Oollalleya 7 - Mawu a Mulluku

Ezeru ni okarangeya

¹ Epilli yaphaama ennakhwaranya makhura awunkhella oowallamella mutengo. Nllapo nookhwa tti nookhwaranya nllapo nooyariwa.

² Oya omalironi tti wookhwaranya oya omachellelloni. Vawi okhwa sika mamallihello a athu attheene, vano akumi eganizeke phaama dda ddenndda.

³ Omoriwa ethakaraka tti wookhwaranya ottheya ekaamba yawi naari ekhove emonre murima onnawora ohuddera.

⁴ Murima wa muthu eezeru onnaganizera dda okhwa. Koma murima wa muthu ookarangeya onnaganizera dda ohakallalla.

⁵ Wiiwa ohumullulla wa muthu eezeru tti wookhwaranya wiiwa machipo ootetheella dda athu ookarangeya.

⁶ Ottheya wa muthu ookarangeya tti wonanko ophomuwa wa munllo vatthi va epalli. Ddennddattho khaddinna mutteko.

⁷ Ddawoona, waanyingallella amodda onnamukarangeyiha muthu eezeru nave waakhella ddamukaphwani onnoononga oganiza phaama.

⁸ Mamallihello a ello tti ookhwaranya maambeello. Murima woovillella onnakhwaranya murima wawiitukhulla.

⁹ Ohinaakuvaka osha murima vawi osha murima tti wa athu ookarangeya.

¹⁰ Ohinakohaka wi, “Kaambiiwa tini mallapo akhalle yaakhwarannyiiwa allello?” Wenko khe okoha weezeru.

¹¹ Ezeru tti ddaphaama wonanko yoohallana, ddinnamupindulella arive muthu mukumi.

¹² Ezeru ddinnateteza wonanko makobiri. Mphuro wa odduwella tti wawi ezeru ddinnaasunga athu ni okumi.

¹³ Ganizera dda mutteko wa Mulluku. Ttaani anaawore wookolla eyo Mulluku akhoromanihalleeye?

¹⁴ Ohakallalleke ekari yuumorella nave otulli wuumorella wuupuwelleke wi anamoriha ekari ni otulli tti Mulluku. Aneera nndda wi muthu ahidduwelleke nnddo ddinaamweereyelle muhoollo.

¹⁵ Va okumaaka woohikhalla ni muttekoolla kohoona ddeko piilli, enthawi emodda athu oolungama ennoonongeya koma yeeraka ddoolungama. Mwaamodda athu oonanara ennakhalla ni okumi woorekama koma yeeraka ddoonanara.

¹⁶ Sika ohinoonjeresesa echilungamo apaalle waatesesa ezeru. Onaakhwelle tti nivuddo?

¹⁷ Ohinanaresese apaalle okarangeyesesa. Onaakhwelle tini enthawaawo ehinakwakhwane?

¹⁸ Tti waphaama wi othwareke ettilla emodda komattho oohitathilla emoddeeyo. Muthu oomoova Mulluku ttuupindulana.

¹⁹ Ezeru ddinnamuvaha muthu masiva waakhwaranya oohoollella khumi a m'muzinda.

²⁰ Ddawoona va ellapo yavatthi khaavo muthu aneera ddoolungama woohichimwa naari vang'ono.

²¹ Ohinapwathaka ddittheddene ddinallota athu wi ohimwiiwe mullupa muttekwaawo uuruwanaka

²² vawi m'murimani mwawo onnadduwella wi weyaanottho enthawi emodda onnaaruwana athu amodda.

²³ Ddittheddenenndda kaaddeesa ni ezeru ddaka nave kaallota wi, “Kineerokhalla eezeru.” Koma ezerunnddo ddaari wuuteete ni miyaano.

²⁴ Erive ello eri woorekamellesesa ni woowallamellesesa. Ttaani anaawore oyiphwanya?

²⁵ Vano kaahiyavo murima wi kiddidduwelle, kiddimolleelle nave kiddaashaashe ezeru ni mmo munakhallella ddeko. Kaapaallattho wiiwesesa onanara wa okarangeya navettho woopiha wa anepa.

²⁶ Kaaphwanya emodda yoovoreya okhwaranya okhwa. Ello yeeyo tti mutthiyana oyo ari wonanko musampha, murimaaye tti wonanko nthavi nave mattaaye tti wonanko onyolo. Muthu oomuhakallalliha Mulluku annamuthawa mutthiyanooyo koma oochimwa annaphariwa ni olliye.

²⁷ Nnddathi sika kaddiphwanyilleemi vootthukumanihani nndda ni nndda wi kidduwelle mmo ddeko ddinakhallelliiwa.

²⁸ Murimaaka waaddaashaashattho koma oohiddiphwanya. Kaamuphwanyille mullopwana mmoddave oolungama variyari va athu 1,000 koma mutthiyana oolungama ngaamuphwanyillevo variyari va athu attheenaayo.

²⁹ Kaddiphwanyilleemi tti ddawi Mulluku voomuphatusani muthu aamuvaha murima woolungama koma athu enathwara ettilla ddayiwaddayiwa ddinchichi.