Oollalleya 12 - Mawu a Mulluku

¹ Sika omuupuwelleke Oophatusaawo mu mallapo eesombwaawo mallapo oonanara ehinaphiye, ddihinaphiyettho miyakha nnddo onaallotekeewe wi, “Okumi khonakihakallalliha.”

² Enthawi ya wuulluvalla wawo nndduwa, owala, mweeri ni etheneeri ddinaakhalle epiphi nave mirapo ddineerohokollowattho murimu amwarille.

³ Vano oowehera enyumbaawo eneerotthukumella, allopwana amasiva eneerofooka, oosilla aweerengeya kheworaka ottakhuna nave ootthurumella vaniwindoni eneeroripihiwa.

⁴ Millako dda m'musewuni ddineerotiyelleya, kheddiiwaka otthitta wa veerawini apaalle winlla wa epallame ohinase.

⁵ Oneerekewoova oya mapuro oowella nave weeta onaakhalle wawoopiha. M'muruni mwawo muneeromella embwi nave oneerokolephela wiithunya m'musewuni navettho osilila oneerewuumallella. Attheene nineeroya ninaakhallekeehuwo mallapo oohimalla nave narowa vineerokhalla winlla m'misewuni.

⁶ Vano mukwe wasiliva oneerophaddeya, embale yagolide eneerokaddeya, muno oneeropweseyella odduuddi nave mukwe oneerophaddeyella wiihimeni.

⁷ Vano mwiilli oneerohokollweella mu ethaya wonanko wakhallelliiwa. Munepa oneerohokollweella wa Mulluku mwaneena oyo awuvelleellille.

⁸ “Ddittheddene khaddinna mutteko. Ddawoona, ddittheddene khaddinna mutteko!” Anallota tti Oollalleya.

Omoova Mulluku ni osunga malamulo

⁹ Woonjerera va wi oollalleya aari eezeru, ahaahuddiha athu anchichi. Aanaganizera ddawaashaasha ni otthopoolla malangizo moopwatha phaama.

¹⁰ Oollalleyooyo aanaashaasha mawu oophara murima nave ahaalemba mawu awoona ni oolungama.

¹¹ Mawu a athu eezeru tti wonanko ekopo ddoohoollella nave ddoollota ddiwa ddiri wonanko misomali ddookhomiwa moollipa. Ddoollota ddiwa ddittheddene anavelleella tti Mbusa mmodda.

¹² Mwanaka, chenjera ni erive ello yookhwaranya vaava. Olemba mabukhu khonamalla nave ohuddera wunchichi onnatopiha mwiilli.

¹³ Voomallihani, ddittheddene ddillotiwe tti ddawi omooveke Mulluku nave osungeke malamulwaaye vawi yeella sika yoophwanella weera muthu.

¹⁴ Vallethi Mulluku aneereweeruza ddittheddene ddaweereya, ddaphaama apaalle ddoonanara naari ni ddoovittheya ddene.