Oweeruza 1 - Mawu a Mulluku

Ayuda ni Asimeoni enaaphara a Adonibezeki

¹ Yoswa akhwille, Aisraele yahaakoha Apwiya wi, “Tti nlloko nene niivi ninaawaambe owana ni Akanani?”

² Apwiya yaawaakhulla wi, “Nlloko na Yuda sika ninaawaambe oyaawo. Kohaavaha ellapweeyo wi eyilamulelle.”

³ Vano Ayuda yahaalleella abaliiwa, athu a nlloko na Simeoni wi, “Hankoni niyeewo nimodda mu ellapo eyo Apwiya yanikawenlliiwa wi nawane ni Akanani. Vatulli viwa naheenettho nineeroya nimodda mu ellapo eyo yuukawenlliiwani.” Sika Asimeoni yaathaananana.

⁴ Attheenaayo yaayaawo nave Apwiya yahaakavihera waagonjiha Akanani ni Aperezi nave athu ayo yagonjihiwe va Bezeki yaari 10,000.

⁵ Vano yaakumana ni akhoto a mwene Adonibezeki o Bezeki nave yaawanana yaagonjiha a Kanani ni Aperezi.

⁶ Koma mwene Adonibezekoolle aathawa koma yaamuthamakella emuphara, emuphadda eyaalla ddaye dduullupalli dda m'mattani ni ddam'manyalloni.

⁷ Vano Adonibezekoolle aallota wi, “Mamwene 70 oophaddeya eyaalla dduullupalli dda m'mattani ni ddam'manyalloni yaanatota enyenyeri vatthi va tebulwaaka. Vano Mulluku ookihokollosella nnddo kaaweerelleemi,” Vano aakuselliwa o Yerusalemu. Nave aakhwella wenko.

Ayuda enagonjiha muzinda wa Yerusalemu ni wa Hebroni

⁸ Vano Ayuda yaawana ekhoto ni athu a muzinda wa Yerusalemu nave yahaagonjiha ewiipha ni nsupada nawiisha athu attheene nave ewuhella munllo muzindooyo.

⁹ Ayudaayo yaaya yawana ni Akanani ayo yakhalla mu ellapo yamiyaango, ellapo yoomwera ni yamutapo.

¹⁰ Yaawanattho ni Akanani ayo yakhalla o Hebroni (muzinda oyo khalle waromolliwa Kiriyati Ariba). Wenko yahaagonjiha mabanja a Sheshai, Ahimani ni Talimai.

Otiniyele anagonjiha muzinda wa Debiri

¹¹ Evenyaka wenko yaaya yawana ni athu a o Debiri. Muzinda yoolla khalle waromolliwa wi Kiriyati Sefere.

¹² Vano Kalebe aallota wi, “Akhoto muullupalli oyo anaawane ni athu a muzinda wa Kiriyati Sefere nave aagonjiha, kineeromwinnya mwanaka, Akisa wi akhalle mwaariye.”

¹³ Kalebe mung'onong'onwaaye, Otiniyele, mwaana a Kenazi, ahaagonjiha athu a muzinda yoolla. Sika Kalebe aamwinnya mwanaye, Akisa wi akhalle mwaariye.

¹⁴ Nllapo nimodda, Akisooyo aphiyalle, Otiniyele aamuwatihera mwaariyoolle wi aveke emata wa Kalebe attiitthinnya. Akisa akitthalle vabulunaaye, Kalebe aamukoha wi, “Ethiyo onapaalla tini?”

¹⁵ Vano aallota wa olliye wi, “Kinapaalla wi mukivahe madaliso. Vawi mookivaha ellapo yoomwera, kivahenittho aneetuutu.” Sika Kalebe aamuvaha aneetuutu a omutundani ni a mutapo.

Ayuda ni Abenjamini enaagonjiha adaniiwa

¹⁶ Vano edduullu dda attiitthinnya a mwaara a Mose, Mukeni, ddaathanana ni athu a nlloko na Yuda ovenyera o Yeriko, muzinda wa miteekho ddamikwarangwa ophiya o echipululu ya Yuda, vakhuviru ni omwera wa echigawo ya Aradi, ellapo ya Yuda, yakhalla ni athwaayo.

¹⁷ Ayuda yaathanana ni abaliiwa Asimeoni nave yahaagonjiha Akanani ayo yakhalla m'muzindani wa Zefati, yoononga muzindooyo. Sika muzindooyo yaawuvaha nnddina nawi Horoma.

