Oollalleya 3 - Mawu a Mulluku

Erive ello yookhalla ni enthawiiwa

¹ Erive ello yookhalla ni enthawiiwa nave vookhalla enthawi ya erive ello vatthimva.

² Vookhalla enthawi yooyariwa ni enthawi yookhwa, enthawi yawaalla ni enthawi yootulla ddawaallannddo.

³ Vookhalla enthawi yawiipha ni enthawi yoochiriha, enthawi yookumulla ni enthawi yoomaka.

⁴ Vookhalla enthawi yoomoriha miitthori ni enthawi yoottheya, enthawi yawinlla ni enthawi yawiina.

⁵ Vookhalla enthawi yawaatamana ni enthawi yoorekamellana, enthawi yookhupaarellana ni enthawi yoohiyana.

⁶ Vookhalla enthawi yawaashaasha ni enthawi yoohiya waashaasha, enthawi yoosunga ni enthawi yootathilla.

⁷ Vookhalla enthawi yawaahulla ni enthawi yoosowa, enthawi yoomaalleya ni enthawi yoollota.

⁸ Vookhalla enthawi yookondana ni enthawi yawiitana, enthawi yakhoto ni enthawi yamurendelle.

⁹ Ethiyo oophara mutteko anaphuravo tini va muttekwaaye?

¹⁰ Kooddoona mitteko nnddo Mulluku aavahilleeye athu wi ephareke.

¹¹ Aayireeriha erive ello va enthawiiwa. M'murimani mwa athu Mulluku aahiyamottho ddoohimalla va mibado ddittheddene. Komathi athwaayo khewora oddikhumellella ddittheddene dda Mulluku waambeella vawaamba ophiyera vamamallihello.

¹² Kinnadduwella wi kheyiivo yaphaama wa athu okhwaranya okhalla oohakallalla ni wiihakallalliha enthawi ettheene ya okumiiwa.

¹³ Muthu acheke, awiryeke nave ahakallalleke ni mitteko ddaye vawi tti emphaso ya Mulluku.

¹⁴ Kinnadduwella wi nnddo aneera Mulluku ddinnakeraattheya wa enthawi yoohimalla. Kheyiivo enaawoonjereriwe apaalle ovukulliwa. Mulluku aaddipanga mwawi ddiiddo wi athu emooveke.

¹⁵ Nnddo ddirivo ollello ddaakhallavo khalle. Nnddo ddinaakhallevo muhoollo ddaakhallavottho khalle. Mulluku annaddaakullella ddakhalle nnddo ddaviralle wi ddeereye.

Ohilungama wa ellapo yavatthi

¹⁶ Emodda koonilleemi vatthimva tti yawi, nko ori echiweruzo yaphaama onnakhallattho oonanara murima, nko ori echilungamo onnakhallattho ddoonanara.

¹⁷ Sika miyaano kaallota m'murimani wi, “Mulluku aneeroweeruza attheene, oolungama ni oonanareene vawi vookhalla enthawi ya erive yaweereya ni orive mutteko.”

¹⁸ Ollota dda athu, kaallotattho m'murimani wi Mulluku annaweesa ni yoolinga yawi yoone wi alliwaayo khenahiyana naari vang'ono ni enama.

¹⁹ Nnddo ddinaweereyella athu, ddiinnereyellattho enama, ennakhwa. Ddittheddene ddinnavuma mpweya mmoddamoddave yooyo, muthu khanakhwaranya enama. Ddittheddenenndda khaddinna mutteko.

²⁰ Ddittheddene ddinaya onipuroni nimoddamoddave. Ddittheddene ddinavenyera othayani nave ddinahokollowella othayani wenko.

²¹ Ttaani anaallote wi munepa wa muthu onawella oddullu nave munepa wa enama onakitthella vatthi va ethaya?

²² Sika kahoona wi kheyiivo yaphaama okhwaranya wi muthu ahakallallelleke muttekwaaye vawi yaayeyaaye tti yeeyo. Ttaani anadduwella eyo enaamweereyelle akhwa?