Oollalleya 6 - Mawu a Mulluku

¹ Vatthimva vookhalla yoonanara emodda kiyoonilleemi eyo eri yoomukatamiha muthu.

² Mulluku annamuvaha muthu eyuuma, olemu ni ohirama ello eyo murimaaye wapaalliiwa koma woohimuvaha ekari yawi ahakallallena. Oohakallallana akhallaka mulleto. Ddenndda tti ddoohikhalla ni mutteko nave ddookatamiha ni ddoonanara wunchichi.

³ Naari muthu akhalle ni anamwani anchichi nave akhalle ni okumi wa miyakha ddinchichi naari miyakha ddayennddo ddaate mwawiidde koma ohihakallalla ni eyuumaaye nave makuthullellweene ahivitthiwe phaama. Miyaano kinallota wi muthooyo ookhwaranyiwa ni mwaana ookhote.

⁴ Mwaana ookhote annooneya enthawi yooyeva, arimeella mwiipiphini nave atiwalleya mwemmo.

⁵ Naari mwaana ookhotooyo ahoonille nndduwa apaalle odduwella erive ello komave anniithuuwa omukhwaranya muthu a okumi woorekamoolle

⁶ naari akhanlle ni okumi miyakha 2,000 koma woohoona ddaphaama. Ethiyo attheenaalla khenaya onipuroni nimoddamoddave?

⁷ Muthu annaphara mutteko wi aphwanye yoocha koma khanakwakhwanihiwana.

⁸ Vano muthu eezeru ari ni tini yoomukhwaranyana muthu ookarangeya? Ethiyo muthu oohoowa oodduwella weeta phaama variyari athu anaphuravo tini?

⁹ Wiimoona oweha tti wookhwaranya opaalla m'murimanimurimani. Ddennddattho khaddinna mutteko nave waashaasha ddenndda tti wiikatamiha.

¹⁰ Erive ello erivo yaavahiwa khalle nnddina. Mmo muthu akhallelleeye tti ddoodduwanyeya nave tti ddawiiweya wi khawora ovaanyihana ni oyo ari amasiva omukhwaranya olliye.

¹¹ Mawu yaata ddoohikhalla ni mutteko ddinnaatattho. Vano muthu aphurallevo tini?

¹² Ttaani anadduwella ddoomuddivella va enthawi yooyeva anakhalleeye ni okumi? Okumaaye tti wa mallapo ooyeva ni woohikhalla ni mutteko. Animoona ovirellella wonanko muuthuuchi. Ethiyo ttaani anaawore omutthopoollella muthu ddeereyille vatthimva muhoollo olliye akhwille?