¹⁸ Ayuda yahaagonjihattho athu a muzinda wa Gaza ni ezigawo ddittheddene ddawaapheella, athu a muzinda wa Ashikeloni ni ezigawo ddittheddene ddawaapheella, athu a muzinda wa Ekeroni ni ezigawo ddittheddene yalamulelliiwa,

¹⁹ Apwiya yaari ni Ayuda ewiikariha athu a mu ellapo yamiyaango koma kheyaaworille waagonjiha athu ayo yamakille mutapo vawi yaakhalla ni magareta a mikoko.

²⁰ Muzinda wa Hebroni waavahiwa wa Kalebe moollikana ni mmo allotelleeye Mose. Nave Kalebe aawiikarihamo m'muzindanimmo malloko mararu a Anaki.

²¹ Koma Abenjamini kheyaawiikarihallemo Ayebusi ayo yakhalla mu Yerusalemu. Sika Ayebusaayo ennakhalla ni Abenjamini mu Yerusalemu ophiyera ollello.

Malloko a Yosefe anaagonjiha Abetele

²² Malloko a Yosefe alliwattho yaaya yawana ni athu a muzinda wa Betele nave Apwiya yaari ni alliwa.

²³ Yahaaruma athu wi yazonde muzinda wa Betele, (oyo khalle waromolliwa wi Luzi).

²⁴ Athu oozondaayo yaamoona muthu akhumaka m'muzindanimmo emulleella wi, “Pepaani, nitthoonyihelle ettilla yoovollowella m'muzindanimmu, hiyaano nineeroweerella echifundo.”

²⁵ Muthooyo ahaatthoonyihella ettilla yoovollowella m'muzindanimmo. Alliwaayo yaawiipha athu attheene m'muzindanimmo ni masupada koma yaamuhiya muthoolle ni nibanja naye enarowa.

²⁶ Muthoolle aaya mu ellapo ya Ahiti amakawo muzinda awuvaha nnddina nawi Luzi. Nenno tti nnddina niwa ophiyera ollello.

Athu ayo Aisraele yahiwiikarihalliiwa

²⁷ Koma athu a nlloko na Manase kheyaawiikarihalle athu ayo yaaphwanyilliiwa mu mizinda dda Betesheani ni matawoniiwa, Taanaki ni matawoniiwa, Dori ni matawoniiwa, Ibleamu ni matawoniiwa, Megido ni matawoniiwa. Sika Akanani yaavirellella okhalla mwiillaponimmo.

²⁸ Aisraelaayo yatthattuwalliiwa athu amasiva yahaamba waaphariha Akananaalle mutteko wathangata koma kheyaawiikarihallemo.

²⁹ Aefuremu kheyaawiikarihalle Akanani ayo yakhalla o Gezere. Koma Akananaayo yaavirellella okhalla nimodda ni alliwaayo.

³⁰ Azebuloni kheyaawiikarihalle athu ayo yakhalla mu mizinda dda Kitironi ni Nahaloli. Koma Akananaayo yakhalla nimodda ni alliwaayo nave yaatthattuwa akaporwiiwa.

³¹ Aasheri kheyaawiikarihalle athu ayo yakhalla mu mizinda dda Ako, Sidoni, Alabu, Akizibu, Heliba, Afeki ni Rehobu.

³² Koma Aasheri yaanakhalla nimodda ni athu a mu ellapweeyo, Akanani, vawi kheyaawiikarihalle Akananaayo.

³³ Anafutali kheyaawiikarihalle athu ayo yakhalla mu mizinda dda Beteshemeshi ni Betanati koma yaanakhalla nimodda ni athu a mu ellapweeyo, Akanani. Koma yahaatthattusa akaporwiiwa athu ayo yakhalla mu mizinda dda Beteshemeshi ni Betanati.

³⁴ Aamori yaawiikara athu a nlloko na Dani mu ellapo yamiyaango nave kheyaawaakhullelliwe wi ekitthelle mutapo.

³⁵ Aamori yaavirellella okhalla omwaangoni wa Heresi, o Ayaloni ni o Shaalibimu. Koma athu a nlloko na Yosefe yaatthattuwa amasiva nave yahaatthattusa Aamoraayo akaporwiiwa.

³⁶ Malire a ellapo ya Aamori yaambeelle omutundani wa Akarabimu oweella o Shela ophiyera omiyaangoni.