Oollalleya 2 - Mawu a Mulluku

¹ Enthawi emodda kaaganiza m'murimani mwaka wi, “Vano keese ddoohakallalliha wi ddikihakallallihe.” Koma khaddaari ni mutteko.

² Kahoona wi ottheya tti anepa nave ohakallalla khonna mutteko.

³ Kaheesa wiihakallalliha ni vinyo, murimaaka okihoollellaka mweezeru komattho waari wiikarangeyiha. Keesa apaalle ettilla yeella ttuukhalla yaphaama, eyo athu enathwariiwa voopaallani ohakallalla va mallapwiiwa ooyeva a okumiiwa.

⁴ Kaaphara mitteko dduullupalli. Kaamaka enyumba nave kaallima emata ddampesa.

⁵ Kaallima emata ddooreera ni waallamo miteekho dda ezipaso dda mitundu ddittheddene.

⁶ Kaakatattho ehime wi maaddiiwa ehellelleke miteekho ddoophuwa.

⁷ Kahaakulla akaporo aallopwana ni aatthiyana. Kaakhallattho ni akaporo ooyarelliwa mpa mwaka. Kaakhalla ni eziweto waakhwaranya attheene yalamulelle o Yerusalemu khalle.

⁸ Kahiitthukumanihella siliva ni golide navettho eyuuma yoovenyera wa mamwene kaalamulelleemi. Kaakhallana ookiipella nchipo, aallopwana ni aatthiyaneene. Kaakhallanattho awaraka ang'onong'ono anchichi alle enaahakallalliha allopwana.

⁹ Kaatthattuwa muthu oovuwa waakhwaranya attheene yalamulelle o Yerusalemu khalle. Ezeru ddaka ddaari ddirivove.

¹⁰ Erive ello miitthwaaka yapaalliiwa kaayikusa. Murimaaka ngaawiimanne ddoohakallallihannddo vawi waanahakallalla ni mitteko ddaka ddittheddene. Ddennddo sika ddaari mphuro va mitteko ddaka.

¹¹ Vano kahaamba oganizera mitteko dda mattaaka ddittheddene nnddo kahoowilleemina nave kahoona wi khaddinna mutteko nave oddaashaasha ddenndda tti wiikatamiha. Ddawoona khavaari yawi ttuuphuravo va ellapo yavatthi.

¹² Sika kaheeseesa ohiyaniha variyari va ezeru, anepa ni okarangeya. Ethiyo muthu oovollowa omwene vano ttuumukhwaranya mwawiidde aarivo khalloolle? Tti ddimoddamoddave ddennddo eerille akhalloolle.

¹³ Kahoona wi ddawoona ezeru tti ddookhwaranya okarangeya wonanko mmo owala onakhwaranyelliiwa epiphi.

¹⁴ Muthu eezeru aneeta miitthwaaye eri muhoollo koma muthu ookarangeya aneeta mwiipiphini. Koma koodduwella wi nnddo ddimmorelle mmodda tti ddimoddamoddave ddennddo ddinammorelle mmoddooyo.

¹⁵ Vano miyaano kaallota m'murimani mwaka wi, “Nnddo ddinammorelle muthu ookarangeya nameenettho ddineerokimorella. Vano ezeru ddinchichi kiriiminanndda tti dda tini?” Vano kahoona wi ddennddottho tti khaddinna mutteko.

¹⁶ Muthu eezeru apaalle muthu ookarangeya khanuupuwelliwa enthawi yoorekama vawi mallapo a muhoollo attheenaayo eneerotiwalleya. Muthu ookarangeya anakhwa moophwanaphwana ni muthu eezeru.

¹⁷ Sika kaawiita okumaaka vawi ddittheddene ddineereya vatthimva ddinnakimoriha ethakaraka. Ddittheddenennddo khaddinna mutteko nave oddaashaasha ddenndda tti wiikatamiha.

¹⁸ Mitteko ddaka ddittheddene keerilleemi vatthimva ddaakinanara vawi kinaphwanella omuhiyera muthu oyo anaawe mutulli mwaka.

¹⁹ Anadduwella ttaani wi muthu yoolla anaakhalle eezeru apaalle ookarangeya. Komave yoolla anaakhalle oolamulella mitteko ddittheddene nnddo kaddeerilleemi vatthimva mweezeru ddaka. Ddennddattho khaddinna mutteko.

²⁰ Sika murima waakivoreya ekaamba ya mitteko ddittheddene nnddo kaddipharilleemi mookatamiha vatthimva.

²¹ Enthawi emodda muthu ttuuphara mutteko moodduwella, mweezeru ni mweeruso ni omuhiyera muthu oyo ahimorenlle nikhurumella wi ahakallallekena. Ddennddattho khaddinna mutteko nave tti ddoonanara wunchichi.

²² Ethiyo muthu ttuuphuravo tini va mitteko ddittheddene ni ddookhupanyiha nnddo anaddeereeye vatthimva?

²³ Mallapwaaye mattheene annamoriwa ethakaraka, mitteko ddaye ddinnakhalla ddookatamiha. Naari mahiiyu murimaaye khoniithuuwa. Ddennddottho khaddinna mutteko.

²⁴ Kheyiivo emodda yaphaama wa muthu okhwaranya yoocha, yoowirya ni ohakallallella mitteko ddaye. Kaadduwella wi ddenndda tti ddoovenyera wa Mulluku.

²⁵ Ahaariki Mulluku ttaani aaworeke ocha apaalle ttaani aaworeke ohakallalla?

²⁶ Vallethi muthu aphaama vamiitthoni va Mulluku annamutthattusa oodduwella, eezeru ni oohakallalla. Koma oochimwa annamuvaha mitteko ddawuurulla ni otthukumaniha ddeko vatulli viwa ddittheddenennddo ddinnavahiwa wa muthu oomuhakallalliha Mulluku. Ddittheddenennddo khaddinna mutteko nave oddaashaasha ddenndda tti wiikatamiha.