Oweeruza 12 - Mawu a Mulluku

Yefita ni Aefuremu

¹ Aefuremu yaakhozeka wi yawane ekhoto nave yaallapuwella o Zafoni yamukoha Yefita wi, “Kaambiiwa tini wallapuwalleewe wawanaka ekhoto ni Aamoni, ohinilleelle wi nithaanane? Nnaaka nihelle munllo enyumbaaweella weyaano ori mwemmu.”

² Yefita aawaakhulla wi, “Mi ni athwaaka naakangana wunchichi ni Aamoni. Kaawiithanani koma khamwaawiille wi mukivulluse wa alliwaayo.

³ Vano koonille wi khamunapaalla okivullusa, kaahiya murimaaka vooswaani killapuwa muhinje wa Yordani kawanana Aamoni. Apwiya yahaavelleella m'mattani mwaka. Kaambiiwa tini ollellova munaweenyu wi muwaneke ekhoto ni miyaano?”

⁴ Vano Yefita ahaatthukumaniha athu attheene a o Giliyadi yawana ekhoto ni Aefuremu. Vano Agiliyadaayo yahaagonjiha Aefuremu ekaamba yawi Aefuremwaayo yaallota wi, “Nyu Agiliyadi tti athu oothawa o Efuremu, oovenyera variyari va Aefuremu ni Amanase.”

⁵ Vano Agiliyadi yaawaakha Aefuremu madoko a muhinje wa Yordani. Arive muthu oothawa o Efuremu allota wi, “Kaakhullelleni wi killapuwe,” Agiliyadi yaanamukoha wi, “Ethiyo weyaano ori Muefuremu?” Olliye aakhulla wi, “Iyaayi,”

⁶ alliwaayo yaanamulleella wi, “Llota wi, ‘Shiboleti.’ ” Muthooyo allota wi, “Siboleti,” vawi khaawora oromolla phaama mawaayo, yaanamuphara emwiipha vaavo vamadokoni a muhinje wa Yordani. Enthawi yeeyo vahiiphiwa Aefuremu 42,000.

⁷ Yefita aaweeruza Aisraele wa miyakha mitthanu ni mmodda. Vatulli viwa Yefita Mugiliyadi, aakhwa, avitthiwa mu mmodda mwa mizinda dda Giliyadi.

Ibizani, Eloni ni Abidoni

⁸ Akhwille Yefita, Ibizani a o Betelehemu aaweeruza Aisraele.

⁹ Olliye aakhalla ni anamwani aallopwana 30 ni aatthiyana 30. Ahaatthelliha anaaye 30 wa athu ayo ehiri a nlloko naye. Nave ahaakusella anaaye 30 aallopwanaalle atthiyana eelleto yaatthella. Ibizani ahaahoollella Aisraele wa miyakha mitthanu ni miilli.

¹⁰ Vano aakhwa avitthiwa o Betelehemu.

¹¹ Ibizani akhwille, Eloni a o Zebuloni ahaahoollella Aisraele. Ahaahoollella Aisraele wa miyakha khumi.

¹² Vano aakhwa avitthiwa o Ayaloni ellapo ya Zebuloni.

¹³ Akhwille Ayaloni, Abidoni mwaana a Hilele a o Piratoni ahaahoollella Aisraele.

¹⁴ Olliye aakhalla ni anamwani aallopwana 40 edduullu 30 ayo yaari oowella va abulu 70. Olliye ahaahoollella Aisraele miyakha mitthanu ni miraru.

¹⁵ Vano Abidoni aakhwa avitthiwa o Piratoni ellapo ya Efuremu, o miyaango dda Aamaleke.