Oweeruza 10 - Mawu a Mulluku

Tola

¹ Akhwille Abimeleki vaavenya muthu mmodda wi aavulluse Aisraele. Olliyoolla aari Tola mwaana a Puwa edduullu ya Dodo, a nlloko na Isakara oyo akhalla o Shamiri ellapo yamiyaango ya Efuremu.

² Aaweeruza Aisraele wa miyakha 23. Vano aakhwa nave aavitthiwa o Shamiri.

Yairo

³ Akhwille Tola vaavenya Yairo Mugiliyadi oyo aweeruzalle Aisraele wa miyakha 22.

⁴ Olliyoolla aakhalla ni anamwani 30 oowella va abulu 30. Anamwanaayo yaakhallattho ni mizinda ddiwa 30 nnddo ophiyera ollello ddinaromolliwa wi Havoti Yairo mu ellapo ya Giliyadi.

⁵ Yairo aakhwa nave aavitthiwa o Kamoni.

Aamoni enaahoosa a Israele

⁶ Aisraele yaheerattho ddoonanara vamiitthoni va Apwiya voowaarumeyellani Abaala ni Ashitaroti, milluku dda o Siriya, o Sidoni ni o Mowabu, milluku dda Aamoni navettho milluku dda Afilisti. Aisraele yahaahiya Apwiya ohaarumeyellattho.

⁷ Vano Apwiya yahaashella murima nave yahaavelleella m'mattani mwa Afilisti ni Aamoni.

⁸ Muyakha yooyo athwaayo yahaagonjiha Aisraele nave yaamba waahoosa. Wa miyakha 18 yaakhalla yaahoosaka Aisraele attheene ayo yaari vakhopella va muhinje wa Yordani mu ellapo ya Aamori o Giliyadi.

⁹ Nave Aamoni yaallapuwa muhinje wa Yordani yawana ekhoto ni a nlloko na Yuda, na Benjamini ni na Efuremu, sika Aisraele yaahoowa wunchichi.

¹⁰ Vano Aisraele yahinllella wa Apwiya wi, “Nohuuchimwellani vawi nohuuhiyani nyu Mullukwaahu nave nohaarumeyella Abaala.”

¹¹ Apwiya yahaakoha Aisraele wi, “Ethiyo ngaawuuvullusalleni wa Aiguputo, Aamori, Aamoni ni Afilisti?

¹² Asidoni, Aamaleke ni Amaoni yahuunyingallellani. Mwinlleelle wa miyaano wi kahuuvullusani m'mattani mwiwa.

¹³ Koma mookihiya, munarumeyella milluku ddimodda. Ekaamba ya yeella nguuvullusanittho.

¹⁴ Khaweni mwinllelleke milluku nnddo mudditthoonlleenyu wi dduuvulluseni va enthawi ya ddookatamiha ddanyu.”

¹⁵ Vano Aisraele yaallota wa Apwiya wi, “Iyaayi, hiyaano noochimwa, neerelleni erive ello eyo enuuddivellani. Koma pepaani ninuuvekani wi munivulluse ollellove vaava.”

¹⁶ Sika yaavenyihavo milluku ddeelletonndde yaamba waarumeyella Apwiya nave Apwiya yaamoriwa ethakaraka voowonani Aisraele ehoowaka.

¹⁷ Enthawi yeeyo Aamoni yaatthukumana wi ewaneke ekhoto nave yaatthipella misasa ddiwa o Giliyadi. Nave Aisraele yaatthukumana etthipella misasa ddiwa o Mizipa.

¹⁸ Vano athu, oohoollella a Agiliyadi yahaamba okohana wi, “Ethiyo ttaani anaawaambe owana ni Aamonaalla? Olliye sika anaakhalle oohoollella a athu attheene a o Giliyadi.”