Oollalleya 9 - Mawu a Mulluku

¹ Ddittheddene kaaddisunga m'murimani nave kaasimikiza wi athu oolungama ni athu eezeru vamodda ni mitteko ddiwa eri m'mattani a Mulluku. Koma khaavo muthu anadduwella ddiri muhoollo mwaye naari ddiri dda echikondi apaalle dda wiitana.

² Athu attheene ddinaamorella tti ddimoddamoddave, oolungama ni oohilungama, aweella ni ooripihiwa, oovelleella mukutho ni oohivelleella. Aphaama ennaphwanaphwana ni oonanara. Oollupella ennaphwanaphwana ni awoova ollupella.

³ Yoonanara wunchichi mwa ddittheddene ddaweereya vatthimva tti yawi otulli omoddamoddave yoolla onnaamorella attheene. Emoddattho tti yawi mirima dda athu tti ddooddalla ni ddoonanara ni ddaanepa eri akumi nave vatulli viwa ennakhwa.

⁴ Komave ayo eri ni okumi ennakhalla ni etiyerello. Vallethi mwanapwa mukumi annakhwaranya mukango wookhwa.

⁵ Akumi ennadduwella wi eneerokhwa koma ookhwa khenadduwella ello, khenathuviwa nave khenuupuwelliwa.

⁶ Echikondiiwa wiitana wiwa ni ehachiiwa ddaamalla khalle. Nave va ddittheddene ddineereya vatthimva kheyaakhellavo ello.

⁷ Vano khawe wache yoochaawo moohakallalla nave wamuwirye vinywaawo ni murima woohakallalla vawi Mulluku ohaakhullella khalle ddaweera ddawonnddo.

⁸ Enthawi ddittheddene owareke ddoowara ddaphaama enthawi ddittheddene nave wiihelleke makhura owiitthoni.

⁹ Ohakallalleke ni okumi vamodda ni mwaariyo onamukondeewe va mallapo a okumaawo woohikhalla ni muttekoolla Mulluku uuvahilleeye vatthimva. Echigawaawo tti yeellave onatiyerelleewe va okumaawo navettho va mitteko ddawo nnddo onaddiphareewe vatthimva.

¹⁰ Erive ello munaaweerekeenyu ni masivaawo mattheene. Vallethi onipuroni na ookhwa onayeewenko khori mutteko, oganiza, ezeru apaalle odduwella.

¹¹ Kohoonattho vatthimva wi oopambana voothamakani khe yaayove enathamaka wunchichi, oopambana vakhotoni khe yaayove enallipa, ookhalla ni yoocha khe yaayove eri ni ezeru, eeyuuma khe yaayove edduwenlle ddinchichi nave khe yaayo enakondelliwa eri ni eruso. Attheenaayo ekari enaamorella va enthawiiwa.

¹² Muthu khanadduwella enthawaaye. Monga mmo ehomba enakolelliwiiwa munthavini, epallame enakolelliwiiwa m'musamphani, tti emoddamoddave yeeyottho athu ekoliwe m'musamphani va enthawi yoonanara, otulli waamorella moorurumusa.

Maganizo eezeru ni ookarangeya

¹³ Kahoonattho vatthimva ello emodda yeezeru nave kaayoona wi tti ello yuullupalli.

¹⁴ Vaakhalla muzinda mung'onong'ono oyo waari ni athu ooyeva. Vano vaaphiya mwene amasiva wi awanena ekhoto nave awaapheella ni misasa ddakhoto.

¹⁵ Koma m'muzindanimmo mwaakhalla muthu mmodda oohoowa koma eezeru. Muthu yoolla aavullusa muzindooyo ni ezeru ddayennddo koma khaarivo naari mmodda oyo amuupuwelle.

¹⁶ Sika miyaano kinallota wi ezeru tti ddookhwaranya masiva naari athu kheyiiwa ezeru dda muthu oohoowa nave wi khepwatha mawaaye naari vang'ono.

¹⁷ Mawu a muthu eezeru oollotiwa mwawiithaalla tti ookhwaranya okhuwa wa oolamulella variyari va mulloko wa ookarangeya.

¹⁸ Ezeru tti ddookhwaranya ezida ddakhoto koma oochimwa mmodda annoonongiha ddaphaama ddinchichi.