Oollalleya 5 - Mawu a Mulluku

Ohinathamakellaka olonjeza

¹ Opwatheke phaama meetellwaawo waayaaka o enyumba ya Mulluku. Oyeellawo ohuddera tti wookhwaranya oyeellawo ovelleella mukuthove wonanko athu ookarangeya ayo ehinadduwella wi eyo eneeriiwa tti yoonanara.

² Ohinaakuvaka ollota ni ollupella wa Mulluku m'murimani mwawo. Vallethi Mulluku ari oddullu, weyaano ori vatthimva. Vano mawaawo ekhalleke ooyeva.

³ Waata wa ddookhupanya onnawiiha olloha woonanara nave waata wa mawu onnawiiha okarangeya.

⁴ Wallupella ello wa Mulluku ohinasellihaka oyeera vawi Mulluku khanahakallalla ni ddookarangeya. Nnddo oddillupenlleewe oddeere.

⁵ Ohillupella tti wookhwaranya ollupella koma oheera.

⁶ Vayanoni vawo vihuuchimwihe wi ohiye wallota wa mullupa mukutho wi, “Kaamoona ollota!” Kaambiiwa tini onapaalleewe omushiha murima Mulluku? Ethiyo onapaalla oononge nnddo oddipharelleewe mutteko?

⁷ Olloha waata ddinnaatattho ddoollota ddoohikhalla ni mutteko. Koma weyaano omutitimiheke Mulluku.

Okumi khonna mutteko

⁸ Wawoona athu oohoowa ehoosiwaka mwiillaponi navettho yaakhiwaka murendelliiwa ni echilungamo mweekuku, ohittikhine. Vallethi oowehera muullupalli ookhallana mmodda muullupalli wunchichi oyo anamuwehera. Navettho vookhalla uullupalli wunchichi amodda ayo enaawehera.

⁹ Emata ennampindulella arive muthu koma mwene anapindulana wunchichi.

¹⁰ Athu ookonda makobiri khenakwakhwanihiwana. Emoddamoddave yeeyottho athu ookonda eyuuma, khenakwakhwanihiwa ni opindula. Ddennddattho khaddinna mutteko.

¹¹ Eyuuma yaata oochana eyuumeeyo ennaata. Vano mwaneena eyuumooyo anaphuravo tini? Khe wiimoona oyiweha?

¹² Mullupa mutteko annakona ekhove ddaphaama naari achille vang'ono apaalle wunchichi. Koma eeyuuma yinchichi khanakona ekhove.

¹³ Vatthimva vookhalla yoonanara emodda yookimoriha ethakaraka wunchichi eyo kiyoonilleemi. Eyuuma ennamuphoriiha mwaneena.

¹⁴ Moorurumusa eyuumeeyo ennoonongeya nave khanakhallana ello yawi amuhiyere mwanaye.

¹⁵ Monga mmo muthu ayarelliweeye ovenyera m'mirimani mwa amennya ahiwanre ello emoddamoddave yeeyo aneerorowa epwillimwinddive. Naari apharille mutteko wunchichi, kheyiivo eyo anaakuseeye.

¹⁶ Yeellattho tti yoonanara emodda yoomoriha ethakaraka wunchichi wi muthu anaarowe wonanko mmo aweelleeye. Vano mphurwaaye tti tini vawi apharelle mutteko nivuddo?

¹⁷ Mallapwaaye mattheene okumaaye waaddalla ni epiphi, ethakaraka, ereta ni osha murima.

¹⁸ Kheyiivo emodda yaphaama wa muthu okhwaranya yoocha, yoowirya ni ohakallallella mitteko ddaye nnddo muthu anaphareeye vatthimva, mallapo ooyeva a okumaaye oyo Mulluku amuvahilleeye. Yeella tti echigawaaye.

¹⁹ Mwaamodda Mulluku amuvaha muthu eyuuma ni ddaphaama ddimodda amuvahattho masiva oohakallallella ddenndda. Muthooyo addaakhelle nave ahakallallena mitteko ddaye ddittheddene. Yeella tti emphaso yoovenyera wa Mulluku.

²⁰ Muthu awi ddiidda khuupuwella dda oyeva wa mallapo a okumaaye ekaamba yawi Mulluku oomuddalliha ni ohakallalla m'murimani mwaye.