Oollalleya 4 - Mawu a Mulluku

¹ Kahoonattho orama echilungamo ottheene oneereya vatthimva. Nave kaawoona oonyingallelliwa emorihaka miitthori koma khaarivo naari mmodda owaakhurumusa murima. Khaarivo owaakhurumusa murima kaambiiwa owaahoosaayo yaakhalla ni masiva.

² Kaallota m'murimani wi ookhwa, alle yarowille khalle, tti eekari wunchichi okhwaranya ni ayo eri ni okumi.

³ Koma owaakhwaranya attheenaayo tti oyo ahinayariwe, oyo ahinaddoone mitteko ddoonanara nnddo ddineereya vatthimva.

⁴ Vano kaadduwella wi mitteko ddittheddene ni eruso ddittheddene ddinneereya ekaamba yawi mmodda anamukhallella ehache mukhwaaye. Ddittheddenennddo khaddinna mutteko nave oddaashaasha ddenndda tti wiikatamiha.

⁵ Vallethi muthu ookarangeya anneera matta llellee ophiyera akhwille ni ettalla.

⁶ Komathi tti waphaama okhalla ni okumi wamurendelle wooddalla nnatta nimodda okhwaranya ni oviheeriwa ni mitteko ddooddalla matta meelli ni wiikatamiha.

⁷ Kahoonattho emodda yoohikhalla ni mutteko vatthimva.

⁸ Vaakhalla muthu mmodda oyo aari yeekhaaye, oohikhalla ni mwaana apaalle mwanamunne. Mitteko ddaye kheddaamalla nave miitthwaaye kheyaakwakhwanihiwa ni eyuumaaye, khiikoha naari vang'ono wi, “Ethiyo mutteko kinaphareemoolla apaalle oddiimmana ddoohakallallihanngu kinamweerella aani?” Ddenndda khaddinna mutteko navettho tti ddoohihakallalliha.

⁹ Okhalla eelli tti waphaama okhwaranya ni okhalla weekha kaambiiwa mitteko dda athu eelli tti ddoopinduliha wunchichi.

¹⁰ Mmodda iikuha mukhwaaye ttuumuvenyiha. Koma otulli wa oyo ari yeekha vawi iikuha khaavo anaamuvenyihe.

¹¹ Navettho eelli yakona vamodda ennavihihana mwiilli. Koma muthu akhalla yeekha ttuuwiivihiha mwiilli mwawiidde?

¹² Muthu ttuullipana ni mukhwaaye akhalla yeekhaaye koma yakhalla eelli ttuumugonjiha olliye. Mukwe wooritthiwa ni olusi muraru khonaphaddeya shisha.

¹³ Musombwe oohoowa koma muthu eezeru ookhalla phaama omukhwaranya mwene awuulluvalla koma ookarangeya oyo ahinalangizeya.

¹⁴ Musombooyo ttuuvenyera ondende wi akhalle mwene naari ayariwe oohoowa mwiillaponi mwaye mwemmo.

¹⁵ Kaawoona athu attheene ayo enakhalla vatthimva nave kaadduwella wi variyari viwamvo vaakhalla musombwe olle anaavollowe omwene.

¹⁶ Mwene ttuuwalamulella athu anchichi koma akhwa khaavo oyo anaatetheelle nnddo mwenooyo eerilleeye. Ddawoona, ddenndda khaddinna mutteko nave oddaashaasha ddenndda tti wiikatamiha.