muhinachaka eri ello yooripiha.

⁵ Vawi muneerokhalla ni erukullu nave muneeromuyara mwaana aamullopwana. Mwaanooyo ayariwa, muhiwe mumuchema vawi ootthoolleyella wa Mulluku ovenyera oyariwa waye monga Munaziri.* Nave aneerewaamba waavullusa Aisraele wa Afilisti.”

⁶ Vano mutthiyanooyo aamulleella mamune wi, “Muthu a Mulluku aawa wuno nave ekhovaaye yaari yawoopiha wunchichi wonanko ekhove ya mungelo a Mulluku. Ngaamukohille nko anavenyereeye, khaakilleelle nnddina naye.

⁷ Koma aakilleella wi, ‘Muneerokhalla ni erukullu nave muneeromuyara mwaana aamullopwana. Vano muhinamuwiryaka vinyo apaalle erive yoolezeliha nave muhinachaka erive ello yooripiha, ekaamba yawi musombooyo aneerokhalla ootthoolleyella wa Mulluku monga Munaziri ovenyera oyariwa waye ophiyera okhwa waye.’ ”

⁸ Vano Manowa aavekella wa Apwiya wi, “Nyu Apwiya, Mukaakhullelle wi muthu oyo mwamurumalleenyu awettho, anihuddihe nnddo ninaphwanelleehu omweerella musombwe anaayariwooyo.”

⁹ Mulluku ahiiwa nivekello na Manowa nave mungelo a Apwiya aawattho wa mutthiyanoolle amuphwanya akeraatthille m'matani. Koma mamune, Manowa, khaarivo.

¹⁰ Mutthiyanoolle aathamaka amulleella mamune wi, “Muthu olle awiille nllaponne ookooneyellattho.”

¹¹ Vano Manowa aatimulla amuthwara mwaariyooyo aphiya nko waari muthooyo amukoha wi, “Ethiyo tti nyuwaano mwallotille ni amwaarakaalla?” Olliye ahaakhulla wi, “Ee, tti meene.”

¹² Manowa aamukoha wi, “Vano nnddo mwallotilleenyu ddeereya, musombooyo anaakhalleke mwawiidde nave anaaweereke tini?”

¹³ Mungelo a Apwiyoolle aamulleella Manowa wi, “Ddittheddene kamulleelleemi mwaariyo addipwatheke.

¹⁴ Ahicheke erive ello yoovenyera o mpesa nave ahimuwiryeke vinyo apaalle yoolezeliha apaalle ocha erive ello yooripiha. Asunge m'murimani mwaye nnddo kamulamulalleemi.”

¹⁵ Manowa aamulleella mungelo a Apwiyoolle wi, “Nuuselliheni voowoosellani musaanaapuri.”

¹⁶ Koma mungelo a Apwiya aamulleella Manowa wi, “Naari mukisellihe, mi ngicha. Koma wakhalla mukutho wooshellelliha, muwuvelleelle wa Apwiya.” (Enthawi ettheeneeyo Manowa khaadduwella wi tti mungelo a Apwiya.)

¹⁷ Vano Manowa aamulleella mungelooyo wi, “Nilleelleni nnddina nanyu wi nuuriihekeni, ddeereya nndda mullotilleenyu.

¹⁸ Mungelo a Apwiya aamukoha Manowa wi kaambiiwa tini munapaalleenyu wi mudduwelle nnddina naka? Tti nnddina noottikhiniha.”

¹⁹ Enthawi yeeyo Manowa aamukusa musaanaapuri ni yoocha ya ddoohata avelleella mukutho vanllukuni wa Apwiya, ayo yeerille ddoottikhiniha Manowa ni mwaariye yoonaka.

²⁰ Mallumi amunllo yakhariiwa ovenyera vanikuwani, mungelo a Apwiyoolle aawella nimodda ni munllooyo, Manowa ni mwaariye yoonaka. Vano alliwaayo yaakonaatthi moopopheya ekhove ddiwa vatthi.

²¹ Mungelo a Apwiyoolle khaawooneyillettho wa Manowa ni mwaariye. Sika Manowa aadduwella wi aari mungelo a Apwiya.

²² Vano Manowa aamulleella mwaariye wi, “Hi nineerokhwa vawi noomoona Mulluku!”

²³ Koma mwaariyoolle aallota wi, “Apwiya yapaallaka oniipha, kheyaawaakhelle mukutho wooshellelliha ni wa yoocha. Navettho kheyaanoonihelle ddeko ddittheddenenndda apaalle onilleella ddeko ddawi ddiidda.”

²⁴ Vano mutthiyanoolle aamuyara mwaana aamullopwana, amuvaha nnddina nawi Samisoni. Musombooyo ahunnuwa nave Apwiya yaamudalisa

²⁵ Vano munepa a Apwiya ahaamba omuvaha masiva akhalleeye omisasani dda Adani, variyari va Zora ni Eshitaoli.