Oweeruza 11 - Mawu a Mulluku

Yefita

¹ Yefita Mugiliyadi aari akhoto amasiva. Attiitthinnya yaari Giliyadi, amennya yaari mutthiyana ooraruwa.

² Giliyadi aakhallattho ni mwaariye oyo amuyarelleeye anamwani. Vano anamwani yaayo yunnuwalliiwa yaamwiikariha Yefita emulleella wi, “Khawaakhellana yoohallana ya attiitthiihu vawi weyaano tti mwaana a mwaariwa mmodda.”

³ Sika Yefita ahaathawa abalaayaayo akhalla mu ellapo ya Tobu. Wenko ahaakopa akhwaaye oohikhalla ni mutteko wi emuthwareke nave yoonongeke ddeko nimodda.

⁴ Viviralle enthawi Aamoni yaawana ekhoto ni Aisraele.

⁵ Aamoni ewanaka ekhoto ni Aisraele, attekweene a o Giliyadi yaaya wi yamukuse Yefita o ellapo ya Tobu.

⁶ Attekweenaayo yaamulleella Yefita wi, “Hanko wi wakhalle oohoollellaahu voowanani ekhoto ni Aamoni.”

⁷ Koma Yefita ahaakoha attekweene a o Giliyadi wi, “Ethiyo nyuwaano khamwaakiitalle mukiikara mu enyumba yaattiitthaaka? Kaambiiwa tini muwiilleenyu wa miyaano muriinyu mu ddookatamiha?”

⁸ Vaavo attekweenaayo yaamwaakhulla Yefita wi, “Ella sika niweelleehu wa weyaano ollellova wi othaanane ni hiyaano wi nawane ni Aamoni nave wakhalle owaahoollella athu attheene a o Giliyadi.”

⁹ Yefita ahaalleella attekweene a o Giliyadaayo wi, “Mwakihokollosella owanihu wi nawane ekhoto ni Aamoni nave Apwiya yakikavihera waagonjiha kineerokhalla awuulamulellani?”

¹⁰ Attekweene a o Giliyadaalle yaamulleella Yefita wi, “Nohaakhullella nndda onalloteewe Apwiya ekhalle mbonaahu.”

¹¹ Sika Yefita aathaanana ni attekweene a o Giliyadaayo nave athu a wenko yaamweera oolamulella ni oohoollelliiwa. Vano Yefita aallota mawaaye mattheene vamiitthoni va Apwiya o Mizipa.

¹² Vano Yefita aarumiha othenga wa mwene a Amoni wi, “Ethiyo kuulakwelleni tini wi muwaneke ekhoto ni ellapwaaka?”

¹³ Mwene a Amonooyo aawaakhulla oorumiwa ni Yefitaalle wi, “Ekaamba yawi Aisraele yavenyeriiwa o Iguputo yahaakha ellapwaaka waambeella o muhinje wa Arinoni ophiya o muhinje wa Yaboki ophiyattho o muhinje wa Yordani. Vano mukihokolloselle ellapwaaka mwamurendelle.”

¹⁴ Yefita ahaarumihattho amithenga wa mwene a Amoni,

¹⁵ yallota wi, “Yefita anallota wi Aisraele kheyaawaakhille ellapo ya Amowabu apaalle ellapo ya Aamoni.

¹⁶ Koma Aisraele yavenyeriiwa o Iguputo yaweelle muchipululuni yaphiya o Enyanja Yoofiira yaphiyattho o Kadeshi.

¹⁷ Enthawi yeeyo Aisraele yaarumiha othenga wa mwene a o Edomu emulleella wi, ‘Pepaani munaakhullelle wi niweelle mu ellapwaanyu.’ Koma mwene a o Edomu khaapaallille wiiwa ddennddo. Aarumiha othenga mmodda wa mwene a o Mowabu, olliyettho khaawaakhullenlle ddennddo. Sika Aisraele yaakhalla o Kadeshi.

¹⁸ Vano Aisraele yaatimulla olendwiiwa oweella muchipululuni yaapheella ellapo ya Edomu ni ellapo ya Mowabu yaphiya wookhuma nndduwa wa muhinje wa Arinoni. Nave yaatthipella misasa ddiwa vaavo nave kheyaavollowille mu ellapo ya Mowabu vawi muhinje wa Arinoni waari malire a ellapo ya Mowabu.

¹⁹ Vano Aisraele yaarumiha othenga wa Sihoni mwene Aamori oyo alamulella o Heshiboni. Aisraelaayo yaamuveka wi, ‘Pepaani munaakhullelle wi niweelle mu ellapwaanyu voorowani owanihu.’

²⁰ Koma Sihoni khaawaaroromenlle Aisraele wi eweelle mu ellapwaaye. Vano Sihoni ahaatthukumaniha akhotwaaye, etthipella misasa ddiwa ddakhoto o Yahazi ewana ekhoto ni Aisraele.

²¹ Koma Apwiya Mulluku a Israele yaamuvelleella Sihoni ni Athwaaye m'mattani mwa Aisraele. Sika Aisraele yahaakha echigawo ettheene ya ellapo ya Aamori ayo yakhalla mu ellapweeyo.

²² Yahaakha ellapo ettheene ya Aamori ovenyera o muhinje wa Arinoni ophiya o muhinje wa Yaboki nave ovenyera ochipululuni wookhuma nndduwa ophiya o muhinje wa Yordani, woovollowa nndduwa.

²³ Sika tti Apwiya Mulluku a Aisraele oyo awikarihallemo Aamori wi Aisraele ekhallekemo. Vano nyuwaano munapaalla munaakhettho yoohallanaahu?

²⁴ Khallani mu ellapo eyo Kemoshi mullukwaanyu uuvahilleeyeni wi ekhalle yoohallanaanyu. Vano attheene ayo Apwiya Mullukwaahu ewiikarilliiwa vamiitthoni vahu, ddayiwa ddineerokhalla yoohallanaahu.

²⁵ Navettho ethiyo nyuwaano moomukhwaranya Balaki, mwaana a Zipori mwene a o Mowabu? Ethiyo olliyoolle aambilleke waallika Aisraele apaalle owanana ekhoto?

²⁶ Wa miyakha 300 Aisraele yakhalla o Heshiboni ni o Aroere ni matawoni mattheene oowaapheella owaakattho mizinda ddittheddene nnddo ddaari mukhwipi mwa muhinje wa Arinoni. Kaambiiwa tini mwahiwaakhilleenyu enthawi yeeyo?

²⁷ Vano miyaano nguulakwelleni koma nyuwaano sika munakilakwella voowanani ekhoto ni miyaano. Enaaweeruze tti Apwiya nave sika enaakamulle ollellova variyari va Aisraele ni Aamoni.”

²⁸ Koma mwene a Amoni khaapwathille mawu ayo Yefita arumihalleeye.

²⁹ Vano Munepa wa Apwiya aamukitthella Yefita atimulla aweella o Giliyadi ni o Manase ahokollweella o Mizipa akhwaranyella wa Aamoni.

³⁰ Yefita aallupella wa Apwiya wi, “Mwaavelleella Aamonaalla m'mattani mwaka,

³¹ arive muthu oyo anaawaambe okhuma mpa mwaka wi akichingamelle kaawaaka, kaagonjihalle Aamonaayo, anaakhalle aanyu nave kineeromuvelleella wi akhalle mukutho wooshellelliha.”

³² Sika Yefita aallapuwa aya wa Aamoni awanana ekhoto. Nave Apwiya yahaavelleella m'mattani mwaye.

³³ Aawiipha ovenyera o Aroere ophiyera vakhuviru ni muzinda wa Miniti, vamodda ddaari mizinda 20 navettho ophiya o Abele Keramimu. Sika Aamoni yaagonjihiwa ni Aisraele.

Mwaana aamutthiyana a Yefita.

³⁴ Vatulli viwa Yefita aahokollweella owaniwa o Mizipa. Vano ngoonani, mwanaye aamutthiyana aakhuma amuchingamella, iipaka ekoma nave iinaka. Olliye aari mwanaye mmodda yooyo. Khaarinattho arive mwaana, aamullopwana apaalle aamutthiyana.

³⁵ Yefita amoonille mwanaye, ahaahulla ddoowara ddaye allota wi, “Moowe kookhwa, we mwanaka, wookiphadda mutthoma nave wookiwiihella ddoohoosa dduullupalli vawi kaallupella wa Apwiya ni vayanoni vaka nave ngiwora wiinyipulla nnddo kallupenlleemi.”

³⁶ Mwaanooyo ahaakhulla wi, “Attiitthaaka vawi mwaallupella ni vayanoni vanyu, mweere nnddo mwallupenlleenyu. Vawi Apwiya ahuukaviherani wi muwiiphe adanaanyu.”

³⁷ Olliye ahaalleella attiitthinnyaayo wi, “Kuuvekeni ello emodda, mukihiye wa miyeri miilli wi keeteete ni anamwalli akhwaaka omiyaangoni wi kinlle wi kinaakhwe kiri namwalli.”

³⁸ Attiitthinnyaayo yaamulleella wi, “Khawe.” Yaamwaakhullella wi eeteete wa miyeri miilli. Sika namwallooyo aatimulla ni anamwalli akhwaaye eya omiyaangoni, yinllaka wi anaakhwe ari namwalli.

³⁹ Miyeri miillinndde ddimanlle aahokollweella wa attiitthinnya nave yaamweerella moollikana ni mmo yallupenlliiwa wa Apwiya. Nave namwallooyo aakhwa ahinakoneke ni mullopwana. Vano ella yaatthattuwa makhallello a athu a mu ellapo ya Aisraele,

⁴⁰ wi orive muyakha anamwalli a Israele yaanaya yinllaka maliro a mwaana a Yefita Mugiliyadi wa mallapo masese vamuyakhani.